3. Mose 18 - O Debleskro Lab 2024 (Sinte-Manouche)

Ma krenn vi-ladjedo koova!

¹ O baro Devel penas ap o Mose:

² Pen ap i Israelitarya: Me, o baro Devel, hom t'maro Devel.

³ Ma djivenn yaake har i Egiptarya, an kolengro them djivan, vitar gar har kolla an o them Kanaan, kote kay t'men anau. Ma djivenn pal lengro koova.

⁴ Pal miro čačepen hounte djivenn, oun krenn, hoy me t'mendar kamau. Me, o baro Devel, hom t'maro Devel.

⁵ Doleske krenn, hoy me t'mendar kamau, oun djivenn pal miro čačepen. I mensho, kay rikrell pes ap kova, koles hi čačepah o djipen. Me hom o baro Devel.

⁶ Kek t'mendar hounte sovell i djouvyah dran peskri familya. Kova penau me, o baro Devel.

⁷ Tou sovess gar tiri dah, te aness kek ladj ap tiro dadeste. Yoy hi tiri day.

⁸ Tou sovess gar i vavar romyah tiro dadestar, te aness kek ladj ap tiro dadeste.

⁹ Tou sovess gar tiri phenyah, koy čay tiro dadestar oder tiri datar; hi yek te vas li bares an tiri familya oder an i vavar familya.

¹⁰ Tou sovess gar i mit i čay tiro čavestar oder tiri čatar, te aness kek ladj ap toute.

¹¹ Tou sovess gar mit i čay tiro dadeskri romyatar. Yoy hi tiri pheen.

¹² Tou sovess gar tiri bibyah, koy pheen tiro dadestar. Yoy hi leskro ratestar.

¹³ Tou sovess gar tiri bibyah, koy pheen tiri datar. Yoy hi lakro ratestar.

¹⁴ Tou sovess gar i romyah tiro kakestar. Yoy hi tiri bibi.

¹⁵ Tou sovess gar tiro čaveskri romyah.

¹⁶ Tou sovess gar tiro phraleskri romyah, te aness kek ladj ap tiro phraleste.

¹⁷ Tou sovess gar i djouvyah oun ninna mit lakri čay, oder lakro čaveskri čay oder lakri čakri čay. Kalla hi lakro ratestar. Kava vals i vi-ladjedo koova.

¹⁸ Tou less gar i phenyat tiri romyatar, te vell li tiri douyti romni, yaake rah har tiri romni djivell.

¹⁹ Tou sovess gar i djouvyah yaake rah har lat peskri djouvyakro koova hi.

²⁰ Tou sovess gar i romyah i vavarestar, te kress tout gar pale-čiddo.

²¹ Tou rhačress kek tire čavendar o rhorheno debleske Molok. Sau koova sikrals, te hom me, tiro Devel, touke či moldo. Me hom o baro Devel!

²² Kek morsh te sovell i vavar morsheha. I baro pale-čiddo koova hi sau kova.

²³ Kek morsh oun kek djouvel te sovell i firheha. Koon kova krell, krell pes pale-čiddo oun anell bari ladj ap peste.

²⁴ Ma krenn t'men sau koveha pale-čiddo! Kova lauter kras kol vavar menshe pale-čiddo, kolen me glan t'mende dran o them vin tradau.

²⁵ O tselo them vas koleha pale-čiddo kerdo. Me anau lengri doosh ap lende pale, oun krau, te venn kol menshe vin tradedo dran ko them, kay le djivenn.

²⁶ Doleske krenn kova, hoy me t'mendar kamau, oun djivenn pal miro čačepen, t'mer oun ninna ko vi-themari, kay mank t'mende djivell! Krenn kek savo pale-čiddo koova,

²⁷ hoy kolla kran, kay glan t'mende kate djivan oun o them pale-čiddo kran.

²⁸ Te krenn t'mer kava them ninna pale-čiddo, venn t'mer dran kava them vin tradedo har kol vavar menshe, kay glan t'mende kay his.

²⁹ Hakeno, koon sau pale-čiddo koova krell, vell infam, oun nay djivell bouder gar mank peskre menshende.

³⁰ Doleske, djivenn yaake har me t'menge penom! Ma krenn ko pale-čiddo koova, hoy kolla kran, kay glan t'mende kate his! Ma krenn t'men savo koveha pale-čiddo! Me, o baro Devel, hom t'maro Devel.