3. Mose 13 - O Debleskro Lab 2024 (Sinte-Manouche)

Djungelo nasslepen ap o mass

¹ O baro Devel penas ap o Mose oun ap o Aron:

² Te vell pash i mensheste i kotar hauta pesso oder nasselo oder parno, yaake te darenn le, kay kova i djoungelo nasslepen hi, palle vell ko mensho pash o rashayeste anlo, pash o Aroneste oder pash yekeste leskre morsh čavendar.

³ Oun ko rashay hounte dikell peske koy nasseli kotar hauta an. Te van i balla kote parno, oun koy nasseli kotar hauta hi doureder tele an o mass har koy vavar hauta trouyel, palle hi kova i djoungelo nasslepen. Kova te dikell o rashay ap koleste, palle hounte rakrell lo vin, te hi ko mensho pale-čiddo.

⁴ Te hi ko parno kotar ap leskri hauta gar doureder tele an leskro mass har koy vavar hauta, oun i balla van gar parno, palle pandell ko rashay ko menshes efta divessa an i kheer dren.

⁵ Ap o eftato dives dikell lo les pale an. Te patsell lo, te djas ko parno kotar gar doureder, oun ačas yaake har glan kova, palle pandell ko rashay les i douyto kopo efta divessa dren.

⁶ Pal kol efta divessa dikell o rashay pale koy kotar hauta an. Te hi kova bouder gar yaake parno oun vas gar bareder, palle hounte rakrell lo vin, te hi ko mensho erligo. Kava hi i nasslepen ap i hauta, hoy gar djoungelo hi. Ko mensho hounte thovell peskre koola oun hi erligo.

⁷ Te vell ko nasselo kotar bareder pal kova, kay o rashay pre dikas, palle hounte sikrell lo pes o rashayeste i douyto kopo.

⁸ Te dikell o rashay palle, kay vas ko nasselo kotar bareder, palle hi kova i djoungelo nasslepen, oun o rashay hounte rakrell vin, te hi ko mensho pale-čiddo.

⁹ Te hi yekes i doukepen ap peskri hauta, hoy vi dikell har i djoungelo nasslepen, palle anenn le saves pash o rashayeste.

¹⁰ Te dikell ko rashay palle, te hi ko doukepen parno oun pesso, oun i balla an ko doukepen van parno, oun ko doukepen hi pre oun lolo,

¹¹ palle hi kova ap leskri hauta i phouro djoungelo doukepen. O rashay hounte rakrell vin, te hi ko mensho pale-čiddo. Yob hounte pandell les gar an o kheer dren, pale-čiddo hi lo.

^12-13 Te phagell i nasslepen ap i tseli hauta vin, foun leskro shero bis pash leskre pire, oun halauter hi parno, hoy o rashay nay dikell, palle hi ko nasslepen čomone, hoy ko menshes gar pale-čiddo krell. Oun o rashay rakrell vin, te hi kova erligo.

^14-15 Hatsell o rashay, kay les an-dikell, i doukepen, hoy hi pre oun lolo, hi kova i djoungelo nasslepen. Oun o rashay, kay kova dikell, hounte rakrell vin, te hi ko mensho pale-čiddo. Ko lolo mass, hoy pre hi, hi pale-čiddo, oun hi i sikepen, kay kova i djoungelo nasslepen hi.

¹⁶ Te djal ko lolo mass palpale oun vell parno, palle vell ko mensho pale pash o rashayeste.

¹⁷ Te dikell o rashay, te vas ko lolo mass parno, hi ko mensho bouder gar pale-čiddo. Oun o rashay hounte rakrell vin, te hi lo erligo.

¹⁸ Te phagell pash yekeste i doukepen pre ap leskri hauta, oun vell pale sasto,

¹⁹ oun pal kova vell i hauta ap ko emligo kotar pale pesso oun parno oder parno-te-lolo, palle sikrell lo kova o rashayeste.

