3. Mose 23 - O Debleskro Lab 2024 (Sinte-Manouche)

Bare divessa pash i Israelitarya, kay rikrenn le dren o baro Debleske

¹ O baro Devel penas ap o Mose:

² Pen ap i Israelitarya: Kalla hi i bare divessa, kay venn t'mer khetne, te vell o baro Devel sharedo.

O Debleskro dives

³ Rikrenn o Debleskro dives! Shob divessa boudrenn, ap o eftato dives krenn kek boudi! Ko dives hi o baro Debleske. Ap leste avenn khetne glan leste! Ap kava dives krenn kek boudi, kay t'mer ninna djivenna!

O baro dives, hoy kharell Passa, oun kol divessa, kay rhan le kek shoutlo maro

⁴ Kalla hi i bare divessa, kay venn t'mer khetne, te vell o baro Devel sharedo. Denn kal divessa vin gole ap pengro tsiro.

⁵ Ap o 14. (deesh-te-starto) dives an o ersto čon, har o kham tele djas, vell ko dives, hoy hi o baro Debleske. Kava dives kharell Passa.

⁶ Oun o 15. (deesh-te-pančto) dives ninna an ko čon, hi ko ersto dives kol divessa, kay hounte rhan kek maro dran shoutlo yarro. Efta divessa rhan t'mer kek maro, an koleste shoutlo yarro hi.

⁷ Ap o ersto dives hounte venn khetne glan o baro Debleste. Kek hounte boudrell ap ko dives.

⁸ Efta divessa rhačrenn firhen o baro Debleske. Ap o eftato dives hounte venn pale khetne, te vell o baro Devel sharedo. Ap ko dives hounte krenn vitar kek boudi.

O dives, kay o nevo djob o Debleske anlo vell

⁹ O baro Devel penas ap o Mose:

¹⁰ Pen ap i Israelitarya: Te venn an ko them, hoy me t'men dau, oun t'mer činenn o nevo djob tele oun pandenn les khetne, palle anenn ko ersto pandepen nevo djob glan o rashayeste.

¹¹ Yob hadell kova pre glan o baro Debleste, te sikrell lo, kay kova o Debleske hi. Palle dikell o baro Devel lačes ap t'mende. Kova krell o rashay ap o dives pal o Debleskro dives.

¹² Ap ko dives, kay hadell o rashay t'maro nevo djob pre glan o Debleste, hounte anenn t'mer i terno bakro, hoy yek bersh phouro hi oun sasto hi, te vell lo rhačedo o baro Debleske.

¹³ Koy pashel anenn glan leste douy-te-paash kilogramme lačo yarro, kay djet dren hi. Kava rhapen vell leske rhačedo. Oun ko lačo soungepen, hoy vell vin, soungella mishto o baro Debleske. Koy pashel anenn yek litari mool, hoy vell vin čoredo glan leste.

¹⁴ Rhan kek maro dran o nevo djob, vitar gar peklo djob oder terno djob, bis te anan t'maro Debleske leskro kotar kolestar. Kava lab hi t'menge oun t'mare čavenge, kay pal t'mende venna, kanna oun hako tsireske, kay t'mer ninna djivenna.

Kol bare divessa, hoy kharenna Fingsta

¹⁵ Efta tsele kourke pal ko Debleskro dives, kay anas o rashay t'maro nevo djob o baro Debleske,

¹⁶ ap ko dives pal o eftato Debleskro dives – kova hi o 50. (paash-sheelto) dives – anenn t'mer i nevo rhapen o baro Debleske.

¹⁷ Haki familya anell douy mare, hakeno kerdo dran douy-te-paash kilogramme lačo yarro. Kol douy mare hadell o rashay pre glan o baro Debleste, te sikrell lo, kay kolla leske hi. Kal mare hi peklo yarreha, kay shoutlo yarro dren hi. Kal mare, hoy o baro Debleske anlo venn, hounte venn kerdo dran nevo gib.

¹⁸ Pash ko maro anenn t'mer efta bakre, yek bersh phouro oun sasto, ninna yek terno gouroum oun douy morsh bakre. Kolla venn maredo oun rhačedo o baro Debleske. Khetne lentsa vell leske o rhapen dran yarro rhačedo, oun i mool glan leste vin čoredo. Oun ko lačo soungepen, hoy vell vin, soungella mishto o baro Debleske.

¹⁹ Koy pashel anenn leske i morsh bouzni, te vell t'mari doosh oun t'maro pale-čiddo koova krik lino. Marenn ninna douy bakre, hoy yek bersh phouro hi, te rhan len khetne glan o baro Debleste.

²⁰ O rashay hadell kolen pre glan o baro Debleste, ninna kol mare dran o nevo yarro, te sikrell lo, kay yon o baro Debleske hi. Oun i rashaya nay rhan kova.

²¹ Denn vin gole, te venn khetne ap kava dives o baro Debleske. Kek boudi hounte krenn t'mer ap ko dives. Kava lab hi t'menge oun t'mare čavenge, kay pal t'mende venna, kanna oun hako tsireske, kay t'mer ninna djivenna.

