3. Mose 7 - O Debleskro Lab 2024 (Sinte-Manouche)

Kova hi, hoy kol marede firhendar i rashayenge hi

¹ Yaake hounte vell kerdo ko firheha, hoy i menshe anenn, te vell lengri doosh pale mishto kerdo. O mass sau firhestar nay rhan kokres i rashaya oun kek vavar.

² Ap koy platsa, kay vell ninna ko firho maredo, koleskro tselo mass rhačedo vell, ap kay platsa hounte vell ko firho maredo, hoy yek anas, te vell leskri doosh pale mishto kerdo. Oun o firheskro rat vell vin čoredo troul o Debleskri rhačepaskri.

³ Leskro tselo thulepen anell o rashay o baro Debleske, koy thoulli pori oun ko thulepen, hoy ap i bouke hi,

⁴ kol douy nire oun ko thulepen, hoy ap lende hi, oun ko thoullo kotar, hoy ap i lebra hi. Pash i nire hounte vell o thulepen tele činlo.

⁵ O rashay moukell kova lauter ap i rhačepaskri pre te rhačrell o baro Debleske. Yaake vell ko mensheskri doosh pale mishto kerdo.

⁶ I morsha oun i morsh čave dran i rashayengre familye nay rhan o mass ap i Debleskri platsa. Ko mass vell i firhestar, hoy o baro Debleske anlo vas. Doleske nay rhal les kek vavar.

⁷ Yaake har pash ko firho, hoy i doshake maredo vell, yaake hi ninna pash ko firho, hoy maredo vell, te vell o mensheskri doosh pale mishto kerdo. O firheskro mass hi ko rashayeske, kay o firheskro thulepen rhačrell, te vell pale lauter mishto mank ko mensheste oun o Debleste.

⁸ Ko rashay, kay o firho yekestar glan o baro Debleste anell, koleskro tselo mass rhačedo vell, koleske hi o firheskri hauta.

⁹ Oun o tselo rhapen dran djob, hoy an o bob peklo vas, an i piri keredo vas, oder an i sasterno čaro peklo vas, kova hi ko rashayeske, kay ko rhapen glan o baro Debleste anas.

¹⁰ Ko vavar rhapen dran djob, o djeteha oder kek djeteha, kova hi i tsele rashayenge dran o kheer Aron, ko yekeske har ko vavareske.

¹¹ Oun yaake hounte vell kerdo ko firheha, hoy vell glan o baro Debleste anlo, te rhan les i menshe palle khetne.

¹² Te anell yek les, te kamell lo pes pash o baro Debleste te parkrell, palle hounte anell lo ninna merklia kerdo djeteha, an kolende kek shoutlo yarro hi, oun sane mare an kolende kek shoutlo yarro hi, kay djet pral maklo vas, ninna merklia kerdo dran lačo djob oun djet.

¹³ Pash kova, hoy anenn le, te parkrenn le pen pash o baro Debleste, anenn le mare, hoy shoutlo yarreha kerdo vas.

¹⁴ Yek kotar hakenestar vell glan o baro Debleste anlo. Kova lell o rashay, kay o rat ko maredo firhestar troul o Debleskri rhačepaskri čoras.

¹⁵ Ko mass kava firhestar, hoy yek glan o baro Debleste anas, te parkrell lo pes pash leste, hounte vell ap kava emligo dives rhalo, oun či kolestar ačell čiddo bis taysarlakro.

¹⁶ Te das yek pes sovel te dell lo čomone o Debleste, oun anell doleske sau firho o Debleske, vell ko mass ko emligo dives rhalo. Te ačell čomone pral, nay rhan le les o vavar dives ninna. Yaake hounte vell ninna kerdo, te das yek i firho pestar o baro Debleste.

¹⁷ Hi gomme o triinto dives čomone pral, hounte vell kova an i yag rhačedo.

