4. Mose 10 - O Debleskro Lab 2024 (Sinte-Manouche)

I bare phourdepangre

¹ Oun o baro Devel rakras o Moseha oun penas:

² Kre touke douy phourdepangre dran lačo roup! An kolende vell dren phourdedo, te kameh tou, te venn i tsele Israelitarya khetne, ninna te hounte djan le doureder.

³ Oun te phourdenn le kol douyentsa, hounte venn i tsele Israelitarya pash toute khetne glan o Debleskro kheer.

⁴ Te phourdenn le ap yekeste, hounte venn kolla pash toute, kay hi pralstoune pral kol boud zerya menshende an Israel.

⁵ Te phourdenn t'mer zoreles, hounte stenn kolla pre, kay hi lengre platsa kote, kay i kham pre djala, te djan le doureder.

⁶ Oun te phourdenn t'mer o douyto kopo zoreles ap i phourdepaskri, hounte stenn kolla pre, kay hi lengre platsa kote, kay i kham tato hi, te djan le doureder. Yaake djinenn le: Te vell zoreles phourdedo, hounte djan yon doureder.

⁷ Te kamenn, te venn i tsele Israelitarya khetne, hounte phourdenn gar zoreles.

⁸ Kol rashaya, o Aroneskre čave, hi kolla, kay hounte phourdenn an i phourdepangre. Kova hounte ačell yaake t'menge oun t'mare čavenge hako tsireske.

⁹ Te perenn vavar menshe an t'maro them dren oun kamenn ray pral t'mende te vell, oun t'mer djan an o kourepen, te kourenn t'men lentsa, palle hounte phourdenn zoreles an i phourdepangre, te venn t'mer t'maro baro Debleske an o shero. Oun yob lell t'men vin dran lengre vasta.

¹⁰ Phourdenn ninna an i phourdepangre ap kol bare divessa, kay han t'mer barhtelo, oun ap ko dives, kay vell i nevo čon, oun kay t'mer o baro Debleske firhen anenn, save, hoy t'mer leske tseles rhačrenna oun save, hoy rhan t'mer glan leste khetne. Palle venn t'mer mange, t'maro Debleske, an o shero. Me hom t'maro baro Devel.

I Israelitarya djan doureder

¹¹ Ap o biishto dives an o douyto čon an o douyto bersh hadas pes koy bari folka, hoy pral o Debleskro kheer his, kay o Debleskre deesh laba dren hi.

¹² Oun kol Israelitarya djan dran ko moulo tato them Sinay. Oun koy folka djas glan lende oun ačas tardo an ko moulo tato them Paran.

¹³ Kova his o ersto kopo, kay djan le yaake doureder har o baro Devel kova ap o Moseste penas:

^14-16 Kol menshe dran o kheer Youda his i glanstoune, kay djan vin. Lengro pralstouno his o Nashon, koleskro dad o Amminadab hi. Lentsa djan kol menshe dran o kheer Issakar oun dran o kheer Zabulon. I pralstouno pral o kheer Issakar his o Netanel. Leskro dad hi o Souar. Oun o pralstouno pral o kheer Zabulon his o Eliab. Leskro dad hi o Helon.

¹⁷ Palle kran yon o Debleskro plarhteno kheer tele. Oun kol menshe dran i familye Gershon oun Merari djan oun hidjran ko plarhteno kheer.

^18-20 Pal lende djan kol menshe dran o kheer Ruben. Lengro pralstouno his o Elizour, koleskro dad o Shedehour hi. Lentsa djan kol menshe dran o kheer Simeon oun dran o kheer Gad. O pralstouno pral o kheer Simeon his o Sheloumiel, koleskro dad o Sourishadday hi. Oun o pralstouno pral o kheer Gad his o Elyasaf, koleskro dad o Degouel hi.

²¹ Pal lende djan kol Kohatarya, oun hidjran ko koova o Debleskro plarhteno khereske. Kava kheer hounte vas pale pre-čiddo, bis te kol Kohatarya pal van.

^22-24 Pal lende djan kol menshe dran o kheer Efrayim. Lengro pralstouno his o Elishama, koleskro dad o Ammihoud hi. Lentsa djan kol menshe dran o kheer Manasse oun dran o kheer Benyamin. O pralstouno pral o kheer Manasse hi o Gamaliel, leskro dad hi o Pedazur. Oun o pralstouno pral o kheer Benyamin his o Abidan, leskro dad hi o Gidoni.

^25-27 Pal lende djan kol menshe dran o kheer Dan. Lengro pralstouno his o Ahiyeser, koleskro dad o Ammishadday hi. Lentsa djan kol menshe dran o kheer Asser oun dran o kheer Naftali. O pralstouno pral o kheer Asser his o Pagiel. Leskro dad hi o Okran. Oun o pralstouno pral o kheer Naftali his o Ahira, koleskro dad o Enan hi.

²⁸ Hako kopo, kay djan i Israelitarya doureder, kran le les yaake.

O Mose mangell peskri romyakro phralestar, te vell lo lentsa

²⁹ Oun o Mose penas ap peskri romyakro phraleste, o Hobab, koleskro dad o Regouel hi dran o them Midian: “Mer djah an ko them, hoy o baro Devel penas: Me dau kova t'mende. Kanna, ab mentsa! Palle krah touke lačo koova. O baro Devel penas: Me kamau lačepen te krell ap o Israel.”

³⁰ Koy penas o Hobab: “Me kamau gar t'mentsa te djal. Me kamau an miro them oun pash mire menshende te djal.”

³¹ O Mose penas: “Dja gar krik mendar, tou djineh i platse an o moulo tato them, kay mer nay djivah. Tou nay sikreh menge o drom.

³² Oun te djah tou mentsa, krah mer touke o lačepen, hoy o baro Devel ap mende krella.”

³³ Yaake moukan le o baro Debleskri berga pal pende oun djan triin divessa dour. Oun kolla, kay hidjran o sonakaskro morhton, kay o baro Debleskre deesh laba dren hi, djan glan lende oun sikran lende, kay ačenn le tardo.

³⁴ Oun ap o dives, har djan le doureder, his o baro Debleskri folka pral lende.

³⁵ Oun har djas ko sonakaskro morhton doureder, penas o Mose: “Baro Devel, ste pre, oun trade kolen krik, kay kamenn touke čilačepen! Kre, te nashenn le halauter penge toutar!”

³⁶ Oun te čivan yon ko morhton tele, penas yob: “Am pale, baro Devel, pash kol boud zerya menshende an Israel!”