3. Mose 1 - O Debleskro Lab 2024 (Sinte-Manouche)

I firho, hoy vell tseles o Debleske rhačedo

¹ Oun o baro Devel das o Moses gole, oun rakras dran o Debleskro plarhteno kheer vin oun penas:

² Rake i Israelentsa oun pen lenge: Te kamell i mensho t'mendar i firhes o baro Debleske te anell, palle lell lo yekes peskre groumyendar, peskre bakrendar oder peskre bouzyendar.

³ Te kamell lo leske i groumni te anell, te vell li leske tseles rhačedo, palle hounte lell lo i morshkani groumni, hoy gar nasselo hi. Oun yob anell lat glan o voudar o Debleskro plarhteno kherestar, te dikell o baro Devel lačes ap leste.

⁴ Oun o morsh čivell peskro vast ap o shero ko firhestar, te dikell o Devel lačes ap leste oun lell leskri doosh, hoy lo ap peste las, krik.

⁵ Palle marell lo kay groumni glan o baro Debleskro kheer. Oun kol rashaya dran o kheer Aron lenn o rat oun čorenn les troul o Debleskri rhačepaskri ap leskre star rigya. Kay rhačepaskri hi tardo glan o voudar o plarhteno kherestar.

⁶ Oun ko morsh, kay anas ko firhes, tserdell leske i hauta tele oun činell les an kotya.

⁷ Oun i rashaya dran o kheer Aron krenn i yag ap i rhačepaskri oun čivenn kasht ap koy yag,

⁸ palle čivenn le kol kotya mass ap kava kasht, ninna o shero oun o thulepen.

⁹ I bouke oun i herya hounte van thodo. Kova krell ko morsh, kay anas ko firhes. Oun o rashay moukell halauter ap i rhačepaskri pre te rhačrell. Yaake hounte vell i firho anlo glan o Debleste, hoy vell leske tseles rhačedo. Oun o lačo soungepen, hoy vell vin, soungell mishto o baro Debleske.

¹⁰ Te kamell yek i bakro oder i bouzni o baro Debleske te anell, te vell ko firho tseles leske rhačedo, palle anell lo i morshkano firho, hoy gar nasselo hi.

¹¹ Oun yob marell les glan o baro Debleste pash koy rhačepaskri, ap koy rig, kay norden hi. Oun i rashaya dran o kheer Aron lenn o rat oun čorenn les troul o Debleskri rhačepaskri ap leskre star rigya.

^12-13 Oun ko morsh činell les an kotya, thovell i bouke oun i herya o panyeha. Oun o rashay čivell kol kotya mass, ninna o shero oun o thulepen ap o kasht pral koy yag, hoy ap i rhačepaskri hi. Oun moukell halauter pre te rhačrell. Yaake hounte vell i firho anlo glan o Debleste, hoy vell leske tseles rhačedo. Oun o lačo soungepen, hoy vell vin, soungell mishto o baro Debleske.

¹⁴ Te kamell yek i čirklo o baro Debleske te anell, te vell ko čirklo tseles leske rhačedo, palle anell lo i divyi tauba oder i vavar tauba.

¹⁵ Oun o rashay anell koy tauba pash i rhačepaskri oun phagell lake o shero tele, rhačrell o shero ap i rhačepaskri, oun moukell o čirkleskro rat vin ratell ap i rig foun i rhačepaskri.

¹⁶ Leskri meen oun kova, hoy an late hi, vitsrell lo vin ap i yagakri čik, hoy pash o rhačepaskri čiddo hi ap koy rig, kay o kham pre djal.

¹⁷ Palle taprell o rashay o čirkleskre moussya oun tserdell o čirkles pre, oun rhačrell les ap i kasht pral i yag, hoy ap i rhačepaskri hi. Yaake hounte vell i čirklo anlo glan o Debleste, hoy vell leske tseles rhačedo. Oun o lačo soungepen, hoy vell vin, soungell mishto o baro Debleske.