3. Mose 8 - O Debleskro Lab 2024 (Sinte-Manouche)

O Aron oun leskre čave venn rashaya

¹ Oun o baro Devel penas ap o Mose:

² Le o Arones oun leskre morsh čaven touha, oun i rashayengre koola, oun o djet oun ko terno gouroum, hoy i doshake maredo vell, oun kol douy morsh bakre oun koy korba, kay i mare dren hi, kay kek shoutlo yarro dren hi.

³ Mouk i tsele Israelitaryen glan o voudar o Debleskro plarhteno kherestar khetne te vell.

⁴ O Mose kras yaake har o baro Devel penas. Oun i tsele Israelitarya van khetne glan o voudar o Debleskro plarhteno kherestar.

⁵ Oun o Mose penas ap lende: Kava hi, hoy o baro Devel penas, te hounte kras mer.

⁶ Oun yob moukas o Arones oun leskre morsh čave glan te vell, oun thovas len o panyeha.

⁷ Yob rivas o Aroneske o layntikro gad an oun čivas leske o pereskri dori trouyel, palle i baya oun o rashayeskri damdira. Palle pandas lo ko pereskro pandepen, hoy ap i damdira hi, troul leste.

⁸ Palle čivas lo o bečeskri possita ap leste. Oun an koy possita čivas lo kol douy tikne koola, hoy kharenna momeli oun čačepen.

⁹ Palle čivas lo o shereskro pandepen troul leskro shero, oun glan ap koleste i tikno sonakaskro kotar, yaake har o baro Devel les o Moseske penas.

¹⁰ O Mose las o djet oun vitsras kolestar čomone ap o tselo plarhteno kheer, kay o baro Devel djivell, oun ap lauter hoy dren hi. Yaake sikras lo, kay kova lauter o baro Debleske hi.

¹¹ Efta kope vitsras lo ko djetestar čomone ap i rhačepaskri oun kol tsele koola, kolentsa boudrenn le, ninna ap o panyeskro čaro oun ap kol herya koy tel, te vell kova lauter o baro Debleske.

¹² Palle las o Mose ko djet, oun čoras kolestar ap o Aroneskro shero, oun kras yaake, te vell yob o baro Debleskro rashay.

¹³ Oun o Mose moukas o Aroneskre čave glan te vell, oun rivas lenge i layntikre gada an, oun pandas lenge i pereskro pandepen trouyel, oun čivas i rashayengre stadja ap lengre shere. Kova lauter kras lo yaake, har o baro Devel kova leske penas.

¹⁴ Yob moukas o terno gouroum te anell, hoy i doshake maredo vell. O Aron oun leskre čave čivan pengre vasta ap o shero ko terno firhestar.

¹⁵ Oun o Mose maras les kote, oun las čomone ko ratestar, oun makas peskro goushteha ko rat ap i shinga, hoy pral ap i star ekke ap i rhačepaskri hi. Ko tselo vavar rat čoras lo tella pash i rhačepaskri vin. Yaake las lo koy tseli doosh oun ko tselo pale-čiddo koova krik, hoy ap koy rhačepaskri his, te nay vell li o Debleske dino.

¹⁶ Yob las o tselo thulepen, hoy ap i bouke hi, oun ko thoullo kotar, hoy pral i lebra hi, oun kol douy nire oun lengro thulepen, hoy ap lende hi! Kova lauter rhačras lo ap o Debleskri rhačepaskri.

¹⁷ Kova, hoy pral ačas kava firhestar, leskri hauta oun leskro mass, oun ko rhapen, hoy an leskre bouke his, rhačras lo an i yag vin glan koy platsa, kay i menshe his, yaake har o baro Devel leske penas, te krell lo.

¹⁸ Palle las lo ko yek bakro, koleskro tselo mass rhačedo vell o baro Debleske. Oun o Aron oun leskre čave čivan pengre vasta ap o firheskro shero.

¹⁹ Oun o Mose maras les, las leskro rat oun čoras les troul o Debleskri rhačepaskri vin.

²⁰ Oun yob činas o mass an kotya, oun čivas o shero, kol kotya mass oun o thulepen ap i rhačepaskri.