²⁰ Te dikell o rashay koy kotar hauta, oun kova hi doureder tele an o mass har i vavar hauta trouyel, oun i balla ap ko doukepen van parno, palle hi kova i djoungelo nasslepen, hoy an o doukepen vin phagas. Palle rakrell ko rashay vin, te hi ko mensho pale-čiddo.

²¹ Te dikell o rashay koy kotar hauta oun dikell kek parne balla, oun koy kotar hauta hi gar doureder tele an o mass har i tseli vavar hauta, oun hi bouder gar yaake parno oder lolo-te-parno, palle pandell o rashay ko menshes efta divessa dren.

²² Te vell ko kotar bareder, palle hi kova i djoungelo nasslepen. Oun o rashay hounte rakrell vin, te hi ko mensho pale-čiddo.

²³ Te vell ko kotar gar bareder, palle hi i doukepen, hoy sasto vas, oun mass hoy kote pale khetne djas. O rashay hounte rakrell vin, te hi ko mensho erligo.

²⁴ Te hatsell pes ap yekeste i kotar hauta, hoy rhačedo vas, oun ko doukepen vell lolo-te-parno oder parno,

²⁵ hounte sikrell lo kova o rashayeste. Te dikell o rashay, te van i balla kote dren parno, oun ko kotar hauta hi doureder tele har i vavar hauta trouyel, palle hi kova i djoungelo nasslepen, hoy an ko kotar hauta, hoy rhačedo vas, vin phagas. O rashay hounte rakrell vin, te hi ko mensho pale-čiddo.

²⁶ Te dikell o rashay kek parne balla ap ko doukepen, oun koy hauta hi gar doureder tele har i tseli vavar hauta, oun hi bouder gar yaake parno, palle pandell o rashay ko menshes efta divessa dren.

²⁷ Ap o eftato dives dikell o rashay ko doukepen pale an. Te vas ko parno kotar bareder, hi kova i djoungelo nasslepen. Oun o rashay hounte rakrell vin, te hi ko mensho pale-čiddo.

²⁸ Te ačas ko doukepen yaake har lo his, oun vas gar bareder, oun hi bouder gar yaake parno, palle hi kova mass, hoy khetne djas pal ko rhačepen. O rashay hounte rakrell vin, te hi ko mensho erligo.

²⁹ Te hi i morshes oder i djouvyat i nasslepen ap o shereskri hauta oder ap i čor,

³⁰ hounte dikell o rashay les peske an. Te hi i hauta kote doureder tele har i vavar hauta trouyel, oun van i balla kote djelto oun sano, palle hi kova i djoungelo nasslepen ap o shero oder ap i čor. O rashay hounte rakrell vin, te hi ko mensho pale-čiddo.

³¹ Te dikell o rashay, kay i balla kote bouder gar kalo hi, ninna te hi i nasseli hauta gar doureder tele har koy vavar hauta trouyel, palle pandell o rashay ko menshes efta divessa dren.

³² Te dikell lo pal kol efta divessa palla, oun koy nasseli kotar hauta vas gar bareder, oun hi gar doureder tele har i vavar hauta, oun kek djelto bal hi koy,

³³ palle hounte činell ko mensho peskre balla troul ko doukepen tele. Oun o rashay pandell les pale efta divessa dren.

³⁴ Te dikell o rashay ap o eftato dives palla, oun ko doukepen vas gar bareder, oun hi gar doureder tele an o mass har i vavar hauta, palle hounte rakrell o rashay vin, te hi ko mensho erligo. Ko mensho hounte thovell peskre koola oun hi erligo.

³⁵ Te vell ko doukepen bareder, pal kova yob erligo kerdo vas,

³⁶ hounte dikell ko rashay les pale. Te dikell o rashay, te vas ko doukepen bareder, hounte rodell o rashay bouder gar pal i balla, hoy djelto van. Pale-čiddo hi lo.

