3. Mose 4 - O Debleskro Lab 2024 (Sinte-Manouche)

I firho, hoy vell maredo, te vell i doosh krik lino

¹ O baro Devel rakras ap o Mose oun penas:

² Rake i Israelentsa oun pen lenge: Te kras yek čomone, hoy hounte krals lo gar, anas lo doosh ap peste, ninna te djinas yob gar, te penas o baro Devel: Ma kre kova!

³ Te hi kova o pralstouno rashay, kay rikras pes gar ap o Debleskro lab, oun anas yaake doosh ap i tsele Israelitaryen, palle lell lo i terno gouroum, hoy gar nasselo hi, oun anell les o baro Debleske, te vell leskri doosh, hoy lo ap peste anas, krik lino.

⁴ Oun yob anell ko gouroum glan o baro Debleste, pash o voudar glan o Debleskro kheer, oun čivell peskro vast ap o firheskro shero oun marell les kote glan o baro Debleste.

⁵ Oun o pralstouno rashay lell o ratestar oun hidjrell les an o plarhteno kheer.

⁶ Yob čivell peskro goushto an ko rat, oun vitsrell efta kope ko ratestar glan o layntikro kotar than, hoy hi glan o Debleskri kouč isema.

⁷ Ninna makell lo ko ratestar ap i shinga, hoy ap i star ekke o bobestar hi, kay o soungepaskro koova rhačedo vell. Ko bob hi tardo an o Debleskro plarhteno kheer. O tselo vavar rat čorell lo vin tella pash koy rhačepaskri, kay i firhe rhačedo venna. Koy rhačepaskri hi tardo vin glan o voudar o Debleskro plarhteno kherestar.

⁸ Palle činell lo o tselo thulepen dran ko firho vin: ko thulepen hoy ap oun pral i bouke hi,

⁹ kol douy nire oun ko thulepen, hoy ap lende hi, ninna ko thoullo kotar, hoy ap i lebra hi. Pash i nire hounte činell lo les tele.

¹⁰ Kava vell yaake kerdo har kova kerdo vell pash ko firheste, hoy yek glan o Debleste anell, te rhan le les khetne. Oun ko rashay rhačrell kal kotya ap o Debleskri rhačepaskri.

¹¹ Kol tsele vavar kotya ko gouroumestar, leskri hauta, leskro tselo mass, leskro shero, leskre herya, leskre bouke oun hoy koy dren hi,

¹² kova lauter hidjrell lo vin, krik dran koy platsa, kay i menshe hi. Oun anell kova ap i djoudji platsa, kote kay i yagakri čik vin čoredo vell. Kote rhačrell lo lauter an i yag dran kasht.

¹³ Te kran i tsele Israelitarya čomone, hoy gar čačo his glan o Debleskre yaka, anan le doosh ap pende, ninna te djinan le gar, te penas o baro Devel, te krenn le kova gar.

¹⁴ Te hayvenn le pal i tsiro, kay kova, hoy yon kran, gar čačo his glan o Debleskre yaka, palle hounte anenn le i terno gouroum o baro Debleske, te vell lengri doosh krik lino. Yon hounte anenn les glan o voudar o Debleskro plarhteno kherestar.

¹⁵ Oun i phoureder lendar čivenn pengre vasta ap o firheskro shero oun marenn les kote glan o baro Debleste.

¹⁶ Oun o pralstouno rashay lell o ratestar oun hidjrell les an o Debleskro plarhteno kheer.

¹⁷ Yob čivell peskro goushto an ko rat, oun vitsrell efta kope ko ratestar glan o layntikro kotar than, hoy hi glan o Debleskri kouč isema, kay o baro Devel djivell.

¹⁸ Ninna makell lo ko ratestar ap i shinga, hoy ap i star ekke o bobestar hi, kay o soungepaskro koova rhačedo vell. Ko bob hi tardo glan o baro Debleste an leskro plarhteno kheer. O tselo vavar rat čorell lo vin tella pash koy rhačepaskri, kay i firhe rhačedo venna. Koy rhačepaskri hi tardo vin glan o voudar o Debleskro plarhteno kherestar.

¹⁹ Palle činell lo o tselo thulepen dran ko firho vin oun rhačrell les ap o Debleskri rhačepaskri.

²⁰ Oun yob krell kava firheha yaake har yob kova ko firheha kras, hoy yob peskri doshake maras. Yaake krell o rashay, te vell lauter pale mishto mank i Israelitarya oun o baro Debleste. Oun o baro Devel bistrell lengri doosh.

