3. Mose 12 - O Debleskro Lab 2024 (Sinte-Manouche)

Kava hounte krell i djouvel, kay i čaves ap i phoub anas

¹ O baro Devel penas ap o Mose:

² Pen ap i Israelitarya: Te anell i djouvel i morsh čaves ap i phoub, palle vell li efta divessa pale-čiddo, har an kol divessa, kay lat i djouvyakro koova hi.

³ Ap o orhtato dives vell ko ternepen ap leskro mass činlo.

⁴ Oun yoy ačell 33 (triyanda-te-triin) divessa gomme khere, bis te vell li pale erligo. An kava tsiro taprell li či an, hoy o Debleske hi. Oun an o Debleskro kheer vell li gar, bis te kal divessa trouyel hi.

⁵ Te vell lake i čay boldo, palle vell li douy kourke pale-čiddo, har te vals lat peskri djouvyakro koova. Oun 66 (shob-deesh-te-shob) divessa ačell li khere, bis te vell li pale erligo.

⁶ Pal kal divessa, kay his li pale-čiddo, anell li o rashayeske i bakro, hoy yek bersh hi glan o voudar o Debleskro kherestar. Ninna anell li leske i terni tauba oder i divyi tauba. O bakro vell maredo oun leskro tselo mass vell rhačedo o baro Debleske. Oun i tauba vell maredo, te vell o pale-čiddo koova krik lino.

⁷ O rashay rhačrell kol firhe glan o baro Debleste, te vell koy djouvel pale erligo. Yaake vell o pale-čiddo koova krik lino, hoy ap koy djouvyate his. Yaake hounte krenn i djouvya, kay anan i morsh čaves oder i čay ap i phoub.

⁸ Te hi li yaake čorvelo, te nay anell li kek bakro, palle anell li douy divye taube oder douy terne taube, yek, hoy o baro Debleske rhačedo vell, oun yek, hoy maredo vell, te vell o pale-čiddo koova latar krik lino. Yaake krell o rashay, te vell li pale erligo.