3. Mose 25 - O Debleskro Lab 2024 (Sinte-Manouche)

O Debleskro bersh, kay lell i harhetikri phoub pale nevi zoor

¹ O baro Devel penas ap o Mose ap i berga Sinay:

² Pen ap i Israelitarya: Te venn t'mer an ko them, hoy me t'men dau, palle te vell ko themes hako eftato bersh i Debleskro bersh, kay vitsrenn či an i phoub dren, te vell kova baro. Krenn kova yaake, te sharenn man!

³ Shob bersha vitsress djob an i phoub, oun činess tire drakengre rouka, oun aness dren, hoy moukas o them touke bares te vell.

⁴ O eftato bersh hi i Debleskro bersh, kay i phoub nay lell nevi zoor. Kava bersh hi o baro Debleske. Ap tiro kotar phoub vitsress či vin, oun činess gar tire drakengre rouka.

⁵ Kova, hoy pre djal ap tiro kotar phoub, aness gar dren. I drake hoy venn, kay tou kol rouka gar činal, činess gar tele. Koy phoub hounte lell pale nevi zoor.

⁶ Hakeno t'mendar nay lell khetne, hoy lo hatsell ap o them: t'mer oun t'mare boudepangre, morsha har djouvya, ninna kolla, kay boudrenn hako kopo yek dives pash t'mende, oun kolla, kay yek tsiro pash t'mende djivenn.

⁷ Ninna t'mare firhe oun kol divye firhe, kay an o them djivenn, kolla nay rhan kolestar, hoy an ko bersh pestar bares vas.

O Debleskro bersh, kay i tseli siyaan mouklo vell

⁸ Ap ko tsiro, kay rikran efta kope ko Debleskro bersh dren, kova hi pal 49 (star-deesh-te-enya) bersha,

⁹ moukenn an o 50. (paash-sheelto) bersh, an o eftato čon, ap o deshto dives an i phourdepaskri te phourdell an o tselo them. Kova hi o dives, kay halauter krik lino vell, hoy mank t'mende oun o baro Debleste tardo hi.

¹⁰ O 50. (paash-sheelto) bersh hi o baro Debleske. An kava bersh denn vin gole, te vell hakeneske, kay an ko them djivell, peskri siyaan mouklo. Oun te his leskri siyaan yaake baro, te bikras pes lo ap i vavareske, hounte moukell kova les pale te djal. Hakeno t'mendar lell kova pale, hoy leskro his, oun nay djal khere pash peskre menshende.

¹¹ An kava 50. (paash-sheelto) bersh hounte vell i tseli siyaan mouklo. Vitsrenn kek djob an i phoub, oun činenn kek djob tele, hoy pestar dran i phoub vas. Činenn vitar kek drake tele, hoy van bares an kava bersh, kay t'mer kol rouka gar činan.

¹² An kava tselo bersh hounte vell kek boudi kerdo ap t'mari kotar phoub. Hakeno nay rhal kova, hoy hatsell lo, kova hoy pestar bares vas.

¹³ An ko bersh, kay i tseli siyaan mouklo vell, lell hakeno peskri phoub pale, hoy leskro his.

¹⁴ Te bikreh i kotar phoub ap i vavar Israelitari, oder te gineh lestar i kotar phoub, palle dess les gar pal o kand!

¹⁵ Kova, hoy tou leske playsreh oder yob touke playsrell, hounte djal pal kol bersha, hoy venna, bis te vell ko bersh, kay i tseli siyaan mouklo vell. Kol love djal pal kova, kitse bersha nay anell o ginepaskro kova dren, hoy ap ko kotar phoub bares vell.

¹⁶ Ačenn boud bersha, palle hounte vell boudeder playsedo har te ačenn gar boud bersha. Playssedo venn kol bersha, kay djob nay dren anlo vell, oun gar ko kotar phoub.

