4. Mose 1 - O Debleskro Lab 2024 (Sinte-Manouche)

I laba i morshendar an o Israel venn pre-činlo

¹ Oun o baro Devel rakras o Moseha an o moulo tato them Sinay, an o Debleskro plarhteno kheer, ap o ersto dives, an o douyto čon, an o douyto bersh, har yon dran ko them Egiptia vin djan. Oun o baro Devel penas:

^2-3 Tou oun o Aron, činenn an i liil har boud morsh Israelitarya koy hi, kay hi zoreles doha, te venn le lourde. Činenn i laba hake morshendar pre, kay hi biish bersha phouro oun phoureder! Činenn ninna pre dran havi familya yon venna oun koon lengro dad hi!

⁴ Lenn deesh-te-douy morshen, yek dran haki bari familya, hoy vell kol deesh-te-douy Yakobeskre čavendar, te venn le ap t'mari rig pash koy boudi. Kal morsha hounte venn i pralstoune pral pengre menshende.

⁵ Kalla hi kol laba kol morshendar, kay ap t'mari rig venn: Dran o kheer Ruben: o Elizour, leskro dad hi o Shedehour.

⁶ Dran o kheer Simeon: o Sheloumiel, leskro dad hi o Sourishadday.

⁷ Dran o kheer Youda: o Nashon, leskro dad hi o Amminadab.

⁸ Dran o kheer Issakar: o Netanel, leskro dad hi o Souar.

⁹ Dran o kheer Zabulon: o Eliab, leskro dad hi o Helon.

¹⁰ Dran o kheer Efrayim, kay hi o Yosefeskro čavo: o Elishama, leskro dad hi o Ammihoud. Dran o kheer Manasse, kay hi ninna o Yosefeskro čavo: o Gamaliel, leskro dad hi o Pedazur.

¹¹ Dran o kheer Benyamin: o Abidan, leskro dad hi o Gidoni.

¹² Dran o kheer Dan: o Ahiyeser, leskro dad hi o Ammishadday.

¹³ Dran o kheer Asser: o Pagiel, leskro dad hi o Okran.

¹⁴ Dran o kheer Gad: o Elyasaf, leskro dad hi o Degouel.

¹⁵ Dran o kheer Naftali: o Ahira, leskro dad hi o Enan.

¹⁶ Kolla van vi-rodedo dran i tsele Israelitarya. Hakeno his o pralstouno pral peskre menshende. Oun yon van i pralstoune pral kol boud zerya menshende an Israel.

¹⁷ Oun o Mose oun o Aron lan kal deesh-te-douy pralstunen pash pende.

¹⁸ Oun yon anan i tsele Israelitarya khetne ap o ersto dives an o douyto čon. Oun i tsele morsha, hoy his biish bersh oun phoureder, moukan pengre laba an lila dren te činell. Yon van yaake pre-činlo, te vas diklo dran havi familya hakeno vas oun koon leskro dad his.

¹⁹ Kova kran le an o moulo tato them Sinay yaake har o baro Devel ap o Moseste penas.

^20-43 I laba kol tsele morshendar, kay his biish bersh oun phoureder oun zorelo doha, te nay venn le lourde, van an lila dren činlo, hakeno pal peskri familya oun dadeskro lab. Kolla his: 46.500 morsha dran o kheer Ruben, o Yakobeskro phoureder čavo. 59.300 morsha dran o kheer o Simeon. 45.650 morsha dran o kheer Gad. 74.600 morsha dran o kheer Youda. 54.400 morsha dran o kheer Issakar. 57.400 morsha dran o kheer Zabulon. 40.500 morsha dran o kheer Efrayim. 32.200 morsha dran o kheer Manasse. 35.400 morsha dran o kheer Benyamin. 62.700 morsha dran o kheer Dan. 41.500 morsha dran o kheer Asser 53.400 morsha dran o kheer Naftali.

⁴⁴ Kalla hi kol morsha, kolengre laba o Mose oun o Aron oun kol deesh-te-douy pralstoune pre-činan. Hakeno kol deesh-te-douyendar his i pralstouno pral peskre menshende.

^45-46 I tsele morsh Israelitarya dran haki familya, hoy biish bersh oun phoureder his oun zorelo doha, te nay venn le lourde, his 603.550.

I laba kol morshendar dran o kheer Levi venn gar pre činlo

⁴⁷ Kolla, kay van dran o kheer Levi, kolengre laba van gar kol vavarentsa pre-činlo.

⁴⁸ O baro Devel penas o Moseske:

⁴⁹ I Levitarya hounte činess gar an o liil dren, kay i vavar Israelitarya dren činlo hi, vitar gar har boud yon hi.

⁵⁰ Tou dess len gole, te boudrenn yon an o Debleskro plarhteno kheer, kay o Debleskre deesh laba dren hi, oun ap halauter, hoy an kava kheer hi. Yon hounte hidjrenn o Debleskro kheer oun halauter, hoy koy dren hi, oun denn garda ap halauter, oun čivenn pengre plarhtene khera troul o Debleskro kheer.

⁵¹ Oun te djan t'mer doureder, čivenn kol Levitarya o Debleskro plarhteno kheer khetne. Oun te čivenn t'mer t'mare plarhtene khera pre, palle čivenn i Levitarya o Debleskro kheer pale pre. Hako vavar, kay vell pash o kheer, hounte merella.

⁵² Te djan t'mer gar doureder, hounte beshenn pen i Israelitarya hakeno pash peskre menshende oun pash ko pre-čiddo kotar than, hoy sikrella, have menshendar yon hi.

⁵³ Kol Levitarya hounte čivenn pengre plarhtene khera troul o Debleskro plarhteno kheer, kay o Debleskre deesh laba dren hi, te denn le garda, te vell kek pash o kheer, yaake te vell gar miri rholi pral i Israelitarya.

⁵⁴ Oun i Israelitarya kran halauter yaake, har o baro Devel ap o Moseste penas.