3. Johanni 1 - O Debleskro Lab 2024 (Sinte-Manouche)Lačo Gayo 1 Me, i phoureder mank i patslende, činau touke, lačo Gayo, kava liil. Me kamau tout o tselo djiyestar. 2 Lačo phraal, me mangau o Debles, te djal touke mishto, oun te vess sasto yaake, har sasto hal an tiro patsepen. 3 Barhtelo homs, har mare phrala van oun mange penan, har tou ap o čačo drom djah, oun pal o čačepen djiveh. 4 Pral kek vavar koova hom yaake barhtelo, har te shounap, kay mire čave ap o čačo drom djana. Lenn i phrala pre, kay venn pash t'mende! 5 Lačo phraal, tou kreh i lači boudi tire phralenge, ninna te prindjreh len gar. 6 Yon penan toutar glan i patslende, kay kate khetne venna, havo baro kamlepen tout hi. Yon te djan ap pengro drom doureder, de len rhapen oun pipen peha, yaake har kova glan o Debleskre yaka mishto hi. 7 Yon kran pen ap o drom, te penenn le i menshenge o Yezous Kristestar. Oun yon lenn či kolendar, kay les gar prindjrenna. 8 Doleske hounte das mer save phralen kova, hoy len hounte vell djipaske. Yaake boudrah mer lentsa, te vell o Debleskro čačepen i menshenge penlo. 9 Me činom i tikno liil ap i patslende, kay kote khetne venna, kay hal. Yek lendar hi o Diotrefes. Kova kamell o pralstouno mashkral lende te vell, oun shounell gar ap mande. 10 Te vau me pash t'mende, penau me leske, hoy yob lauter kras. Yob anell o rhorhepen pral mende pre. Oun kova hi leske gar doha. Yob lell gar i patsle phralen pre, kay venna pash leste. Oun kolla, kay kamenn len pash pende pre te lell, kolenge penell lo, te krenn le kova gar, oun vitsrell len dran i kangri vin. 11 Lačo phraal, ma kre o čilačepen palla! Kre o lačepen! Kova, kay krell lačo koova, vell o Deblestar. Kova, kay o čilačepen krella, kova prindjrell o Debles gar. 12 O Demetrio krell o lačepen. Lauter rakrenn mishto pral leste. Oun leskro djipen sikrella, te hi lo an o čačepen tardo. Mer ninna penah, kay kova, hoy yob krella, mishto hi. Oun tou djineh, kay kova, hoy mer penah, čačo hi. 13 Me hounte penoms touke yaake boud. Kova kamau gar lauter an i liil te činell. 14 Vals mishto, te dikams men yaake sik, har djala. Koy rakrams nay pral lauter. 15 O Debleskri barht touke! Kol mala pash mande penenn touke “Ač maro Debleha!” Pen lače laba mandar mire malenge, kay pash toute hi, pen kova hakeneske peskro labeha! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.