3. Mose 10 - O Debleskro Lab 2024 (Sinte-Manouche)

O Nadab oun o Abihu merenn

¹ Douy morsh čave o Aronestar, o Nadab oun o Abihu, lan hakeno peskro sasterno čaro an o vast, čivan yag dren oun soungepaskro koova, oun djan koleha an o Debleskro plarhteno kheer, te anenn le kova glan o baro Debleste. Kova kran le pestar. O baro Devel penas lenge gar, te krenn le kova.

² Kote djas yag o baro Deblestar vin, oun rhačras len pre. Yon meran kote glan o baro Debleste.

³ O Mose penas ap o Aron: Kava hi, hoy o baro Devel rakras, har penas lo: Kamau, te dikenn kolla, kay venn glan mande, te hom me kokres o čačo Devel. Glan i tsele menshende kamau te vap sharedo. O Aron penas kek lab.

⁴ O Mose das o Mishael oun o Elizafan gole. Kolengro dad his o Ouziel. Kova his o Aroneskro kak. Lenge penas lo: “Avenn kay, hidjrenn t'mare phralen vin dran o Debleskro kheer glan koy platsa, kay i menshe hi!”

⁵ Kol douy van oun hidjran len an lengre rashayeskre gada vin glan koy platsa, kay i menshe his, yaake har o Mose penas.

⁶ O Mose penas ap o Aron oun koleskre vavar douy čavende, o Elazar oun o Itamar: “Moukenn t'mare phralen, kol vavar Israelitaryen, te rovenn le kolenge, kay o baro Devel koy yagah maras. T'mer hounte moukenn gar t'mare balla ap t'maro shero divyes trouyel čiddo, oun hounte tserdenn gar t'mare koola an kotya, te sikrenn, har phares t'mare djia hi. Te krenn kova, hounte merenn. Oun o baro Debleskri rholi vell pral o tselo kheer Israel.

⁷ Ma djan vitar gar krik o voudarestar o Debleskro plarhteno kherestar, te merenn gar. O baro Debleskro djet vas čoredo ap t'mare sherya, te venn leskre rashaya.” Oun yon kran yaake, har o Mose lenge penas.

⁸ O baro Devel penas ap o Aron:

⁹ “Tou oun tire morsh čave, ma piyenn mool oun zorelo pipen, te kamenn an miro kheer te djal, te hounte merenn gar. Ap kova hounte rikrenn t'men oun t'mare čave kanna oun hako tsiro.

¹⁰ T'mer hounte dikenn dren, hoy o baro Debleske hi, oun hoy gar o baro Debleske hi, oun hoy erligo hi oun hoy pale-čiddo hi glan leste.

¹¹ Oun hounte sikrenn i Israelende ko tselo koova, hoy me, o baro Devel, lendar kamau, halauter hoy me o Moseske penom, oun yob lenge doureder penas.”

¹² O Mose penas ap o Aron oun ap koleskre douy morsh čavende, kay leske pral ačan, ap o Elazar oun o Itamar: “Kova, hoy pral ačas ko yarrestar, hoy glan o baro Debleste anlo vas, nay lenn t'menge. Čivenn kek shoutlo yarro koy pashel. Rhan les pash o Debleskri rhačepaskri. Kava rhapen hi i Debleskro rhapen. Kokres i rashaya nay rhan les, oun kek vavar.

¹³ Kava rhapen hi tiro oun tire čavengro kotar kolestar, hoy o baro Debleste rhačedo vell. Doleske rhan les ap i Debleskri platsa. Yaake penas kova mange o baro Devel.

¹⁴ Ko beč oun koy čači palstouni heri, hoy pre hadedo van glan o baro Debleste, hi ninna t'menge. Rhan len khetne t'mare čaventsa oun čentsa ap i vavar platsa, hoy djoudjo hi o Debleske. Kal kotya mass hi tiro kotar oun tire čavengro kotar kol firhendar, hoy i Israelitarya o baro Debleske anan, te rhan le len khetne glan leste.

¹⁵ Glan te rhan t'mer kova, venn koy palstouni heri oun kava beč čiddo pash kol kotya thulepen, hoy rhačedo venn. Kolentsa khetne venn le pre hadedo glan o baro Debleste. Pal kova hi kal kotya mass touke oun tire morsh čavenge. Yaake te vell kova kerdo hako tsireske. Kova penas o baro Devel.”

¹⁶ O Mose rodas koy morsh bouzni, hoy o Debleske anlo vas, te vell i doosh krik lino, oun hatsas vin, te vas lakro mass rhačedo. Kote vas o Mose rhoyedo pral o Elazar oun o Itamar, kol douy čave o Aronestar, oun poučas lendar:

¹⁷ “Hoske rhan t'mer ko mass gar ap i Debleskri platsa? Kava mass vas i firhestar, hoy o baro Debleske anlo vas, oun his i rashayenge kokres, te rhan le les. O baro Devel das les t'mende, te hidjrenn i doosh i Israelendar krik, te vell lauter pale mishto mank lende oun o baro Debleste.

¹⁸ T'mer djinenn, te vas ko firheskro rat gar an o Debleskro kheer dren anlo. Doleske hounte vals ko firho gar rhačedo. Ko mass hounte rhayans t'mer ap i Debleskri platsa. Kova penom t'menge.”

¹⁹ O Aron penas ap o Mose: “Dik, kava dives maran le o baro Debleske ko firho pengri doshake, ninna ko firho, koleskro tselo mass rhačedo vas. Oun hoy djas, dikeh tou! Har nay rhoms kava dives ko firhestar, hoy i doshake maredo vas? Vals kova an o baro Debleskre yaka palle yaake, te dikals lo mishto ap kova?”

²⁰ Har shounas o Mose kova, his kova leske mishto.