¹⁸ Te rhal yek ap o triinto dives gomme ko massestar, palle dikell o baro Devel gar lačes ap kova oun ap koleste, kay anas ko firho glan leste. O mass vas pale-čiddo. Oun koon rhal kolestar, hounte hidjrell peskri doosh, hoy yob koleha ap peste las.

¹⁹ Ko mass, hoy čomoneha khetne vell, hoy pale-čiddo hi, kova hounte vell gar bouder rhalo. An i yag vitsedo oun rhačedo hounte vell ko mass. Kokres kova, kay gar pale-čiddo hi glan o baro Debleste, nay rhal ko mass, hoy o baro Debleske anlo vas.

²⁰ Kova kay rhal ko mass, hoy o baro Debleste dino vas, oun ap leste hi i pale-čiddo koova, kova vell infam oun hi bouder kek Israelitari.

²¹ Te taprell yek čomone an, hoy pale-čiddo hi, i menshestar oder i firhestar oder i vavar pale-čiddo koova, oun palle rhal lo kava mass, hoy glan o baro Debleste anlo vas, kova vell infam oun hi bouder kek Israelitari.

²² Oun o baro Devel rakras ap o Mose:

²³ Rake ap i Israelitarya oun pen lenge: “Ma rhan o thulepen i groumyendar, bakrendar oun bouzyendar!

²⁴ O thulepen kol firhendar, kay meran, oder van moulo dandedo divye firhendar, nay lenn oun krenn čomone koleha. Ma rhan les!

²⁵ Kova, kay rhal ko thulepen save firhendar, kay o baro Debleske anlo van, kova vell infam oun hi bouder kek Israelitari.

²⁶ Ma rhan vitar kek rat – kek rat i firhestar oun kek rat i čirklestar, kay t'mer ninna djivenna!

²⁷ Hakeno, kay rhal o rat, vell infam oun hi bouder kek Israelitari.”

²⁸ Oun o baro Devel rakras ap o Mose:

²⁹ Rake ap i Israelitarya oun pen lenge: Kova kay anell o baro Debleske i firho, hoy rhan i menshe palle khetne glan leste, kova dell o baro Debleste kolestar ko kotar, hoy o Debleske hi.

³⁰ Peskre vastentsa hounte anell lo les, te vell lo rhačedo o baro Debleske: Ko thulepen oun ko beč. Ko beč vell pre hadedo glan o baro Debleste.

³¹ O rashay moukell o thulepen te rhačrell ap i rhačepaskri. I beč hi o Aroneske oun leskre morsh čavenge.

³² O čači heri kava firhestar hi ninna ko rashayeske,

³³ kay anell o rat oun o thulepen glan o baro Debleste kol firhendar, hoy rhan i Israelitarya palle khetne glan o Debleste.

^34-36 O baro Devel penell i Israelenge, kay anenn leske i firhes, te rhan le les khetne glan leste, te denn le o beč oun i čači heri o rashayeste, o Aroneste, oun leskre morsh čavende. Kal kotya mass hi i rashayenge dran o kheer Aron hako tsireske foun ko dives, kay van le dren čiddo an pengri rashayengri boudi. Oun i Israelitarya hounte denn len i rashayende. Kava lab ačell yaake hako tsireske, hoy vella.

³⁷ Kava hi hoy glan činlo vas: pral ko firho, koleskro tselo mass rhačedo vell; pral o rhapen dran djob, hoy o Debleske anlo vell; pral ko firho, hoy maredo vell, te vell i doosh oun o pale-čiddo koova krik lino; pral ko firho, hoy maredo vell, te vell o mensheskri doosh pale mishto kerdo; pral ko firho, hoy maredo vell ap ko dives, kay vell o rashay an peskri boudi dren čiddo; pral ko firho, hoy rhan le khetne, koleskre feteder kotya o Debleske rhačedo van.

³⁸ Yaake penas kova o baro Devel ap o Moseste, har his lo pral ap i berga Sinay, ap ko dives, kay yob i Israelenge penas, te anenn le firhen o baro Debleske an o moulo tato them Sinay.