3. Mose 3 - O Debleskro Lab 2024 (Sinte-Manouche)

I firho, hoy i menshe khetne rhan glan o Debleste

¹ Te kamell yek o baro Debleske i groumyat te anell, hoy rhan i menshe khetne glan leste, palle nay vell ko firho i morsh groumni har ninna i djouvel groumni. Kava firho hounte vell gar nasselo.

² Yob čivell peskro vast ap o firheskro shero oun marell les glan o voudar o Debleskro plarhteno kherestar. Oun i rashaya dran o kheer Aron lenn o rat oun čorenn les troul o Debleskri rhačepaskri ap leskre star rigya.

³ I feteder kotya o firhestar venn rhačedo o baro Debleske. Kal kotya hi: o thulepen, hoy ap oun pral i bouke hi,

⁴ kol douy nire oun ko thulepen, hoy ap lende hi, ninna ko thoullo kotar, hoy ap i lebra hi. Pash i nire hounte vell lo tele činlo.

⁵ Oun i rashaya dran o kheer Aron rhačrenn kova lauter ap o Debleskri rhačepaskri, ap ko kasht, hoy pral i yag hi. Yon rhačrenn kova khetne ko vavar firheha, hoy vell o Debleske tseles rhačedo. Oun o soungepen, hoy vell vin, soungell mishto o baro Debleske.

⁶ Te kamell yek o baro Debleske i bakro oder i bouzni te anell, hoy rhan i menshe khetne glan leste, palle nay vell ko firho i morshengro firho har ninna i djouvyengro firho. Kava firho hounte vell sasto.

⁷ Te kamell lo i bakro te anell glan o baro Debleste,

⁸ palle čivell yob peskro vast ap leskro shero oun marell les glan o Debleskro plarhteno kheer. Oun i rashaya lenn o rat oun čorenn les troul o Debleskri rhačepaskri vin.

⁹ I feteder kotya o firhestar venn rhačedo o baro Debleske. Kal kotya hi: o thulepen, i thoulli pori, tele činlo pash o palstouno kokalo, ninna ko thulepen ap oun pral i bouke,

¹⁰ kol douy nire, oun ko thulepen, hoy ap lende hi, ninna ko thoullo kotar ap i lebra. Pash i nire hounte vell lo tele činlo.

¹¹ Oun o rashay rhačrell kova lauter ap o Debleskri rhačepaskri. Kolla hi kol kotya o firhestar, hoy o baro Debleske hi.

¹² Te kamell lo i bouzni te anell glan o baro Debleste,

¹³ palle čivell yob peskro vast ap lakro shero oun marell lat glan o Debleskro plarhteno kheer. Oun i rashaya lenn o rat oun čorenn les troul o Debleskri rhačepaskri ap leskre star rigya.

¹⁴ I feteder kotya o firhestar venn rhačedo o baro Debleske. Kal kotya hi: o thulepen, hoy ap oun pral i bouke hi,

¹⁵ kol douy nire, oun ko thulepen, hoy ap lende hi, ninna ko thoullo kotar ap i lebra. Pash i nire hounte vell lo tele činlo.

¹⁶ Oun o rashay rhačrell kova lauter ap o Debleskri rhačepaskri. Kolla hi kol kotya o firhestar, hoy o baro Debleske hi. Oun o soungepen, hoy vell vin, soungell leske mishto. O tselo thulepen hi o baro Debleske.

¹⁷ Kek t'mendar hounte rhal o thulepen oun o rat. Ap kova hounte rikrenn t'men oun t'mare čave kanna oun hako tsiro, kay t'mer ninna djivenna.