3. Mose 22 - O Debleskro Lab 2024 (Sinte-Manouche)

Koon nay rhal kolestar, hoy o Debleske anlo vell?

¹ O baro Devel penas ap o Mose:

² Pen ap o Aron oun ap leskre morsh čavende, te djan le mishto trouyel ko koveha, hoy i Israelitarya mange anenn, te anenn le kek ladj ap mande. Me hom o baro Devel.

³ Pen lenge: Kava lab hi hakeneske t'mare morsh čavendar, kay pal t'mende venna: Hakeno lendar, koles i pale-čiddo koova ap leste hi, oun kay vell pash kova, hoy anan i Israelitarya mange, o baro Debleske, kova nay ačell bouder gar miro rashay. Me hom o baro Devel.

⁴ Kones o Aroneskre čavendar i djoungelo nasslepen ap peskri hauta hi, oder koleske čomone dran leskro morshkano mass nashell, kova te rhal gar foun ko rhapen, hoy mange anlo vas, bis te hi lo pale erligo. Hako rashay, koon yekes an tapras, kay kras pes i mouleha pale-čiddo, oder koleske yek tele djas,

^5-6 kova vell pale-čiddo, bis te vell rati. Kova hi ninna yaake, te tapras lo i tikno pale-čiddo firhes an, hoy djal pral i phoub, oder i menshes, kay pale-čiddo hi, hoy kova ninna hi. Savo ačell pale-čiddo, bis te vell rati, oun nay rhal gar foun ko rhapen, hoy o baro Debleske anlo vell, bis te thovas lo pes.

⁷ Te djas o kham tele, palle hi lo pale erligo, oun nay rhal foun ko rhapen, hoy o Debleske anlo vas. Kova hi kova, kolestar yob djivell.

⁸ I moulo oun khetne dandedo firhes rhal lo gar, te krell lo pes koleha gar pale-čiddo. Me hom o baro Devel.

⁹ I rashaya hounte rikrenn halauter, hoy lenge penom, te lenn le kek doosh ap pende, oun merenn doleske, kay djan le gar o Debleskro koova yaake trouyel, har hounte krans le. Me hom o baro Devel, oun rodom len vin, te venn le mire rashaya.

¹⁰ Kek vavar rhal foun ko rhapen, hoy mange anlo vell, vitar gar kova, kay yek tsiro pash o rashayeste djivell, oder kova, kay i dives pash o rashayeste boudrell oun lestar playsedo vell.

¹¹ I boudepaskro, koles o rashay peskre loventsa ginas, kova nay rhal kolestar. Ninna i boudepaskres, kay an leskro kheer boldo vas, kova nay rhal foun ko rhapen.

¹² Te vell o rashayeskri čay i romni i morshestar, kay kek rashay hi, palle rhal li gar bouder foun ko rhapen, hoy glan o baro Debleske anlo vas.

¹³ Te meras lakro rom oder moukas lat, oun lat hi kek čave, oun yoy djal pale an peskro dadeskro kheer, palle nay rhal li foun peskro dadeskro rhapen yaake har kras li, har li terni his. Kokres kolla dran o rashayeskri familya nay rhan foun ko rhapen, hoy o baro Debleske anlo vas.

¹⁴ Te rhas i vavar kolestar, hoy i rashayeske hi, oun djinas kova gar, hounte dell lo ko rhapen o rashayeste pale, oun gomme o pančto kotar pashel.

¹⁵ I rashaya hounte moukenn kek vavares kolestar te rhal, hoy mange, o baro Debleske, dino vas, oun kokres i rashaya nay rhan.

¹⁶ Te moukenn le vavar Israelitaryen kolestar te rhal, anenn le bari doosh ap i Israelitaryen. Me hom o baro Devel. Oun kova, hoy i Israelitarya mange anenn, hi kokres mange.

Har i firhe hounte venn, kay o Debleske anlo venn

¹⁷ O baro Devel penas ap o Mose:

¹⁸ Pen ap o Aron oun ap leskre morsh čavende, oun ap i tsele Israelitaryen: Hako Israelitari oun hako vi-themari, kay pash t'mende djivell, oun kay kamell o baro Debleske i firhes te anell, te vell kova leske rhačedo, – nay vell te dell lo les pestar, nay vell, te dell lo les pal kova, hoy lo pes sovel das,

¹⁹ palle hounte rodell lo i firhes vin i groumyendar, bakrendar oder bouzyendar, hoy i morsh hi oun sasto, te dikell o baro Devel lačes ap leste.

²⁰ Te anenn t'mer leske i firhes, hoy gar sasto hi, dikell lo gar lačes ap t'mende.

²¹ Te anell yek i groumyat oder i bakres glan o baro Debleste, hoy rhan i menshe glan leste – nay vell i firho, hoy lo pestar das, nay vell i firho, koleha yob kamell peskri sovel, hoy yob das, dren rikrell – palle hounte vell ko firho sasto, te dikell o baro Devel lačes ap leste.

²² I firho, hoy korelo oder doukedo hi, yek, koles i phagedi heri hi, oder i doukepen oder i nasslepen ap i hauta hi, saves ma anenn glan o baro Debleste, te rhačrenn les ap leskri rhačepaskri.

²³ Grumya oun bakre, kolen i lengsteder heri hi oder i tikneder heri, sau firhes nay anell yek glan o baro Debleste, te dell lo les pestar kokres. Te anell lo les, te rikrell lo peskri sovel dren, hi kova gar lačo glan o baro Debleskre yaka.

²⁴ I firho koleskre yare paash dino, oder vin činlo hi, ma anenn glan o baro Debleste! An t'maro them ma krenn sau koova ap i firheste!

²⁵ Ginenn vitar gar sau firho yekestar, kay kek Israelitari hi, te anenn les glan t'maro Debleste. Save firhe hi bouder gar boud moldo. Ap savende dikell o baro Devel bouder gar lačes.

²⁶ O baro Devel penas doureder ap o Mose:

²⁷ Te vell i tikni groumni, i tikno bakro oder i tikni bouzni boldo, palle vell kava ternepen efta divessa pash peskri date. Pal o orhtato dives nay aneh les o baro Debleske, te vell les leske maredo. Palle dikell lo lačes ap leste.

²⁸ Ma marenn i groumni oder i bakro oun leskro ternepen ap ko emligo dives!

^29-30 Te marenn t'mer i firhes o baro Debleske, te parkrenn t'men koleha pash leste, palle rhan les ap ko emligo dives, te dikell o baro Devel lačes ap t'mende! Ma moukenn čomone pral bis ap o vavar dives! Me hom o baro Devel.

³¹ Rikrenn t'men ap kova, hoy t'menge penau! Oun djivenn pal kova! Me hom o baro Devel.

³² Ma anenn ladj ap miro lab! T'mer, Israelitarya, hounte djinenn, te hom me kokres t'maro Devel! Me, o baro Devel, rodom t'men vin, te venn mire menshe,

³³ oun anom t'men dran o them Egiptia vin, te vap t'maro Devel, me, o baro Devel.