3. Mose 14 - O Debleskro Lab 2024 (Sinte-Manouche)

I pale-čiddo, koles i djoungelo nasslepen his, vell erligo kerdo

¹ O baro Devel penas ap o Mose:

² Yaake hounte krenn t'mer yekeha, kay les i djoungelo nasslepen ap peskri hauta his, oun pale sasto vas, te vell lo pale erligo. Yob vell glan o rashayeste anlo.

³ O rashay djal vin glan koy platsa, kay i menshe hi, oun dikell les peske an. Te vas ko doukepen ap leste sasto,

⁴ palle penell o rashay, te anenn le douy djide čirkle, hoy hi gar pale-čiddo, ninna cedertikro kasht, oun lole thaba, oun patria i bourrestar, hoy kharell Hysop.

⁵ Oun o rashay penell, te marenn le ko yek čirklo pral i čaro, kay djoudjo pani dren hi.

⁶ Palle rikrell lo o djido čirkles an ko čaro, kay pani oun o rat o maredo čirklestar dren hi. Khetne leha čivell lo ko cedertikro kasht, kol lole thaba oun kol patria Hysop koy dren, an ko čaro,

⁷ oun vitsrell ko ratlo panyestar efta kope ap koleste, kay pale-čiddo his, te vell lo erligo. Oun moukell ko djido čirkles krik te djal.

⁸ Kova, kay sasto vas, thovell peskre koola oun činell peskre tsele balla tele, oun thovell pes. Palle hi lo erligo, oun nay vell pale ap i platsa, kay i menshe djivenn. Efta divessa ačell lo vin glan peskro plarhteno kheer.

⁹ Pal kol efta divessa činell lo i douyto kopo i tsele balla ap o shero tele, ninna leskri čora oun kol balla pral i yaka oun leskre tsele vavar balla, oun thovell pes oun peskre koola Palle hi lo erligo.

¹⁰ Ap o orhtato dives anell lo douy terne bakre, hoy morsha hi oun sasto, oun yek bakri, hoy yek bersh phouro oun sasto hi. Ninna anell lo triin kilogramme lačo yarro, kay djet dren hi, te vell kova glan o baro Debleste anlo. Koy pashel anell lo i khoro djet.

¹¹ Ko rashay anell koles, kay sasto vas, oun kava tselo koova glan o baro Debleste, glan o voudar koleskro plarhteno kherestar.

¹² O rashay lell ko yek terno bakro oun ko yek-paash litari djet, oun hadell kova pre glan o baro Debleste, te vell ko mensho pale erligo kerdo glan o Debleste.

¹³ Pal kova marell lo ko terno bakres kote, kay venn ninna firhe maredo, te vell i doosh oun o pale-čiddo koova krik lino, oun kol vavar, kolengro tselo mass rhačedo vell. Kay platsa hi i Debleskri platsa. Yaake har hi o rashayeske ko mass i firhestar, hoy vell maredo, te vell i doosh oun o pale-čiddo koova krik lino, yaake hi ninna o rashayeske ko mass i firhestar, hoy vell maredo, te vell ko mensho pale erligo kerdo glan o Debleste. O mass sau firhestar, hoy o Debleske anlo vas, nay rhan kokres i rashaya oun kek vavar.

¹⁴ O rashay lell o ratestar ko firhestar, hoy maredo vas, te vell o mensho pale erligo glan o Debleste, oun makell čomone tella ap o čačo kand kolestar, kay sasto vas, ninna ap leskro čačo pesso goushto oun ap o čačo pesso tsebo.

¹⁵ O rashay lell ko khoro djet oun čorell čomone kolestar an peskro servo vast.

¹⁶ Palle čivell lo peskro čačo goushto an ko djet, hoy an leskro servo vast hi, oun vitsrell ko djetestar efta kope ap o Debleskri rhačepaskri.

