3. Mose 5 - O Debleskro Lab 2024 (Sinte-Manouche)

Pash savi doosh hounte vell i firho anlo o Debleske, te vell i doosh krik lino

¹ Te vell yek glan i čačepangre anlo, te penell lo, hoy lo dikas oun shounas, oun yob rikrell kova peske, oun penell či, ninna te dikas oder shounas lo, hoy koy his. Palle anas lo i doosh ap peste oun hounte hidjrell lat.

² Te taprell yek čomone an, hoy pale-čiddo hi, nay vell i moulo divyo firho, nay vell i vavar moulo firho, ninna i tikno moulo firho, hoy djal pral i phoub, palle hi lo pale-čiddo, oun anas doosh ap peste, ninna te hayvas lo gar, hoy lo kras.

³ Ninna te taprell lo ap i mensheste, kay hi pale-čiddo, hoy kova ninna hi, palle anas lo doosh ap peste, ninna te hayvas lo gar, hoy lo kras.

⁴ Te dell yek pes sovel, yaake te rakrell leskro mouy sik, oun yob hayvell pal i tsiro, hoy lo kras, – hi yek, te hi kova, hoy lo penas, lačo oder čilačo leske – palle anas lo i doosh ap peste.

⁵ Te anas yob yaake te yaake doosh ap peste, palle hounte penell lo, havo koova yob kras.

⁶ Koy doshake hounte anell lo o baro Debleske i bakri oder i bouzni, oun marell lat, te vell leskri doosh krik lino. Oun o rashay lell ko firho oun rhačrell leskro thulepen, oun yaake krell lo, te vell lauter pale mishto mank ko mensheste oun o baro Debleste.

⁷ Te hi ko morsh čorvelo oun nay anell kek bakri vitar kek bouzni, nay anell lo douy taube. Kolla nay hi douy divye taube oder douy vavar taube, yek, te vell i doosh krik lino, oun yek, hoy o baro Debleske tseles rhačedo vell.

⁸ Yob anell len pash o rashayeste. Oun kova anell glanstounes koy tauba hoy i doshake anlo vas, oun phagell lake i meen, o shero tele činell lo lake gar.

⁹ Yob vitsrell ko ratestar ap i rig foun i rhačepaskri, oun moukell o tselo vavar rat vin ratell tella pash i rhačepaskri. Yaake hounte vell i firheha kerdo, hoy maredo vell, te vell i doosh krik lino.

¹⁰ Oun koy vavar tauba rhačrell lo yaake, har o baro Devel penas, te vell kerdo i firheha, hoy tseles rhačedo vell. Yaake krell o rashay, te vell lauter pale mishto mank ko mensheste oun o baro Debleste. Oun o baro Devel bistrell koy doosh, hoy ko mensho ap peste anas.

¹¹ Te hi kova, kay doosh ap peste anas, yaake čorvelo, te nay anell lo gar douy taube, palle anell lo yek kilogrammi lačo yarro o baro Debleske, te vell leskri doosh krik lino. Yob hounte čivell kek djet pre, vitar kek soungepaskro koova. Kava hi i rhapen, hoy o Debleske anlo vell, te vell i doosh krik lino.

¹² Yob anell ko yarro pash o rashayeste, oun o rashay lell i vast pherdo, oun moukell kava ap i rhačepaskri te rhačrell o baro Debleske. Kava sikrell, kay ko tselo rhapen, hoy anlo vas, o baro Debleske hi. Kava hi i rhapen, hoy o baro Debleske anlo vell, te vell i doosh krik lino.

¹³ Yaake krell o rashay, te vell i doosh kolestar krik lino, hoy doosh ap peste anas an hako koova, kolestar kate penlo vell. Oun lauter vell pale mishto mank ko mensheste oun o baro Debleste. Oun o baro Devel bistrell leskri doosh. O yarro, hoy pral ačell, hi o rashayeske, yaake har pash o vavar rhapen dran djob, hoy o Debleske dino vas.

I firho, hoy maredo vell, te vell i doosh pale mishto

¹⁴ Oun o baro Devel penas ap o Mose:

¹⁵ Te dals yek gar o baro Debleste, hoy hounte dals lo leste, rhorhras lo o baro Debles, ninna te djinas lo kova gar. Yob hounte anell o Debleske i bakro, hoy sasto hi, te vell leskri doosh pale mishto. Kava bakro hounte vell yaake boud roupene beme moldo, har tou peneh. Yek roupeni bema hi yaake pharo har i roupeni bema an o Debleskro kheer hi.

¹⁶ Oun ninna hounte anell lo ko koova, hoy anas lo gar o baro Debleske, oun o pančto kolestar gomme pashel. Oun kova lauter dell lo o rashayeste an o vast. Oun o rashay marell ko bakro oun rhačrell leskro thulepen, te vell lauter pale mishto mank o Debleste oun o mensheste. Oun o baro Devel bistrell koy doosh.

¹⁷ Te krell yek čomone, kolestar o baro Devel penas, te krell lo les gar, anas lo i doosh ap peste, ninna te djinas lo gar, te penas o baro Devel: “Ma kre kova!”

¹⁸ Yob hounte anell o rashayeske i bakro, hoy sasto hi, te vell leskri doosh pale mishto. Kava bakro hounte vell yaake boud moldo, har tou peneh. Koleha krell o rashay, te vell lauter pale mishto mank o Debleste oun ko mensheste, kay gar djinas, kay kova, hoy lo kras, i doosh his. Oun o baro Devel bistrell leskri doosh.

¹⁹ Yaake hounte krell kova, kay kras i čilačepen ap o baro Debleste, te vell leskri doosh pale mishto.

²⁰ Oun o baro Devel penas ap o Mose:

²¹ Hakeno, kay i vavares rhorhell, krell i čilačepen ap mande, o baro Debleste. Koon penell kolestar, hoy i vavar leske patsas, oder das, te dell lo yak pre kova hi mange, kova anell doosh ap peste. Kova hi ninna yaake, te čoras yek i vavares, oder las čomone lestar rhorhepah,

²² oder hatsas čomone, hoy nashedo his, oun penell, te hatsas lo či. Oun dell pes i rhorheni sovel an kava koova oder an vavar koova, hoy i mensho lauter nay krell, koleha yob doosh ap peste lell,

²³ palle las lo doosh ap peste. Oun yob hounte dell ko koova pale, hoy lo o vavarestar rhorhepah las oun rikras,

²⁴ oder pral kova yob pes rhorhenes sovel das. Kava tselo koova hounte dell lo pale, oder yaake boud har kova moldo his, oun i pančto kolestar gomme pashel. Oun koneske kova his, koleste vell kova pale dino ap ko dives, kay yob o baro Debleske i firhes anell, te vell leskri doosh pale mishto.

²⁵ Ko firho hounte vell i bakro, hoy sasto hi, oun kolestar tou penal, har boud kova hounte moldo vell. Oun yob anell les pash o rashayeste, te vell leskri doosh pale mishto.

²⁶ Oun o rashay marell ko bakro oun rhačrell leskro thulepen, te vell lauter pale mishto glan o baro Debleste oun ko mensheste. Oun o baro Devel bistrell halauter, hoy ko mensho kras, oun koleha yob doosh ap peste anas.