3. Mose 11 - O Debleskro Lab 2024 (Sinte-Manouche)

I pale-čidde firhe

¹ Oun o baro Devel penas ap o Mose oun o Aron:

² Penenn ap i Israelitarya: Kalla hi i firhe, hoy nay rhan kolendar, kay djivenn ap o them:

³ Hako firho, koles pre-phagede pire hi, tseles pre-phagedo hounte venn le, oun hoy o rhapen douy kope rhal, kolen nay rhan.

^4-6 Mank kolende, kay o rhapen douy kope rhan, hi save, hoy hounte rhan t'mer gar: I khamela oun o shoshoy, oun o bergetikro shoshoy. Ninna te rhan le pengro rhapen douy kope, len hi kek pre-phagede pire. Pale-čiddo hi le t'menge!

⁷ Oun o bales hounte rhan gar, ninna te hi les pre-phagede pire. O balo rhal o rhapen gar douy kope. Pale-čiddo vell lo t'menge.

⁸ O mass kek kal firhendar hounte rhan. Vitar gar taprenn len an, te hi le moulo. Pale-čiddo venn le t'menge.

⁹ Kalla hi i firhe, hoy nay rhan t'mer kolendar, kay djivenn an o pani: Halauter, hoy les flosse oun shouppe hi, oun djivell an o baro pani oun an i lengste panya, kova nay rhan t'mer.

¹⁰ Halauter, hoy djivell an o baro pani oun an i lengste panya, oun les hi kek flosse oun kek shouppe, ma rhan! Pale-čiddo vell kova t'menge!

¹¹ Ma rhan leskro massestar! Oun te hi sau firho moulo, vell lo t'menge pale-čiddo.

¹² Lauter, hoy an o pani hi, oun les kek flosse oun kek shouppe hi, vell t'menge djoungeles.

¹³ Kalla hi i čirkle, hoy hounte rhan gar. Kalla venn t'menge pale-čiddo: i adlarya, kay rhan tikne bakre, karhya oun mače;

¹⁴ vavar massengre čirkle

¹⁵ hake korake,

¹⁶ ninna i straussetikre karhya oun i moulengre čirkle, panyeskre meve, oun o habichto oun hake čirkle dran leskri familya;

¹⁷ oun o tikno ratsyakro čirklo, o panyeskro čirklo, hoy kharell cormorano, oun o baro ratsyakro čirklo,

¹⁸ vavar ratsyakre čirkle oun i moulo-massengre čirkle

¹⁹ oun o storko; oun hake mačengre čirkle; oun o vesheskro bashno oun i čirklengre kermuse.

²⁰ Ninna kal tsele tikne firhe, hoy len čirklengre moussya hi oun ap star herya djan, hi t'menge pale-čiddo.

²¹ Kokres kolla kolendar, kay nay stenn, nay rhan t'mer.

²² Yaake nay rhan t'mer hake stepangre.

²³ Kol tsele vavar tikne firhe, kolen čirklengre moussya hi oun ap star herya djan, venn t'menge pale-čiddo.

²⁴ Kalla hi kol firhe, kay hounte taprenn len gar an, te hi le moule: Hakeno, kay taprell savo moulo firho an, kova hi pale-čiddo bis te vell rati.

²⁵ Koon sau moulo firhes hidjrell, hounte thovell peskre koola, oun vell pale-čiddo, bis te vell rati.

²⁶ Kalla hi kol firhe: Hako firho, koles pre-phagede pire hi, kay hi gar tseles pre-phagedo, oun hoy rhal o rhapen gar douy kope. Kal firhe hi t'menge pale-čiddo. Koon taprell les an, vell pale-čiddo.

²⁷ Kol tsele firhe, kay djan ap tatse, hi t'menge pale-čiddo. Koon yekes lendar an-taprell, te hi kova moulo, vell pale-čiddo, bis te vell rati.