¹⁷ Kek te dell o vavares pal o kand! Rikrenn t'menge t'maro Debles glan i yaka pash halauter, hoy krenn! Me, o baro Devel, hom t'maro Devel.

¹⁸ Doleske krenn, hoy t'mendar kamau, oun djivenn pal miro čačepen! Palle nay djivenn t'mer an kava them kek daryah.

¹⁹ Oun o them anell t'menge yaake boud vin, te hi t'men doha rhapaske. Oun t'mer nay djivenn an kava them, oun t'men hounte vell kek daar.

²⁰ Te poučenn: “Hoy rhas an ko eftato bersh? Te vitsrah či ap i phoub vin, nay anah ninna či dren.”

²¹ Palle penau me: Me čivau miri barht ap t'mari phoub an o shobto bersh, te anell i phoub yaake boud djob vin, te rikrell kova triin bersha.

²² Te vitsrenn t'mer palle an o orhtato bersh djob vin ap t'mari phoub, palle hi t'men gomme doha te rhal kolestar, hoy an o shobto bersh dren anan. Oun t'men hi doha, bis te lenn o nevo djob dren.

²³ Ma bikrenn ko them yaake, te vell kova hako tsireske i vavareske! Ko them hi mange. Oun t'mer han har vi-themarya, kay moukau pash mande te djivell.

²⁴ Te bikrenn i kotar them, palle krenn kova yaake, te nay vell ko them palpale ginlo.

I bikedo kotar them vell palpale ginlo

²⁵ Te vas tiro phraal – i vavar Israelitari – čorvelo oun hounte bikrell i kotar leskri phoubyatar, palle hounte ginell les yek dran leskri familya pale.

²⁶ Te hi les kek, kay ko kotar phoub nay pale ginell, oun leskro vast anell doha love khetne, te nay ginell yob kokres les pale,

²⁷ palle playsrell lo yaake boud, har an kol bersha dren anlo vals, kay ačenn, bis te vell ko bersh, kay i tseli siyaan mouklo hounte vell. Yaake vell ko kotar phoub pale leskro.

²⁸ Te anell leskro vast kova gar khetne, hoy yob hounte pale playsrell, palle ačell ko kotar phoub an o vast kolestar, kay les ginas. An ko bersh, kay i tseli siyaan mouklo vell, lell les kova pale, koleske ko kotar phoub his.

²⁹ Te bikrell yek i kheer an i foro, kay i massouri troul ko foro hi, palle vell les i tselo bersh, te nay ginell lo les pale vin.

³⁰ Te vell ko kheer gar vin ginlo, oun ko bersh hi trouyel, palle rikrell les o ginepaskro oun kolla, kay pal leste venna hako tsireske. Kava kheer vell gar pale dino koleske kova his, an ko bersh, kay i siyaan mouklo vell.

³¹ Hi vavarčandes, te hi ko kheer an i gab tardo, kay kek massouri trouyel hi. Palle hi ko kheer har i kotar phoub. Ko kheer nay vell vin ginlo, oun palpale dino an o bersh, kay i siyaan mouklo vell.

³² An kol forya, kolen i Levitarya hi, nay ginenn kolla hako tsiro lengre khera pale.

³³ Te ginell yek lendar peskro kheer gar pale, vell ko kheer leske pale dino an ko bersh, kay i siyaan mouklo vell. I khera, kolen i Levitarya hi an i forya, hoy lenge dino van an o them Israel, kol forya ačenn lengre.

³⁴ Ninna ko them glan i forya, kay i firhe rhan, vell nay gar bikedo. Kova hi lenge hako tsireske.

Hoy te kress, te vell i Israelitari čorvelo

³⁵ Te vell tiro phraal čorvelo, oun nay rikrell gar, hoy leskro hi, palle vess ap leskri rig. Mouk les pash toute te djivell, har te vals lo i vi-themari oder yek, kay i tsiro pash toute boudrell.

