3. Mose 17 - O Debleskro Lab 2024 (Sinte-Manouche)

Koy platsa, kay i firhe maredo venn

¹ O baro Devel penas ap o Mose:

² Pen ap o Aron oun leskre morsh čavende oun ap i tsele Israelitarya: Kava hi, hoy o baro Devel t'menge penell:

^3-4 Hako morsh dran o kheer Israel, kay kamell i gouroum, i bakro oder i bouzni te marell, hounte krell kova glan o voudar o Debleskro plarhteno kherestar, te vell ko firho o baro Debleske dino. Yob hounte krell kova gar ap i platsa, kay i menshe djivenn, vitar gar glan koy platsa. Te rikrell lo pes gar ap kova, anell lo rat ap peste har yek, kay i menshes marell. Savo mensho vell pale-čiddo oun nay djivell bouder gar mank peskre menshende.

⁵ Bis kanna maran i Israelitarya pengre firhen vin ap o them. Kanna hounte anenn le len o baro Debleske glan o voudar leskro plarhteno kherestar pash o rashayeste. Oun kote venn le maredo, te rhan le len khetne glan o baro Debleste.

⁶ O rashay lell ko rat oun vitsrell čomone lestar ap o baro Debleskri rhačepaskri, hoy glan o voudar leskro plarhteno kherestar tardo hi. Oun rhačrell o thulepen ko firhestar koy pre. Oun o lačo soungepen, hoy vell vin, soungell mishto o baro Debleste.

⁷ I Israelitarya hounte marenn bouder kek firhen i bengenge, kolenge yon kanna gomme palla nashenn. Ap kova hounte rikrenn le pen, ninna lengre čavenge oun kolengre čavenge oun yaake doureder hako tsireske.

⁸ Tou peness lenge: Hako morsh dran o kheer Israel, ninna hako vi-themari, kay mank t'mende djivell, kay kamell i firhes o baro Debleske te marell, sau firho, koleskro tselo mass rhačedo vell, oder sau firho, hoy rhan le khetne glan o baro Debleste,

⁹ kova hounte anell les glan o voudar o Debleskro plarhteno kherestar, te vell lo kote o baro Debleske maredo. Koon kova gar krell, vell pale-čiddo oun nay djivell bouder gar mank peskre menshende.

Ma rhan rat!

¹⁰ Hako Israelitari, ninna hako vi-themari, kay mank t'mende djivell, kay rat rhal, havo ninna hi, koleske sikrau miro doumo, oun krau, te djivell lo bouder gar mank mire menshende.

¹¹ An o rat hi o djipen. Oun me kamau, te vell lo ap i rhačepaskri anlo, te vell i doosh oun o pale-čiddo koova t'mendar krik lino. An o rat hi o djipen. Doleske lau leha i doosh oun o pale-čiddo krik.

¹² Doleske penom me ap i Israelitarya: Kek t'mendar rhal rat. Vitar kek vi-themari, kay mank t'mende djivell, rhal rat.

¹³ Hako Israelitari oun hako vi-themari, kay taprell penge i divyo firho oder i čirklo, hoy yek nay rhal, hounte moukell leskro rat vin nashell ap i phoub oun čakrell čik koy pre.

¹⁴ An o rat hi o djipen. Doleske penom me ap i Israelitarya: Ma rhan rat! Koon les rhal, vell pale-čiddo oun nay djivell bouder gar mank peskre menshende!

¹⁵ Hakeno, kay rhal i firho, hoy meras oder moulo dandedo vas, kova hounte thovell pes oun peskre koola, oun ačell pale-čiddo, bis te vell rati. Koy pal hi lo pale erligo. Hi yek, te hi kova i Israelitari oder i vi-themari.

¹⁶ Te thovell lo pes gar, vitar gar peskre koola, hounte hidjrell lo peskri phagi.