²¹ Kova, hoy kava gouroumestar pral ačas, anell yob vin, krik dran koy platsa, kay i menshe hi, oun rhačrell les yaake har yob kova rhačras, hoy ko gouroumestar pral ačas, hoy yob peskri doshake maras. Yaake hounte vell i gouroumeha kerdo, hoy maredo vell, te vell i doosh i tsele Israelendar krik lino.

²² Te kras i pralstouno čomone, hoy hounte krals lo gar, anas lo doosh ap peste, ninna te djinas yob gar, te penas o baro Devel: Ma kre kova!

²³ Te hayvell lo pal i tsiro, kay kova, hoy lo kras, gar čačo hi glan o Debleskre yaka, palle hounte anell lo leske i morsh bouzni, hoy gar nasselo hi.

²⁴ Oun čivell peskro vast ap o firheskro shero oun marell les glan o baro Debleste, kote kay i firhe maredo venn, hoy o Debleske rhačedo venn. Yaake vell i firheha kerdo, hoy maredo vell, te vell i doosh krik lino.

²⁵ Oun o rashay lell peskro goushteha ko ratestar oun makell les ap i shinga, hoy ap i star ekke pral ap koy rhačepaskri hi, kay i firhe rhačedo venna. O tselo vavar rat čorell lo vin tella pash i rhačepaskri.

²⁶ Oun o tselo thulepen rhačrell lo ap i rhačepaskri yaake, har rhačrell lo o thulepen ko firhestar, hoy yek o Debleske anell, te rhan le les khetne glan leste. Yaake krell o rashay, te vell lauter pale mishto mank o pralstuneste oun o baro Debleste. Oun o baro Devel bistrell leskri doosh.

²⁷ Te kras yek i Israelendar čomone, hoy hounte krals lo gar, anas lo doosh ap peste, ninna te djinas yob gar, te penas o baro Devel: Ma kre kova!

²⁸ Te hayvell lo pal i tsiro, kay kova hoy lo kras, gar čačo hi glan o Debleskre yaka, palle hounte anell lo leske i bouzni, hoy gar nasselo hi. Kova hounte krell lo, te vell leskri doosh krik lino.

²⁹ Oun yob hounte čivell peskro vast ap o firheskro shero oun marell les kote kay i firhe maredo venn, hoy rhačedo venn o Debleske.

³⁰ Oun o rashay lell peskro goushteha ko ratestar oun makell les ap i shinga, hoy ap i star ekke pral ap koy rhačepaskri hi, kay i firhe rhačedo venna. O tselo vavar rat čorell lo vin tella pash i rhačepaskri.

³¹ Oun o tselo thulepen činell lo tele, yaake har činell lo o thulepen tele ko firhestar, hoy yek o Debleske anell, te rhan le les khetne glan leste. Oun ko rashay rhačrell kal thoulle kotya ap o Debleskri rhačepaskri, te vell i lačo soungepen vin, hoy baro Debleske mishto soungella. Yaake krell o rashay, te vell lauter pale mishto mank ko mensheste oun o baro Debleste. Oun o baro Devel bistrell leskri doosh.

³² Te kamell yek i bakro o Debleske te anell, te vell leskri doosh krik lino, palle anell lo i bakri, hoy gar nasselo hi,

³³ oun čivell peskro vast ap o firheskro shero, oun marell les kote, kay i firhe maredo venn, hoy o Debleske rhačedo venn. Kova hounte krell lo, te vell leskri doosh krik lino.

³⁴ Oun o rashay lell peskro goushteha ko ratestar oun makell les ap i shinga, hoy ap i star ekke pral ap koy rhačepaskri hi, kay i firhe rhačedo venna. O tselo vavar rat čorell lo vin tella pash i rhačepaskri.

³⁵ Oun o tselo thulepen činell lo tele yaake har činell lo o thulepen tele ko bakrestar, hoy yek o Debleske anell, te rhan le les khetne glan leste. Oun ko rashay rhačrell kal thoulle kotya ap o Debleskri rhačepaskri khetne ko vavar masseha, hoy o baro Debleske rhačedo vell. Yaake krell o rashay, te vell lauter pale mishto mank o baro Debleste oun ko mensheste, kay doosh ap peste anas. Oun o baro Devel bistrell leskri doosh.