3. Mose 16 - O Debleskro Lab 2024 (Sinte-Manouche)

Ko baro dives, kay i doosh krik lino vell

¹ Pal kova, kay anan o Aroneskre douy čave yaake soungepaskro koova glan o baro Debleste, har kova gar čačo his, oun doleske meran, penas o baro Devel ap o Moseste:

² Pen tiro phraleske, o Aroneske, te djal lo gar hako tsireske an o kouč isema an o Debleskro kheer, te merell lo gar. An koy isema, hoy pal ko kotar than hi, sikrau me man an i folka pral ko sonakaskro pralstouno kotar, hoy ap o morhton čiddo hi, kay mire deesh laba dren hi.

³ Te djal lo koy dren, hounte anas lo glan kova i terno gouroum, hoy vell maredo, te vell i doosh oun o pale-čiddo koova krik lino, ninna hounte anas lo i bakro, koleskro tselo mass rhačedo vell o Debleske.

⁴ Glanstounes hounte thovell lo pes, oun rivell i rashayengre koola an: ko layntikro gad, oun ko layntikro rholop koy tel. Yob pandell i pereskro layntikro pandepen troul peste, oun i shereskro pandepen troul peskro shero.

⁵ I Israelitarya anenn leske douy morsh bouzya oun yek bakro. I bouzya venn maredo, te vell i doosh oun o pale-čiddo koova krik lino. Oun o bakro vell maredo, te vell leskro tselo mass rhačedo o Debleske.

⁶ O Aron anell peske oun peskri familyake i gouroum, te vell lo maredo, te vell lengri doosh oun lengro pale-čiddo koova krik lino, oun lauter pale mishto mank o baro Debleste oun lende.

⁷ Palle lell yob kol douy morsh bouzya oun anell len pash o baro Debleste glan o voudar leskro plarhteno kherestar.

⁸ O Aron vitsrell douy tikne barra, te sikrenn le, havi bouzni o baro Debleske hi, oun havi bouzni an o moulo tato them tradedo vell.

⁹ Palle marell lo koy bouzni, hoy o baro Debleske hi, te vell i doosh oun o pale-čiddo koova krik lino.

¹⁰ Koy vavar bouzni vell djides glan o baro Debleste tardo, oun lake vell i doosh i menshendar pre-čiddo. Palle vell li an o moulo tato them tradedo.

¹¹ O Aron marell ko gouroum, te vell i doosh oun o pale-čiddo koova lestar oun leskri familyatar krik lino, oun yon čačo oun erligo tardo hi glan o baro Debleste.

¹² Palle djal lo pash ko sonakaskro bob, hoy glan o baro Debleste tardo hi, oun lell kolestar i sasterno čaro pherdo kasht, hoy rhačell, oun douy vasta pherdo soungepaskro koova, oun djal koleha pal ko voudar dran than an i kouč isema.

¹³ Kote čivell lo ko soungepaskro koova ap i yag, te djal i yagakro dourho vin oun čakrell ko pralstouno kotar ap ko morhton, kay o Debleskre deesh laba dren hi. Kova hounte krell lo doleske, te merell lo gar.

¹⁴ Oun yob lell ko ratestar ko gouroumestar, oun vitsrell kova peskro goushteha glan ap o pralstouno kotar. Oun ap koy platsa glan o morhton vitsrell lo peskro goushteha efta kope čomone ko ratestar.

¹⁵ Palle marell yob koy morsh bouzni, te vell i doosh oun o pale-čiddo koova i menshendar Israel krik lino. Oun yob djal ko rateha pal i voudar dran than an i kouč isema, oun krell ko rateha yaake, har lo les ko rateha ko gouroumestar kras. Yob vitsrell peskro goushteha čomone ap o pralstouno kotar, hoy ap o morhton čiddo hi, oun ap koy platsa glan o morhton.

¹⁶ Oun yaake krell lo, te vell o pale-čiddo koova oun koy doosh, hoy i Israelitarya ap pende anan – lengro tselo čilačo koova, dran o Debleskri kouč isema krik lino. Oun yaake hounte krell lo ko tselo Debleskro plarhteno khereha. Kava kheer hi tardo ap i platsa, kay i Israelitarya djivenn. Oun koy doosh, hoy yon ap pende anenn oun lengro pale-čiddo koova krell ninna o Debleskro kheer pale-čiddo.

¹⁷ Kek mensho hounte vell an o Debleskro kheer an ko tselo tsiro, kay djal o Aron an o kouč isema dren, oun krell te vell o pale-čiddo koova oun koy doosh krik lino lestar, leskri familyatar oun i tsele Israelendar.

