3. Mose 2 - O Debleskro Lab 2024 (Sinte-Manouche)

O rhapen dran djob, hoy o Debleske rhačedo vell

¹ Te kamell yek i rhapen dran djob glan o baro Debleste te anell, palle anell lo lačo yarro oun čorell djet pral vergel oun čivell soungepaskro koova koy pral.

² Oun yob anell kova pash i rashayende dran o kheer Aron. Yek lendar lell i vast pherdo yarro o djeteha oun ko tselo soungepaskro koova, oun moukell kova ap i rhačepaskri te rhačrell. Kova sikrell, kay ko tselo rhapen, hoy anlo vas, o Debleske hi. Oun o lačo soungepen, hoy vell vin, soungell mishto o baro Debleske.

³ Kova, hoy o yarrestar o djeteha pral ačell, hi o Aroneske oun leskre čavenge. Kova hi i Debleskro rhapen oun hi i rashayenge kokres.

⁴ Te kameh i rhapen glan o baro Debleste te anell, hoy peklo hi an i bob, palle an čomone, kay kek shoutlo yarro dren hi, nay venn merklia dran lačo yarro khetne kerdo djeteha, nay venn sane mare, hoy djet pral maklo vell.

⁵ Te kameh i merkli te anell, hoy peklo hi ap i sasterno čaro, palle le yarro, kay kek shoutlo yarro dren hi, oun hoy kerdo hi o djeteha.

⁶ Tou phagess koy merkli an kotya oun čoress djet pral. Yaake hounte vell i rhapen dran djob anlo glan o Debleste.

⁷ Te kameh i rhapen glan o baro Debleste te anell, hoy hi keredo an i piri, palle kre les dran lačo yarro, kerdo o djeteha.

⁸ oun an kova glan o baro Debleste, oun de les o rashayeste. Oun kova hidjrell les glan o Debleskri rhačepaskri.

⁹ Oun o rashay lell čomone lestar oun rhačrell les ap i rhačepaskri. Kova sikrell, kay ko tselo rhapen, hoy anlo vas, o Debleske hi. Oun o lačo soungepen, hoy vell vin, soungell mishto o baro Debleske.

¹⁰ Kova, hoy pral ačell, hi o Aroneske oun leskre čavenge. Kova hi i Debleskro rhapen, oun hi i rashayenge kokres.

¹¹ Ko tselo rhapen dran djob, hoy yek o baro Debleske anell, an koleste hounte vell kek shoutlo yarro. T'mer hounte denn kek shoutlo yarro, vitar kek gvin an ko rhapen, hoy rhačrenn o baro Debleske.

¹² Ap ko tsiro, kay anenn o nevo djob o baro Debleske, nay anenn t'mer shoutlo yarro oun gvin, – ap leskri rhačepaskri nay rhačrenn kova gar. Kova hi kek koova, hoy rhačedo vell, te soungell lo lačes o Debleske.

¹³ Ko tselo rhapen, hoy tou o baro Debleske aneh, hounte vell londo. Ko loon hi i sikepen, kay kova, hoy o Devel t'mentsa vin kras, hako tsiro ačell. Doleske aneh leske kek rhapen dran djob, vitar kek firhen, kay kek loon pashel kerdo vas.

¹⁴ Te kameh tou tiro nevo djob glan o baro Debleste te anell, palle le ko djob oun peke les pral i yag, oun kre les tikno oun an les glan o Debleste!

¹⁵ Čore djet koy pre oun čip soungepaskro koova pre. Yaake hounte vell i rhapen dran djob, hoy glan o baro Debleste anlo vell.

¹⁶ O rashay lell i kotar kol djobendar oun djetestar tele, oun rhačrell kova khetne ko tselo soungepaskro koova. Kova hi i sikepen, kay ko tselo djob, hoy anlo vas, o baro Debleske hi.