¹⁷ Palle makell lo ko djetestar, hoy an leskro servo vast pral ačas, čomone tella ap o čačo kand oun ap o čačo pesso goushto oun ap o čačo tsebo kolestar, kay sasto vas, ap ko rat hoy lo glan kova kote pre makas.

¹⁸ Ko djet, hoy gomme an leskro vast hi, makell lo ap o shero kolestar, kay sasto vas. Yaake krell lo les pale erligo glan o baro Debleste.

¹⁹ Pal kova marell o rashay ko firho, hoy maredo vell, te vell ko pale-čiddo koova krik lino kolestar, kay sasto vas. Yaake krell lo les pale erligo. Palle marell lo ko firho, koleskro tselo mass o Debleske rhačedo vell,

²⁰ oun rhačrell kova ap o Debleskri rhačepaskri khetne ko rhapen dran yarro hoy glan o baro Debleste anlo vas. Oun yaake krell lo, te vell kova, kay sasto vas, pale erligo.

²¹ Te hi lo čorvelo oun nay anell gar yaake boud, palle lell lo i terno bakro, hoy maredo vell, te vell o mensho pale erligo. Kava bakro vell pre hadedo glan o baro Debleste, te vell i pale-čiddo koova krik lino. Koy pashel lell lo yek kilogrammi yarro, kay djet dren hi, te vell kova ninna glan o baro Debleste anlo. Ninna anell lo yek khoro djet,

²² douy divye taube oder douy vavar taube. Koy yek vell maredo, te vell o pale-čiddo koova krik lino, koy vavar, te vell li tseles rhačedo o baro Debleske.

²³ Ap o orhtato dives foun ko tsiro, kay lo erligo kerdo vell, anell lo len pash o rashayeste glan o voudar o plarhteno kherestar, kay o baro Devel djivell.

²⁴ O rashay lell ko terno bakro, hoy maredo vell, te vell o mensho pale erligo, oun hadell les pre glan o baro Debleste. Yaake krell lo ninna o djeteha.

²⁵ Palle marell lo ko terno bakro oun makell o ratestar tella ap o čačo kand kolestar, kay sasto vas, ninna ap leskro čačo pesso goushto oun ap o čačo pesso tsebo.

²⁶ O rashay lell ko khoro djet oun čorell čomone kolestar an peskro servo vast.

²⁷ Palle čivell lo peskro čačo goushto an ko djet, hoy an leskro servo vast hi, oun vitsrell ko djetestar efta kope ap o Debleskri rhačepaskri.

²⁸ Palle makell lo ko djetestar, hoy an leskro servo vast pral ačas, tella ap o čačo kand oun ap o čačo pesso goushto oun ap o čačo tsebo kolestar, kay sasto vas, ap ko rat, hoy lo glan kova kote pre makas.

²⁹ Ko djet, hoy gomme an leskro vast hi, makell lo ap o shero kolestar, kay sasto vas. Yaake krell lo, te vell ko mensho pale erligo glan o baro Debleste.

³⁰ Pal kova marell o rashay koy yek tauba, hoy ko mensho anas – nay vell i divyi tauba, nay vell i vavar tauba –

³¹ te vell o pale-čiddo koova krik lino, oun koy pal koy vavar tauba, hoy vell tseles rhačedo ap o Debleskri rhačepaskri. Oun koy pashel anell lo ko rhapen dran yarro glan o baro Debleste. Yaake krell o rashay, te vell kova, kay sasto vas, pale erligo glan o baro Debleste.

³² Yaake hounte vell kerdo koleha, kay i djoungelo nasslepen ap peskri hauta his, oun kova gar yaake bravelo hi, te nay anell lo triin bakre, te vell lo pale erligo kerdo.

Djunglepen an i khera

³³ O baro Devel penas ap o Mose oun ap o Aron:

³⁴ Te venn t'mer an o them Kanaan, hoy me t'men dau, te vell kava them t'menge, oun me moukau kote an i kheer i djoungelo kotar vin te vell,

³⁵ palle hounte djal kova, koleske ko kheer hi, pash o rashayeste oun penell leske: “Mange dikell kova vin, har te phagals i djoungelo kotar ap miro kheer vin.”