³⁶ Te patseh leske love, pouč gar boudeder love pale. Rike touke o baro Debles glan i yaka, oun kre, te nay djivell tiro phraal pash t'mende!

³⁷ Tou poučess lestar gar boudeder love pale, har tou leste dal, vitar gar boudeder rhapen har tou leske patsal.

³⁸ Me, o baro Devel, hom t'maro Devel, oun anom t'men dran o them Egiptia vin, te dap t'men o them Kanaan, te vap t'maro Devel.

³⁹ Te vell tiro phraal yaake čorvelo, te bikrell lo pes ap toute, palle moukess les gar kova te krell, hoy i ginlo boudepaskro hounte krell.

⁴⁰ Yob te vell touke har yek, kay boudrell pash toute oun vell haki rat playsedo. Har yek, kay yek tsiro pash toute djivell oun boudrell, ačell lo pash toute, bis te vell ko bersh, kay i tseli siyaan mouklo vell.

⁴¹ Palle moukess les tou pale djal, ninna leskre čave leha, te nay djan le pale pash lengre menshende oun pash lengro kotar phoub, hoy yon lengre phourendar lan.

⁴² I tsele Israelitarya hi mire boudepangre, kolen me dran o them Egiptia vin anom. Yon nay venn gar bikedo, te venn le ginle boudepangre.

⁴³ Tou vess gar zoryah ray pral lende! Rike tiro Debles glan tire yaka!

⁴⁴ Te kameh touke boudepangre te ginell, morsha oun djouvya, palle gin len kol vavar menshendar, kay an i themma troul t'mende djivenna,

⁴⁵ ninna foun kol vi-themarya, kay pash t'mende djivenn. Len oun lengre čaven, kay an t'maro them boldo van, nay ginenn t'menge, te venn le t'mare boudepangre.

⁴⁶ Kolen nay denn ap t'mare čavende doureder, te venn le lengro pal t'maro merepen. Yon ačenn lengre ginle boudepangre yaake rah har djivenn le. Tire phrala, kol vavar Israelitarya, pral kolende hounte vess gar zoryah ray.

⁴⁷ Te vell yaake, kay vell i vi-themari, kay pash t'mende djivell, bravelo, ninna yek, kay i tsiro pash t'mende djivell. Oun tiro phraal, i vavar Israelitari, vell čorvelo, oun bikrell pes ap ko braveleste oder leskre čavende,

⁴⁸ palle hounte vell yaake, te nay ginell les yek pale. Leskro phraal,

⁴⁹ leskro kak, koleskro čavo oder i vavar dran leskri familya ginell les vin. Te nay anell lo kokres yaake boud love khetne, palle ginell lo pes kokres vin.

⁵⁰ Oun khetne koleha, kay ginas les, dikell lo palla, kitse bersha yob leske boudras oun kitse bersha ačenn, bis te vell ko bersh, kay i tseli siyaan mouklo vell. Ko tsiro, hoy yob pash koleste boudras, vell tele tserdedo. Kol bershenge, kay ačenn pral, hounte playsrell lo yaake boud, har yekeske playsedo vell, kay haki rat peskri boudjake playsedo vell.

^51-52 Te hi gomme boud bersha, bis te vell ko bersh, kay i tseli siyaan mouklo vell, hounte playsrell lo boudeder, har te ačenn gar boud bersha pral.

⁵³ Leskro ray hounte djal leha trouyel, har te vals lo i boudepaskro, kay haki rat playsedo vell. Denn yak, te krell lo leha gar, har te vals lo leskro ginlo boudepaskro.

⁵⁴ Nay ginell kek les vin, hounte vell yob peskre čaventsa vin mouklo an ko bersh, kay i tseli siyaan mouklo vell.

⁵⁵ T'mer Israelitarya han mange. Mire boudepangre han t'mer, kolen anom me dran o them Egiptia vin. Me, o baro Devel hom t'maro Devel.