¹⁸ Palle djal yob vin pash koy rhačepaskri, hoy glan o baro Debleskro plarhteno kheer tardo hi, oun lell čomone ko gouroumeskro ratestar oun koy bouzyakro ratestar, oun makell kova ap i shinga, hoy ap i star ekke ap koy rhačepaskri hi, te vell koy doosh oun ko pale-čiddo koova krik lino foun koy rhačepaskri.

¹⁹ Oun yob čivell peskro goushto an o rat, oun vitsrell čomone ko ratestar ap i rhačepaskri. Kova krell lo efta kope, te vell i Israelengri doosh oun lengro pale-čiddo koova krik lino, hoy ap i rhačepaskri hi. Oun i rhačepaskri vell pale djoudjo glan o baro Debleskre yaka.

²⁰ Te kras o Aron halauter, te vell i doosh oun o pale-čiddo koova krik lino dran o Debleskri kouč isema, dran o tselo Debleskro plarhteno kheer oun dran i rhačepaskri, palle anell lo koy djidi morsh bouzni kay,

²¹ oun čivell peskre douy vasta ap lakro shero, oun penell haki doosh oun hako čilačepen, hoy i Israelitarya kran. Yaake čivell lo kova lauter ap i bouzyakro shero. Palle moukell lo lat i morshestar, kay koleske koy tardo hi, krik te tradell an o moulo tato them.

²² Kay morsh bouzni hidjrell lengri tseli doosh peha an o divyo moulo them. Oun kote ačell li.

²³ Pal kova djal o Aron an o Debleskro plarhteno kheer oun rivell kol layntikre koola vin, hoy yob ap peste rivas, har djas lo an o kheer dren. Oun kote čivell lo len pale tele.

²⁴ Palle thovell lo pes ap i Debleskri platsa, oun rivell peskre koola an. Palle djal lo pale vin, marell kol douy bakre, ko yek peske, oun ko vavar i menshenge Israel, oun rhačrell lengro tselo mass o baro Debleske, te vell i doosh oun o pale-čiddo koova krik lino lestar oun kol menshendar Israel.

²⁵ Kol thoulle kotya kol firhendar, hoy maredo van, te vell i doosh oun o pale-čiddo koova krik lino, kal kotya rhačrell lo ninna ap o Debleskri rhačepaskri.

²⁶ Ko morsh, kay tradas koy morsh bouzni an o moulo divyo them, hounte thovell pes oun peskre koola, glan te nay djal lo pale ap i platsa, kay i menshe djivenn.

²⁷ Kova, hoy pral ačas ko terno gouroumestar oun koy morsh bouzyatar, kolengro rat an i kouč isema anlo vas, te vell i doosh oun o pale-čiddo koova krik lino, kol kotya anell yek vin glan i platsa, kay i menshe hi, oun rhačrell kote lauter, koy hauta, ko mass, oun kol bouke.

²⁸ Ko morsh, kay kova lauter rhačras, kova hounte thovell pes oun peskre koola. Pal kova nay vell lo pale ap i platsa, kay i menshe djivenn.

²⁹ Kava lauter hounte vell kerdo ap o deshto dives an o eftato čon. Oun yaake hounte krenn t'mer hako tsireske. Ma rhan ap ko dives! Ma krenn i boudi, t'mer gar oun vitar gar i vi-themarya, kay mank t'mende djivenn.

³⁰ Ap kava dives vell t'mari tseli doosh oun ko tselo pale-čiddo koova, hoy ap t'mende hi, krik lino. Oun lauter vell pale mishto mank o baro Debleste oun t'mende.

³¹ Kava Debleskro dives hi i dives, kay han kokres o baro Debleske koy. Oun t'mer nay krenn kek boudi, oun rhan či. Yaake vell kava kerdo an hako tsiro, hoy vella.

³² Oun kokres savo rashay krell, te vell i doosh oun o pale-čiddo koova krik lino, koleske djet ap leskro shero čoredo vas, te vas lo rashay pal peskro dadeste, o Aroneste. Oun yob hounte rivell kol layntikre koola an, hoy i rashayenge hi,

³³ oun lell i doosh oun o pale-čiddo koova krik, hoy hi an o Debleskri kouč isema, an o tselo Debleskro plarhteno kheer, ap i rhačepaskri, ap i rashaya oun ap i tsele menshende Israel.

³⁴ Yek kopo an o bersh hounte vell kova yaake kerdo, te vell i tseli doosh oun o tselo pale-čiddo koova i Israelendar krik lino. Ap kava lab hounte rikrenn t'men hako tsireske. Oun o Aron kras halauter yaake, har o baro Devel kova o Moseske penas.