³⁷ Te dikell an i rashayeskre yaka vin, har te vas ko doukepen gar bareder, oun te van kote kale balla vin, palle vas ko mensho sasto. O rashay hounte rakrell vin, te hi lo erligo.

³⁸ Te hi i morshes oder i djouvyat parne kotya ap pengri hauta,

³⁹ hounte dikell o rashay palla, hoy kova hi. Te hi kal kotya gar yaake parno, palle hi kova kek djoungelo nasslepen, hoy an i hauta vin phagas. Pale-čiddo hi ko mensho gar.

^40-41 Te perenn yekeske i balla ap o shero vin, palla oder glan, hi lo doleske gar pale-čiddo.

^42-43 Te hi kote, kay i balla vin peran, palla oder glan, i kotar hauta, hoy parno-te-lolo hi, hounte dikell o rashay pal, hoy kova hi. Hatsell o rashay i pessepen ap koy hauta, kay i balla vin peran, oun ko pessepen hi lolo-te-parno, oun dikell vin har i djoungelo nasslepen,

⁴⁴ palle hi les čačepah kava djoungelo nasslepen ap peskro shero. Pale-čiddo hi lo. Oun o rashay rakrell vin, te hi lo pale-čiddo.

⁴⁵ Ko morsh ap koleste ko djoungelo nasslepen hi, hounte rivell koola, hoy paash hi, oun hounte moukell leskri balla divyes, oun hounte čivell i diklo troul peskri čor, oun dell vin gole: pale-čiddo, pale-čiddo!

⁴⁶ Oun yaake rah, har ko djoungelo nasslepen ap leste hi, hi lo pale-čiddo. Yob djivell kokres, oun krell peskro kheer vin glan koy platsa, kay i vavar menshe djivenn.

Djunglepen ap ripya oun ledertikre koola

^47-49 Te sikrell pes i djoungelo kotar ap i ripen oder ap koola, hoy hi dran bakrengre balla, layna oder ledera, oun ko djoungelo kotar hi zenelo oder lolo, hounte dikell pes kova o rashay an.

⁵⁰ Yob dikell les peske an oun pandell les efta divessa dren.

⁵¹ Ap ko eftato dives dikell lo les pale an. Te vas ko djoungelo kotar bareder, hi kova i djounglepen, hoy hi pale-čiddo.

⁵² Ko ripen oder kol koola, ap kolende ko djounglepen hi, hounte venn pre rhačedo an i yag.

⁵³ Hi vavarčandes, te dikell o rashay ko koova an, oun ko djoungelo kotar vas gar bareder,

⁵⁴ palle penell o rashay, te lenn le ko koova oun thovenn les. Palle pandell lo les o douyto kopo efta divessa dren.

⁵⁵ Pal kol efta divessa dikell les o rashay pale an. Te ačas ko djoungelo kotar koy, hi kava ripen pale-čiddo, ninna te vas ko djoungelo kotar gar bareder. Kava djounglepen rhas pes dren glan oder palla. Doleske hounte vell kava ripen oder kal koola rhačedo.

⁵⁶ Te dikell o rashay, te vas ko kotar, hoy zenelo oder lolo his, bouder gar yaake zenelo oder lolo pal o thopen, palle činell lo les tele dran o ripen oder dran i koola dran bakrengre balla oder layna oder ledera.

⁵⁷ Te sikrell pes ko djounglepen pal kova pale, vell diklo, te hi čomone, hoy doureder djal. Palle hounte vell kava koova rhačedo, kay sikrell pes kava djounglepen ap leste.

⁵⁸ Te hi ko djounglepen bouder gar koy pal o thopen, hounte vell kava koova thodo i douyto kopo. Pal kova hi lo gar pale-čiddo.

⁵⁹ Yaake hounte vell kerdo, te sikrell pes i djoungelo kotar ap i ripen oder ap koola, hoy hi dran bakrengre balla, layna oder ledera, te vell siklo, hi le pale-čiddo oder gar.