3. Mose 20 - O Debleskro Lab 2024 (Sinte-Manouche)

I phagi i bari doshake

¹ O baro Devel penas ap o Mose:

² Pen ap i Israelitarya: Koon t'mendar yek peskre čavendar o rhorheno debleste, o Molok, das, kova hounte merell. I tsele menshe hounte vitsrenn les i barrentsa moulo. Kova hi ninna yaake, te krell sau koova i vi-themari, kay pash t'mende djivell.

³ Me dikau čilačes ap hakeneste, kay kova krell, oun me moukau les bouder gar te djivell mank peskre menshende. Yob das yek peskre čavendar o Molokeste, oun kras yaake miro kheer pale-čiddo, oun kras mantsa, har te voms gar kokres o čačo Devel.

⁴ Te pandan i Israelitarya pengre yaka glan kova, hoy ko morsh kras, oun denn les gar moulo,

⁵ palle dau me kokres ko morshes peskri phagi, ninna leskre menshen. Me moukau les oun hakenes, kay ko debles Molok pal nashas, bouder gar mank pengre menshende te djivell.

⁶ Miri rholi vell ninna ap koleste, kay djal pash i dourkepangre oun pash kolende, kay i moulen poučenn, te poučell lo lendar, hoy te krell lo. Me moukau les bouder gar mank peskre menshende te djivell.

⁷ Me, o baro Devel, hom t'maro Devel. Doleske avenn mange kokres koy. Či hounte vell tardo mank mande oun t'mende!

⁸ Krenn, hoy me t'mendar kamau! Rikrenn t'men ap kova! Me, o baro Devel, rodom t'men vin, te venn mire menshe.

⁹ Te rakrell yek pral peskro dadeste oder peskri date bibarht vin, palle hounte vell lo moulo dino. Koon savo koova krell, ap koleste vell leskro rat.

¹⁰ Te sovell yek i romyah i vavarestar, hounte venn kol douy maredo.

¹¹ Te sovell i morsh i romyah peskro dadestar, anell lo ladj ap peskro dadeste. Yob oun koy djouvel hounte hidjrenn pengri phagi, oun hounte venn maredo.

¹² Te sovell i morsh peskro čaveskri romyah, hounte hidjrenn le pengri phagi oun hounte venn maredo. I baro vi-ladjedo koova kran le.

¹³ Te sovell i morsh i vavar morsheha, krenn le i baro pale-čiddo koova. Kol douy hounte hidjrenn le pengri phagi oun hounte venn maredo.

¹⁴ Te lell i morsh i romyat oun lakri dat gomme pashel, hi kova i vi-ladjedo koova. Yob hounte vell an i yag rhačedo, oun kol douy djouvya ninna. Kamau te vell kek vi-ladjedo koova mank t'mende.

¹⁵ Te sovell i morsh i firheha, palle hounte vell lo moulo dino. Oun ko firho vell ninna maredo.

¹⁶ Te sovell i djouvel i firheha, palle dess tou koy djouvyat oun ko firhes moulo. Yon hounte hidjrenn pengri phagi, oun hounte merenn.

¹⁷ Te sovell i morsh peskri penyah, i čay leskro dadestar oder leskri datar, hi kova i bari ladj. Kol douy hounte venn moulo dino glan i tsele menshende. Ko morsh sovas peskri phenyah, oun hounte hidjrell peskri doosh.

¹⁸ Te sovell i morsh i djouvyah, kolat peskri djouvyakro koova hi, krenn pen kol douy pale-čiddo, oun nay djivenn bouder gar mank pengre menshende.

¹⁹ Kek te sovell i phenyah peskri datar oder peskro dadestar. Koon savo koova krell, anell ladj ap peskri bibi. Yon hounte hidjrenn pengri doosh.

²⁰ Koon i romyah peskro kakestar sovell, anell ladj ap peskro kakeste. Kol douy hounte hidjrenn pengri doosh. Yon merenn kek čaventsa.

²¹ Te sovell i morsh i romyah peskro phralestar, hi kova i pale-čiddo koova. Yob anas ladj ap peskro phraleste. Kek čave vell len.

²² Krenn kova, hoy me t'mendar kamau oun rikrenn t'men ap miro čačepen, te venn gar vin tradedo dran ko them, an kova me t'men anau, te djivenn koy dren.

²³ Ma djivenn pal ko koova, pal kova i vavar menshe djivenn, kolen me glan t'mende vin tradau. Yon kran kava tselo pale-čiddo koova, oun van infam glan mire yaka.

²⁴ T'menge penau: Lengro them dau t'mende, te vell lo t'maro. Kova hi i them, kay boud thoud oun gvin hi. Me, o baro Devel, hom t'maro Devel, oun rodom t'men mange dran i vavar themma vin.

²⁵ Doleske ma rhan save firhen oun čirklen, hoy čivom ap i rig, te venn le t'menge pale-čiddo. T'mer hounte djinenn, have firhen nay rhan oun haven nay rhan gar, ninna have čirklen nay rhan oun haven nay rhan gar. Ma krenn t'men pale-čiddo kol firhentsa oun čirklentsa oun tikne firhentsa, hoy djan pral i phoub, hoy hi t'menge pale-čiddo. Te rhan t'mer save firhen, venn t'mer ninna pale-čiddo.

²⁶ Me hom o baro Devel. Kek vavar hi har me. An mande hi kek čilačepen. Oun t'men rodom vin dran i vavar themma, te venn t'mer miro. Doleske hounte venn kokres mange oun djivenn har i Debleskre menshe djivenn.

²⁷ Hako morsh oun haki djouvel, kay dourkrell oder poučell i moulen, hounte hidjrell peskri phagi oun merell. T'mer hounte vitsrenn len moulo i barrentsa.