3. Mose 9 - O Debleskro Lab 2024 (Sinte-Manouche)

O Aron marell firhen o baro Debleske

¹ Har o orhtato dives vas, kharas o Mose o Arones oun leskre morsh čaven oun i phoureder dran Israel pash peste,

² oun penas ap o Aron: “Le touke i terno gouroum oun i morsh bakro, ko gouroum, te vell lo maredo, te vell i doosh krik lino, oun ko bakro, te vell lo maredo, oun leskro tselo mass o baro Debleske rhačedo. Kal douy hounte venn sasto. Kolla an glan o baro Debleste:

³ Oun rake i Israelentsa oun pen lenge: Anenn yek morsh bouzni, hoy vell maredo, te vell i doosh krik lino, ninna i terno gouroum oun i terno bakro, hoy yek bersh phouro hi, te vell lengro mass tseles rhačedo o Debleske. Kol douy hounte venn sasto.

⁴ Anenn ninna i gouroum oun i morsh bakro, te maras mer len glan o baro Debleste, oun rhan len kote khetne. Koy pashel anenn yarro, kay djet dren hi, te rhačras mer les o baro Debleske. Kava dives hi ko dives, kay o baro Devel pes t'menge sikrell.”

⁵ Yon anan kova, hoy o Mose penas, glan o voudar o baro Debleskro plarhteno kherestar. Oun i tsele Israelitarya van kote khetne glan o baro Debleste.

⁶ oun o Mose penas: “O baro Devel penas, te krenn t'mer kava, te sikrell lo pes t'menge an peskro raylepen.”

⁷ Oun o Mose penas ap o Aron: “Ab glan o Debleskri rhačepaskri, oun an leske ko firhes, koleha tiri doosh krik lino vell, oun mare ninna touke ko firhes, koleskro tselo mass o Debleske rhačedo vell. Palle kre kova kol firhentsa, hoy i Israelitarya anan, te vell lengri doosh krik lino. Yaake penas kova o baro Devel.”

⁸ O Aron vas glan i rhačepaskri oun maras ko terno gouroum, hoy yob anas, te vell peskri doosh krik lino.

⁹ Oun leskre morsh čave anan leske o rat. Oun yob čivas peskro goushto an o rat, oun makas čomone ko ratestar ap i shinga, hoy ap i star ekke pral ap i rhačepaskri hi. Oun o vavar rat čoras lo tella pash i rhačepaskri.

¹⁰ O thulepen oun i nire oun ko thoullo kotar ap i lebra rhačras lo ap i rhačepaskri, yaake har o baro Devel kova o Moseske penas.

¹¹ O mass oun i hauta rhačras lo vin glan koy platsa, kay i menshe his.

¹² Palle maras lo ko firhes, koleskro tselo mass o baro Debleske rhačedo vell. Oun leskre čave anan leske o rat. Oun yob čoras les troul o Debleskri rhačepaskri ap leskre star rigya.

¹³ Oun yon anan leske kol kotya mass, ninna o shero. Oun yob rhačras len ap i rhačepaskri.

¹⁴ Yob thovas i bouke, oun i palstoune herya, oun čivas len pral ap ko vavar mass ap i rhačepaskri, oun rhačras len.

¹⁵ Pal kova anas lo glan o baro Debleste kol firhen, hoy i Israelitarya anan. Yob maras koy morsh bouzni, te vell i doosh i Israelendar krik lino, oun kras kava firheha yaake, har lo glan kova koleha kras, hoy lo peskri doshake maras.

¹⁶ Palle maras lo ko firho, koleskro tselo mass rhačedo vell, oun kras leha har o baro Devel penas.

¹⁷ Ninna anas lo ko yarro, kay djet dren hi, las i vast pherdo oun rhačras les ap i rhačepaskri, yaake har kras lo ap i tsalla, har lo o firhes o Debleske anas, koleskro tselo mass rhačedo vas.

¹⁸ Palle maras lo ko gouroum oun ko bakro ko rhapaske, hoy i menshe khetne rhan glan o baro Debleste. Leskre čave anan leske o rat. Oun o Aron las ko rat oun čoras les troul i rhačepaskri ap leskre star rigya.

¹⁹ Ko thulepen kol douy firhendar, koy thoulli pori oun o thulepen ap i bouke, oun i nire oun o thoullo kotar, hoy ap i lebra hi,

²⁰ kava tselo thulepen čivas lo ap i bečeskre kotya. Oun o Aron rhačras ko thulepen.

²¹ Kol bečeskre kotya oun i čače palstoune herya hadas o Aron glan o baro Debleste pre, te sikrell lo, kay kal tsele firhe o baro Debleske his. Yaake penas kova o baro Devel o Moseske.

²² Har anas o Aron kal tsele firhen o Debleske, hadas lo peskre vasta pre pral i tsele menshende, oun rakras o Debleskri barht pral lende vin. Palle djas lo koy treppa tele foun koy rhačepaskri.

²³ Oun o Mose oun o Aron djan pale an o Debleskro plarhteno kheer. Oun har le pale vin van, rakran le o Debleskri barht vin pral i tsele menshende. Kote sikras pes o baro Debleskro raylepen glan i tsele menshende.

²⁴ I yag djas vin o baro Deblestar, oun rhačras ko mass pre kol firhendar, koleskro tselo mass rhačedo vell, ninna kol thoulle kotya, hoy ap o Debleskri rhačepaskri čiddo his. Har kova i tsele menshe dikan, dan le i barhtyatar gole, oun čivan pen tele glan o baro Debleste ap i phoub.