²⁸ Kova, kay sau moulo firho hidjrell, hounte thovell peskre koola, oun vell pale-čiddo, bis te vell rati. Kal moule firhe hi t'menge pale-čiddo.

^29-30 Kalla hi i firhe, hoy hi t'menge pale-čiddo mank i tikne firhende, hoy djan pral i phoub: o phoubyakro djouklo, i kermuse, hake aidekse, o gekko, o salamander oun o caméléon.

³¹ Kalla hi t'menge pale-čiddo mank kol tsele tikne firhende. Hakeno, kay len an-taprell, te hi le moulo, vell pale-čiddo, bis te vell rati.

³² Halauter, ap kova sau moulo firho perell, vell pale-čiddo: hako kashteno koova, ninna ripya, fella oun gone, ninna hako kova, koleha yek i boudi krell. Kova lauter hounte vell an o pani čiddo, oun ačell pale-čiddo, bis te vell rati. Pal kova hi ko koova bouder gar pale-čiddo.

³³ Te perell sau moulo firho an i piri, hoy dran čik kerdo vas, palle vell lauter, hoy an koy piri hi, pale-čiddo. Savi piri hounte phagenn t'mer paash.

³⁴ Te vell pani dran savi piri pash i rhapen dino, vell ko tselo rhapen pale-čiddo, ninna hako pipen dran savi piri.

³⁵ Ap lauter, kay sau moulo firho perell, kova vell pale-čiddo. Te perell lo ap i bob, ap kolate peklo oder keredo vell, vell ko bob pale-čiddo, oun t'mer hounte phagenn les tele. Pale-čiddo hi lo t'menge.

³⁶ Kokres te perell i moulo firho an i brounna, kay pani dren hi, palle vell ko pani gar pale-čiddo. Kokres kova, kay taprell ko moulo firhes an, hoy koy dren hi, kova hi pale-čiddo.

³⁷ Te perell sau moulo firho ap djob, hoy vell vin vitsedo ap i phoub, vell ko djob gar pale-čiddo.

³⁸ Te vas pani ap ko djob čoredo, oun palle perell sau moulo firho koy pre, palle vell ko djob t'menge pale-čiddo.

³⁹ Te merell i firho, hoy nay rhan t'mer, oun yek t'mendar taprell les an, kova vell pale-čiddo, bis te vell rati.

⁴⁰ Koon savo firhestar rhal, kova hounte thovell peskre koola, oun vell pale-čiddo bis te vell rati. Koon ko moulo firho hidjrell, kova hounte thovell peskre koola, oun vell pale-čiddo bis te vell rati.

^41-42 Kol tsele tikne firhe, hoy djan pral i phoub, kolla, kay djan ap pengro per, ninna kolla, kay len hi star oun boudeder herya, yon hounte venn pale-čiddo t'menge. Kek rhal len!

⁴³ Ma krenn t'men pale-čiddo sau tikno firheha, hoy rhan.

⁴⁴ Me, o baro Devel, hom t'maro Devel. Kek vavar hi har me. An mande hi kek čilačepen. Oun t'mer hounte djivenn yaake, te vell či tardo mank mande oun t'mende. Ma krenn t'men pale-čiddo ap i tikno firho, hoy djal pral i phoub.

⁴⁵ Me hom o baro Devel, oun anom t'men dran o them Egiptia vin, te vap t'maro Devel. Kek vavar hi har me. An mande hi kek čilačepen. Oun t'mer hounte djivenn yaake har i Debleskre menshe djivenn.

⁴⁶ Kava hi hoy glan činlo hi pral i firhende oun pral i čirklende oun pral halauter, hoy djivell an o pani, oun pral kol firhende, kay djan ap o per oder ap tikne herya pral i phoub.

⁴⁷ Yaake nay djinenn t'mer, hoy pale-čiddo hi oun hoy gar pale-čiddo hi, oun havo firho nay rhan t'mer, oun havo firho nay rhan t'mer gar.