3. Mose 15 - O Debleskro Lab 2024 (Sinte-Manouche)

Pale-čiddo koova ap i morsheste

¹ O baro Devel penas ap o Mose oun ap o Aron:

² Pen ap i Israelende: Te nashell čomone dran i morsheskro mass, palle hi lo pale-čiddo.

³ Hi yek te nashell kova o tselo tsiro oder pale te pale; pale-čiddo hi lo.

⁴ Hako čiben, ap koleste yob čiddo hi, oun haki beshepaskri, ap kolate yob beshdo hi, hi pale-čiddo.

⁵ Koon koleskro čiben an-tapras, hounte thovell pes oun peskre koola, oun hi pale-čiddo bis te vell rati.

⁶ Koon beshas pes ap čomone, kay ko nasselo beshdo his, kova hounte thovell pes oun peskre koola, oun hi pale-čiddo, bis te vell rati.

⁷ Koon ko nasseles an-tapras, kova hounte thovell pes oun peskre koola, oun hi pale-čiddo bis te vell rati.

⁸ Te čoungrell ko nasselo ap yekeste, kay gar pale-čiddo hi, hounte thovell pes kova oun ninna peskre koola, oun hi pale-čiddo, bis te vell rati.

⁹ Ninna ko ledertikro kotar, ap koleste ko nasselo klissas, hi pale-čiddo.

¹⁰ Koon čomone an-taprell, ap koleste ko nasselo čiddo oder beshdo his, vell pale-čiddo, bis te vell rati. Koon čomone hidjrell, ap koleste ko nasselo čiddo oder beshdo his, hounte thovell pes oun peskre koola, oun hi pale-čiddo, bis te vell rati.

¹¹ Te taprell ko nasselo yekes an, oun leskre vasta his gar thodo, palle hounte thovell pes kova, kay an-tapedo vas, oun peskre koola, oun hi pale-čiddo bis te vell rati.

¹² Kol čare, hoy dran čik kerdo hi, oun kolen ko nasselo an-tapras, hounte venn paash dino. Halauter, hoy dran kasht kerdo vas, oun kolestar an-tapedo vas, hounte vell an pani tele thodo.

¹³ Te vell ko nasselo pale sasto, ginell lo peske efta divessa tele. Palle thovell lo peskre koola oun thovell pes djoudjo panyeha tele; palle hi lo pale erligo.

¹⁴ Ap o orhtato dives anell lo douy divye taube oder douy vavar taube pash o rashayeste glan o voudar o plarhteno kherestar, kay o baro Devel djivell.

¹⁵ Ko rashay marell koy yek, te vell ko pale-čiddo koova krik lino, oun koy vavar, te vell li tseles rhačedo o baro Debleske. Yaake krell o rashay, te vell ko morsh, kay dran peskro nasslepen pale-čiddo his, pale erligo glan o baro Debleste.

¹⁶ Te djal i morsheske yek tele, palle thovell lo peskro tselo kerpro tele, oun yob vell pale-čiddo, bis te vell rati.

¹⁷ Leskro tselo an-ripen oun haki ledertikro kotar, ap koleste kova vas, hounte vell tele thodo oun vell pale-čiddo bis te vell rati.

¹⁸ Te sovell i morsh i djouvyah, oun leske djal yek tele, hounte thovenn pen kol douy, oun hi pale-čiddo, bis te vell rati.

Pale-čiddo koova ap i djouvyate

¹⁹ Te hi i djouvyat peskri djouvyakro koova, palle ačell li efta divessa pale-čiddo. Hakeno, kay lat an-taprell, vell pale-čiddo, bis te vell rati.

²⁰ Oun halauter, kay li an kava tsiro pre čiddo oder beshdo his, hi pale-čiddo.

²¹ Hakeno, kay lakro čiben an-taprell, hounte thovell pes oun peskre koola, oun ačell pale-čiddo, bis te vell rati.

²² Hakeno, kay kova an-taprell, kay li pre-beshdo his, hounte thovell pes oun peskre koola oun ačell pale-čiddo, bis te vell rati.

²³ Oun koon čomone an-taprell, hoy kote čiddo his, kay li čiddo oder beshdo his, ačell pale-čiddo bis te vell rati.

²⁴ Te hi i morsh pash yekate čiddo, oun lat vell peskri djouvyakro koova, palle hi lo efta divessa pale-čiddo. Oun ko čiben, kay yob čiddo his, vell pale-čiddo.

²⁵ Te hi i djouvyat peskri djouvyakro koova boud divessa oder an i tsiro, kay hounte vell kova gar, palle hi li an kava tselo tsiro pale-čiddo.

²⁶ Hako čiben, kay li čiddo hi, oun hako koova, kay li pre-beshdo hi an ko tsiro, hi pale-čiddo.

²⁷ Kova, kay čomone kolestar an-taprell, kova hi pale-čiddo, oun hounte thovell pes oun peskre koola, oun ačell pale-čiddo bis te vell rati.

²⁸ Te vas li pale sasto oun ratell bouder gar, ginell li peske efta divessa tele, pal kolende hi li pale erligo.

²⁹ Ap o orhtato dives anell li douy divye taube oder douy vavar taube pash o rashayeste glan o voudar o Debleskro plarhteno kherestar.

³⁰ Ko rashay marell koy yek tauba, te vell o pale-čiddo koova krik lino, oun koy vavar, te vell li tseles rhačedo o baro Debleske. Yaake krell o rashay, te vell koy djouvel, kay ratas oun doleske pale-čiddo his, pale erligo.

³¹ Oun o baro Devel penas ap o Mose oun ap o Aron: Denn i Israelitaryen trad, te ačenn le i kotar dour miro kherestar an ko tsiro, kay hi le pale-čiddo, te krenn le gar koy platsa pale-čiddo, kay me djivau mank lende, te merenn le gar.

³² Pal kal laba hounte vell kerdo i morsheha, dran koleskro mass čomone vin nashell, oun koleske yek tele djal, yaake te vas lo pale-čiddo.

³³ Oun pal kal laba hounte vell kerdo i djouvyah, kolat peskri djouvyakro koova hi, oun i morsheha, kay sovell khetne i djouvyah, kolat peskri djouvyakro koova hi.