²² An ko tsiro, kay činenn o djob tele, hoy ap t'maro kotar phoub bares vas, moukenn čomone ap i rigya tardo. Ma djan vitar gar i douyto kopo pral ko kotar phoub, te hadenn kova pre, hoy tele peras. Moukenn kova i čorvelenge oun kolenge dran i vi-them! Me, o baro Devel, hom t'maro Devel.

O phourdepangro dives

²³ O baro Devel penas ap o Mose:

²⁴ Pen ap i Israelitarya: Ko ersto dives an o eftato čon hounte vell t'men savo dives, kay boudrenn gar. Ap ko dives phourdenn an i phourdepangre, oun avenn khetne glan o baro Debleste.

²⁵ Krenn kek boudi, oun anenn o baro Debleske firhen oun rhapen, hoy vell leske rhačedo ap leskri rhačepaskri.

O dives, kay vell halauter krik lino, hoy mank i menshende oun lengro Debleste tardo hi

²⁶ O baro Devel rakras o Moseha oun moukas les i Israelenge te penell:

²⁷ O deshto dives an kava eftato čon hi o dives, kay vell halauter krik lino, hoy mank t'mende oun o baro Debleste tardo hi. Ap ko dives rhan či oun avenn khetne glan leste oun anenn leske firhen oun rhapen, hoy venn leske rhačedo.

²⁸ Kek boudi krenn ap ko dives! Kava dives hi o dives, kay vell halauter krik lino, hoy mank t'mende oun t'maro baro Debleste tardo hi.

²⁹ Hakeno, koon rikrell pes gar pale o rhapastar, kova vell pale-čiddo hako tsireske, oun nay djivell bouder gar mank peskre menshende.

³⁰ Oun hakeno, kay boudrell ap ko dives, koles moukell o baro Devel te merell.

³¹ Doleske, krenn kek boudi! Kava lab hi t'menge oun t'mare čavenge, kay pal t'mende venna, kanna oun hako tsireske, kay t'mer ninna djivenna.

³² Kava dives hi i baro dives t'menge, kay hounte krenn kek boudi, oun rhan či foun rati ap o enyato dives bis te vell pale rati ap o vavar dives.

I divessa, kay djivenn i Israelitarya an patyengre khera

³³ O baro Devel penas ap o Mose:

³⁴ Pen ap i Israelitarya: An o eftato čon hi kol bare divessa, kay djivenn t'mer an patyengre khera efta divessa, te vell o baro Devel sharedo. Ko ersto dives hi o 15. (deesh-te-pančto) dives an kava čon.

³⁵ Ap kava dives avenn khetne glan o baro Debleste! Kek boudi hounte krenn t'mer.

³⁶ Efta divessa anenn firhen o baro Debleske, te venn le leske maredo oun rhačedo. Ap o orhtato dives avenn pale khetne glan o baro Debleste, oun marenn oun rhačrenn firhen leske. An kal bare divessa venn t'mer khetne o baro Debleske, oun hounte krenn kek boudi.

³⁷ Kalla hi kol bare divessa, kay hounte venn t'mer khetne glan o baro Debleste, te anenn leske firhen oun rhapen, yaake har hako diveske glan činlo hi: save firhe, kay tseles rhačedo venn, oun save, kolen rhan t'mer khetne glan o baro Debleste, ninna rhapen dran djob, oun mool, hoy glan leste vin čoredo vell.

³⁸ Ninna rikrenn t'mer hako kourko o Debleskro dives dren! Oun anenn o baro Debleske ko vavar koova, hoy glan činlo hi, oun kova, hoy t'mer t'mendar denn, oun kova, hoy t'mer sovel dan, leske te dell.

³⁹ Ap o 15. (deesh-te-pančto) dives an o eftato čon, an ko tsiro, har anan halauter dren, hoy ap t'mari phoub bares vas, krenn efta divessa i festo o baro Debleske. O ersto dives oun o orhtato dives hi i dives, kay krenn kek boudi.

⁴⁰ Ap o ersto dives lenn shoukar roukengre, hoy ap i rouka bares van, ninna palmtikre patria, pappeltikre kashta pengre patyentsa oun vavar kashta boud patyentsa, oun avenn efta divessa barhteles glan t'maro baro Debleste.

⁴¹ Krenn kova leske hako bersh efta divessa an o eftato čon. Kava lab hi t'menge oun t'mare čavenge, kay pal t'mende venna, kanna oun hako tsireske.

⁴² Djivenn an ko tsiro an patyengre khera, hakeno, kay an o them Israel djivell.

⁴³ Krenn kova yaake, te djinenn t'mare čave, te moukom me, o baro Devel, i Israelitaryen an patyengre khera te djivell, har anom len vin dran o them Egiptia. Me, o baro Devel, hom t'maro Devel.

⁴⁴ Kal tsele laba penas o Mose i Israelenge, te djinenn le har te rikrenn le kol bare divessa dren, te vell o baro Devel sharedo.