3. Mose 6 - O Debleskro Lab 2024 (Sinte-Manouche)

Kava hounte vell kerdo i firheha, koleskro tselo mass rhačedo vell

¹ Oun o baro Devel penas ap o Mose:

² Pen ap o Aron oun leskre morsh čavende: Yaake hounte krenn t'mer o firheha, koleskro tselo mass mange rhačedo vell: Ko mass ačell ap i rhačepaskri koy tseli rat, bis te vell o nevo dives. Oun koy yag ap i rhačepaskri hounte rhačell i tseli rat oun djal gar vin.

³ O rashay rivell peskro layntikro gad an, oun ninna kol layntikre rholopya. Yob lell i yagakri čik krik, hoy vell ko firhestar, koleskro tselo mass rhačedo vas. Oun yob čorell koy čik vin pash i rhačepaskri.

⁴ Palle rivell lo peskre koola vin oun vavar koola an, oun hidjrell koy yagakri čik vin dran koy platsa, kay i menshe hi, ap i platsa, hoy hi djoudjo o Debleske.

⁵ Oun koy yag ap i rhačepaskri rhačell doureder, oun djal ko tselo tsiro gar vin. Haki taysarla čivell o rashay kasht pre, oun koy pre ko mass ko firhestar, hoy vell tseles rhačedo, ninna kol kotya thulepen ko firhestar, hoy i menshe khetne rhan. Oun o rashay moukell lauter pre te rhačrell.

⁶ Koy yag ap i rhačepaskri hounte rhačell hako tsiro, oun hounte djal gar vin.

Kava hounte vell kerdo o yarreha, hoy o Debleske anlo vas

⁷ Oun yaake hounte vell kerdo o yarreha, hoy o baro Debleske dino vell. I rashaya dran o kheer Aron anenn les glan o baro Debleste pash koy rhačepaskri.

⁸ Yek lendar lell kolestar i vast pherdo yarro, kay djet dren hi, ninna ko tselo soungepaskro koova, hoy pral o yarro čiddo hi, oun moukell kova ap o Debleskri rhačepaskri pre te rhačrell. Yaake sikrell lo, te hi ko tselo rhapen o baro Debleske. Oun ko lačo soungepen, hoy vell vin, soungell mishto o baro Debleske.

^9-10 Ko yarro oun ko djet, hoy pral ačell, kova hi o Aroneske oun leskre morsh čavenge. Te krenn le pengro maro kolestar, hounte čivenn le kek shoutlo yarro dren. Ap koy platsa glan o Debleskro plarhteno kheer hounte rhan le les. Kaya hi i Debleskri platsa. Kava rhapen dell o baro Devel lenge kolestar, hoy i menshe leske anan. Kova hi i Debleskro rhapen. Doleske nay rhan les kokres i rashaya, yaake har ninna ko mass kol firhendar, hoy venn maredo, te vell i doosh oun o pale-čiddo koova krik lino, oun o mass kol firhendar, hoy venn maredo, te vell i doosh pale mishto.

¹¹ Kokres kol morsh čave, kay venn o Aronestar, nay rhan kolestar. Kova hi hako tsireske lengro kotar kolestar, hoy i menshe o baro Debleske anenna. Hako vavar, kay taprell kova an, lell peskri phagi.

¹² Oun o baro Devel penas ap o Mose:

¹³ Ap ko dives, kay vell yek dran o kheer Aron an peskri boudi dren čiddo, te vell lo miro rashay, hounte anell lo mange i khoro lačo yarro – yaake boud har ko rhapaske lino vell, hoy hako dives o baro Debleske anlo vell. Ko yek paash anell lo leske taysarlakro oun ko vavar paash rati.

¹⁴ An o sasterno čaro vell o yarro khetne kerdo o djeteha, palle peklo, an kotya phagedo oun o baro Debleske rhačedo. Oun ko lačo soungepen, hoy vell vin, soungell mishto o baro Debleske.

¹⁵ Oun ko rashay dran o kheer Aron, kay pal Aroneskro merepen o pralstouno rashay vell, kava krell kova, oun rhačrell ko tselo rhapen ap i rhačepaskri. Yaake hounte vell kava kerdo o baro Debleske hako tsireske.

¹⁶ Hako kopo, kay anell i rashay peske i rhapen dran djob o baro Debleske, hounte vell ko tselo rhapen rhačedo. Kek rhal les.

Kava hounte vell kerdo i firheha, hoy i doshake maredo vell

¹⁷ Oun o baro Devel penas ap o Moseste:

¹⁸ Pen o Aroneske oun leskre morsh čavenge, har i firheha kerdo vell, hoy i menshe o baro Debleske anenn, te vell lengri doosh krik lino. Glan o baro Debleskro kheer, ap koy platsa, kay vell ninna ko firho maredo, koleskro tselo mass rhačedo vell, ap kay platsa maress tou ninna ko firhes, hoy hounte merell, te vell i doosh krik lino. O mass sau firhestar, hoy o Debleske anlo vas, nay rhan kokres i rashaya oun kek vavar.

¹⁹ Ko rashay, kay leskre feteder kotya o Debleske rhačrell, rhal o mass ap i glanstouni platsa glan o Debleskro plarhteno kheer. Kaya hi i Debleskri platsa.

²⁰ Hako vavar, kay ko mass an-taprell, lell peskri phagi. Te vell čomone ko ratestar ap yekeskre koola, palle hounte thovell lo ko kotar ap i platsa, hoy djoudjo hi o Debleske.

²¹ Te vas ko mass keredo an i piri, hoy dran čik kerdo vas, hounte vell koy piri an kotya phagedo. Te vas ko mass an i sasterni piri keredo, palle vell li zoryah oun panyeha vin thodo.

²² I tsele morsha oun morsh čave an i rashayengre familye nay rhan kava mass. Yon kokres doleske, kay kava mass ko firhestar vas, hoy o baro Debleske anlo vas.

²³ Te vas o rat sau firhestar an o Debleskro kheer dren lino, te vell lauter pale mishto mank i menshende oun o baro Debleste, palle hounte rhal kek leskro mass. Kava mass vell an i yag rhačedo.