³⁶ Glan te djal o rashay an ko kheer, te dikell lo peske kova an, moukell lo ko tselo koova dran ko kheer vin te anell, te vell gar kova lauter pale-čiddo. Palle djal lo dren oun dikell pes ko kheer an.

³⁷ Te dikell lo djoungele zenele oder lole kotya ap i barra, oun kova dikell vin, har te rhals pes ko djounglepen an i barra dren,

³⁸ palle djal o rashay dran ko kheer vin oun pandell ko kheer efta divessa tele.

³⁹ Pal efta divessa vell lo pale an ko kheer, oun dikell peske kol djoungele kotya pale an. Te vas ko djounglepen bareder ap i barra ko kherestar,

⁴⁰ palle penell o rashay, te venn kal barra vi-phagedo, kay ko djounglepen pre hi, oun venn vin vitsedo glan o foro ap i pale-čiddi platsa.

⁴¹ Oun ko čik, hoy dren an o kheer ap i barra maklo vas, hounte vell tele lino oun vell vi-čoredo vin glan o foro ap i pale-čiddi platsa.

⁴² Oun kote, kay i barra vin phagedo van, venn vavar barra dren čiddo. Oun vavar čik vell ap i barra pre maklo.

⁴³ Te vell ko djounglepen pale vin ap i barra an ko kheer,

⁴⁴ palle vell ko rashay oun dikell kova peske an. Te djas ko djounglepen doureder, palle hi i djounglepen, hoy troul peste rhal. Ko kheer hi pale-čiddo,

⁴⁵ oun hounte vell tele phagedo. Oun leskre barra oun leskro kasht oun koy čik ap i barra, kova lauter vell vin anlo glan o foro ap i pale-čiddi platsa.

⁴⁶ Kova, kay djal dren an ko kheer, yaake rah har kova tele pandlo hi, kova vell pale-čiddo, bis te vell rati.

⁴⁷ Kova, kay sovell oder rhal an ko kheer, hounte thovell peskre koola.

⁴⁸ Te djal o rashay pale dren, oun yob dikell, te djas ko djounglepen gar doureder pal kova, kay makan le vavar čik ap i barra, palle rakrell o rashay vin, te hi o kheer bouder gar pale-čiddo. Ko djounglepen djas krik.

⁴⁹ Palle krell lo čomone, te nay djivenn i menshe pale an ko kheer: Yob lell douy čirkle, ninna cedertikro kasht, oun lole thaba, oun patria i bourrestar, hoy kharell Hysop.

⁵⁰ Oun yob marell ko yek čirklo pral i čaro, kay djoudjo pani dren hi.

⁵¹ Palle čivell lo o djido čirkles an ko čaro, kay pani oun o rat o maredo čirklestar dren hi. Khetne leha čivell lo ko cedertikro kasht, kol lole thaba oun kol patria Hysop koy dren, an ko čaro, oun vitsrell ko ratlo panyestar efta kope ap ko kheer,

⁵² te vell o pale-čiddo koova dran ko kheer krik lino.

⁵³ Palle moukell lo ko djido čirkles vin te djal dran o foro. Yaake lell lo ko pale-čiddo koova ko kherestar krik. Oun i menshe nay djivenn pale an o kheer.

⁵⁴ Pal kal laba hounte vell kerdo, te hi yekes i nasslepen ap peskri hauta, djoungelo oder gar djoungelo,

^55-56 kote, kay sikrell pes i pessepen, nassele kotya oun parne kotya ap i hauta. Oun pal kal laba hounte vell kerdo, te sikrell pes i djounglepen ap ripya oder an khera.

⁵⁷ Yaake nay vell vin hatslo, hi i mensho oder i koova pale-čiddo oder gar.