3. Mose 27 - O Debleskro Lab 2024 (Sinte-Manouche)

Har čomone nay vell palpale ginlo

¹ O baro Devel penas ap o Mose:

² Pen ap i Israelitarya: Te das yek pes sovel, te dell lo man, o baro Debleste, i menshes, palle nay ginell lo koles pale vin.

³ I morsheske, kay mashkral 20 (biish) bersha oun 60 (shob-deesh) bersha hi, koleske playsrell lo i 50 (paash-sheel) roupene beme. Yek bema hounte vell yaake pharo har i roupeni bema an o Debleskro kheer pharo hi.

⁴ I djouvyake venn 30 (triyanda) roupene beme playsedo.

⁵ I čaveske mashkral 5 (panč) oun 20 (biish) bersha venn 20 (biish) roupene beme playsedo, i čake an o emligo phourepen 10 (deesh) roupene beme.

⁶ I tikno čaveske mank yek čon oun panč bersha venn panč roupene beme playsedo, oun i čake triin roupene beme.

⁷ I morsheske, kay 60 (shob-deesh) bersha hi oun pral shob-deesh, venn 15 (deesh-te-panč) roupene beme playsedo, oun i djouvyake 10 (deesh) roupene beme.

⁸ Te hi kova, kay pes sovel das, yaake čorvelo, te nay anell leskro vast kova gar khetne, palle anell lo ko menshes pash o rashayeste. Oun ko rashay dikell peske koles an, oun penell har boud love leske playsedo hounte venn, pal kova hoy kova nay dell, kay pes sovel das.

⁹ Te das yek pes sovel, te dell lo o baro Debleste i firhes, savo firhes, hoy nay vell leske maredo oun rhačedo, hi ko firho o baro Debleske.

¹⁰ Yob parell les gar vin, oun dell kek vavar firho koleske, kek lačo firho i djoungelo firheske, vitar kek djoungelo firho i lačo firheske. Te parell yek sau firhes i vavar firheske, palle venn kol douy firhe o baro Debleske.

¹¹ Te das yek pes sovel, te dell lo o baro Debleske i firhes, hoy pale-čiddo hi, hoy nay vell gar maredo oun leske rhačedo, palle anell lo ko firhes glan o rashayeste.

¹² O rashay dikell peske ko firhes an, oun dikell, hoy lačo oun hoy čilačo ap leste hi, oun penell, har boud ko firho moldo hi. Yaake har o rashay penell, yaake vell.

¹³ Te kamell yek ko firhes palpale te ginell, palle dell lo ko pančto kolestar pashel, hoy o rashay penas.

¹⁴ Te das yek pes sovel, te dell lo peskro kheer o baro Debleste, palle dikell o rashay les peske an, oun dikell, hoy lačo oun hoy čilačo ap leste hi, oun penell, har boud kova moldo hi. Yaake har ko rashay penell, yaake vell.

¹⁵ Te kamell kova, koleske ko kheer his, peskro kheer pale vin te ginell, palle dell lo pash kova hoy o rashay penas, o pančto kotar pashel. Palle vell ko kheer pale leskro.

¹⁶ Te das yek pes sovel, te dell lo i kotar phoub o baro Debleste, palle vell diklo, har boud djob ap ko kotar phoub vin vitsedo vell. Hi kova yek gono djob, palle hi ko kotar phoub 50 (paash-sheel) roupene beme moldo.

¹⁷ Te kamell lo ko kotar phoub o Debleske te dell an ko ersto bersh pal ko bersh, kay i tseli siyaan mouklo vas, ačell kova pash kol 50 roupene beme.

¹⁸ Te kamell lo les i tsiro pal kova te dell, palle dikell o rashay pal, har boud bersha trouyel hi, bis te vell ko bersh, kay i siyaan mouklo vell. Oun kal bersha venn tele tserdedo.

¹⁹ Te kamell kova, kay ko kotar phoub o baro Debleste das, ko kotar palpale ginell, palle dell lo kova, hoy koy phoub moldo hi, oun o pančto kotar pashel. Palle vell li pale leskri.

²⁰ Te ginas lo koy phoub gar tele o baro Deblestar, oun bikrell lat ap i vavareske, palle nay vell ko kotar phoub gar bouder vin ginlo.

²¹ An ko tsiro, kay vell i siyaan mouklo, ačell ko kotar phoub o baro Debleske. Oun o rashay lell les.

²² Te das yek pes sovel, te dell lo o baro Debleste i kotar phoub, hoy ginas lo, oun hoy las lo gar peskro dadestar pral leskro merepen,

²³ palle dikell o rashay har boud ko kotar phoub moldo hi, bis te vell ko bersh, kay i siyaan mouklo vell. Oun kal love playsrell ko morsh gomme kava dives. Kal love hi o baro Debleske.

²⁴ An ko bersh, kay i siyaan mouklo vell, djal ko kotar phoub palpale ap koleste, konestar yob les ginas, koleskri familyake koy phoub hi.

²⁵ Kol roupene beme hoy playsedo venn, te vell čomone pale ginlo, hounte venn yaake pharo har i roupene beme an o Debleskro kheer pharo hi. Yek roupeni bema hi 12 (deesh-te-douy gramme) pharo.

²⁶ I firho, hoy o phoureder leskri datar hi, kova hi o baro Debleske. Te hi savo firho i gouroum, i bakro, i morsh bouzni, nay lell les kek mensho, te dell lo les o baro Debleske. Leskro hi lo.

²⁷ Te hi ko firho kol firhendar, kay pale-čiddo hi, palle ginell les peskro ray pale, pal kova hoy o rashay penell, te hi ko firho moldo. Oun yob dell o pančto kotar gomme pashel. Te vell ko firho gar vin ginlo, palle vell lo kol lovenge, hoy o rashay penas, bikedo.

²⁸ Halauter, hoy das yek kolestar, hoy leskro hi, te vell kova hako tsireske o baro Debleske, nay vell gar bikedo, vitar gar pale ginlo – nay vell i mensho, i firho oder i kotar phoub. Kova hoy o baro Debleske hako tsireske dino vas, čačepah, kova ačell leske.

²⁹ Te hi kova i mensho, nay vell lo gar vin ginlo. Yob hounte vell maredo.

³⁰ O deshto kotar halauterestar, hoy baro vas ap i harhetikri phoub oun ap i rouka, hi o baro Debleske, oun hounte vell leske anlo.

³¹ Te kamell yek kova te rikrell, hounte playsrell lo les, oun dell o pančto kotar pashel.

^32-33 Ninna i groumyendar, i bakrendar oun i bouzyendar hi hako deshto firho o baro Debleske. Kek dikell palla, hi ko firho lačo, hi lo gar lačo. Vitar gar vell i firho vin paredo. Yaake har djan le glan o bakrengro koy, yaake lell lo hako deshto ap i rig. Te parell lo yekes vin, hi kol douy firhe o baro Debleske, oun nay venn gar vin ginlo.

³⁴ Kava hi kol laba, hoy penas o baro Devel o Moseske, har his lo ap i berga Sinay, te rikrenn pen i Israelitarya ap lende.