²¹ Oun yob thovas leskre bouke oun leskre herya o panyeha, oun čivas len ninna ap i rhačepaskri, oun moukas ko tselo firhes pre te rhačrell ap o Debleskri rhačepaskri. Yaake har o baro Devel penas, vas ko tselo bakro leske rhačedo. Oun o lačo soungepen, hoy vas vin, soungas mishto o baro Debleske.

²² Yob moukas o douyto morsh bakro te anell, kay doleske maredo vell, te venn i rashaya an pengri boudi dren čiddo. Oun o Aron oun leskre čave čivan pengre vasta ap o firheskro shero.

²³ Oun o Mose maras les, las leskro ratestar oun makas les tella ap o Aroneskro čačo kand, ninna ap o pesso goushto ap leskro čačo vast, oun ap o baro tsebo leskro čačo pirestar.

²⁴ Palle moukas lo o Aroneskre morsh čave te vell. oun makas ko ratestar tella ap lengro čačo kand, ninna ap o pesso goushto ap lengre čače vasta, oun ap o baro tsebo lengre čače pirendar. O tselo vavar rat čoras o Mose troul i rhačepaskri vin.

²⁵ Yob las o thulepen kava maredo bakrestar: i thoulli pori, ninna o thulepen, hoy ap i bouke hi, oun ko kotar, hoy pral i lebra hi, oun kol douy nire oun lengro thulepen, hoy ap lende hi, oun o pralstouno kotar i čači heryatar.

²⁶ Dran koy korba an kolate o maro hi, an koleste kek shoutlo yarro hi, oun hoy o baro Debleske dino vas, las lo yek merkli, kay kek shoutlo yarro dren hi, yek djeteskri merkli, oun yek sano maro. Oun čivas len ap ko kotya thulepen, oun ap ko pralstouno kotar o čači heryatar.

²⁷ Kova lauter das lo an i vasta o Aronestar oun leskre morsh čavendar. Oun yon hadan les pre glan o baro Debleste, te sikrenn le, kay kova leske hi.

²⁸ Oun o Mose las lauter pale dran lengre vasta, čivas les ap o Debleskri rhačepaskri pral pre ap ko mass ko firhestar, hoy vell tseles rhačedo, oun moukas les te rhačrell. Kava hi ko rhapen, hoy vas o baro Debleske rhačedo, har van i rashaya an pengri boudi dren čiddo. Oun o lačo soungepen, hoy vas vin, soungas mishto o baro Debleske.

²⁹ O Mose las o beč ko douyto bakrestar, oun hadas les pre glan o baro Debleste, te sikrell lo, kay kova leske hi. Kava beč his ko kotar, hoy nay las o Mose peske, te rhal lo les. Yaake penas kova o baro Devel.

³⁰ Palle las o Mose ko djetestar, hoy o Aroneske oun leskre čavenge ap lengre sherya čoredo vas, ninna ko ratestar hoy ap i rhačepaskri his, oun vitsras čomone kolestar ap o Aron oun ap leskre koola, ninna ap leskre morsh čavende oun ap lengre koola. Yaake čivas lo len ap i rig o baro Debleske, te venn le leskre rashaya.

³¹ O Mose penas ap o Aron oun leskre čavende: Kerenn ko mass pash o voudar glan o Debleskro kheer, oun rhan les kote, khetne ko mareha dran koy korba! Yaake penas mange kova o baro Devel.

³² Kova, hoy o massestar oun ko marestar pral ačell, rhačrenn an i yag!

³³ Ačenn efta divessa glan o voudar o baro Debleskro kherestar! Djan gar kotar krik, bis te kol divessa trouyel hi, kay i firhe maredo oun rhačedo venn doleske, kay venn t'mer dren čiddo an t'mari boudi.

³⁴ Yaake har kava dives firhe oun rhapen glan o baro Debleste anlo van, yaake hounte vell kerdo ap kol divessa, kay venna, te vell t'mari doosh krik lino. Kova penas o baro Devel.

³⁵ Efta divessa oun ratsya hounte ačenn t'mer glan o voudar o baro Debleskro plarhteno kherestar. Krenn, hoy yob penas, te merenn gar! Yaake penas lo kova mange.

³⁶ O Aron oun leskre morsh čave kran lauter yaake, hoy o baro Devel ap o Moseste penas.