2. Timoteo 3 - O Debleskro Lab 2024 (Sinte-Manouche)

I menshe venna čilačeder an ko tsiro, hoy vella

¹ Kova hounte djiness tou: Glan ko tsiro, kay i phoub tele djala, vell i pharo tsiro ap i menshende.

² An ko pharo tsiro dikenn i menshe ap pende, te djal lenge kokres mishto. Yon hi pal i love. Yon krenn pen bares. Yon dikenn tele ap i vavarende. Yon rakrenn djoungeles pral o Debleste. Yon shounenn gar ap pengro dadeste oun ap pengri date. Yon parkrenn pen gar ko lačepaske, hoy i vavar lenge kras. Yon djivenn yaake, har te dals kek Devel.

³ Len hi kek dji i vavarenge. Yon venn gar pale lačes pal o čingepen. Yon rakrenn rhorhepen pral o vavareste. Yon hi bipandlo oun doukrenn i vavaren. Yon kamenn kek lačepen.

⁴ Yon hi phoukepangre. Yon venn sik rhoyedo. Yon phourdenn pen pre. Yon kamenn boudeder pengro khelepen har o Debles.

⁵ Kolla krenn yaake, har te vans le patslo. Yon prindjrenn gar koy zoor, hoy vell dran o čačo patsepen. Rike tout save menshendar pale!

⁶ Mashkral lende hi menshe, kay djan an i khera, te taprenn le save djouvyen, kay ladjenn pen glan či, oun ap lende boud doosh hi.

⁷ Kalla djouvya kamenn hako tsiro nevo koova te shounell oun hayvenn gar, hoy o čačepen hi.

⁸ Glan rah tsiro shounan o Yannes oun o Yambres gar ap o Moseste. Yaake shounenn kol menshe vitar gar ap o čačepen. Yon hi nasselo an o shero, oun lengro patsepen hi či moldo.

⁹ An i tikno tsiro dikella hakeno, kay kova dinlepen hi, hoy yon krenna, har kova ninna pash kolla douy morshende vas.

T'mer venna palla lino

¹⁰ Me sikrom tout, har te djas ap o Debleskro drom, oun tou ačal ap leskro drom, oun djival yaake, har me touke glan djivom. Tou kameh kova, hoy me ninna kamau. Tou dikal, har me patsau ap o Yezous Kristeste. Oun tou djineh, har rikrom ap o patsepen. Tou djineh ninna, har kamom i vavaren o djiyestar, oun har rikrom lauter vin.

¹¹ Tou djineh, har lan le man palla an i forya Antiochia, Ikonion oun Listra. Oun tou djineh, have douka yon mange kran. Oun kova lauter rikrom vin. Oun dran lauter kova las man o ray Yezous vin.

¹² Djiness, lauter kolla, kay patsenn ap o Yezous Kristeste oun kamenn te krenn, hoy yob kamella, venn palla lino.

¹³ Kol čilače menshe oun kol rhorhene, kay krenn yaake, har te vans le patslo, kolentsa vell djoungleder oun djoungleder. Yon peran o Debleskro dromestar tele, oun tserdenn ninna vavaren o Debleskro dromestar tele.

O Debleskro lab

¹⁴ Tou, Timoteo, ač pash kova, hoy touke penlo vas, oun hoy tou patseh! Tou djineh, koon touke kova lauter penas.

¹⁵ Tou prindjreh o Debleskro lab foun tiknes pre. Oun ko lab das tout o gosvepen, te hatsal o drom pash o Yezous Kristeste oun hayval, tou hounte patsess ap o Yezous Kristeste, te less ko djipen, hoy gar pre-herella.

¹⁶ Lauter, hoy an o Debleskro lab činlo hi, čivas o Devel an i menshengre djia, te činenn le kova pre. Men hounte vell o Debleskro lab, te sikras i menshende leskro drom, te sikras len lengri doosh, oun hoy te krenn le feteder, oun har te djivenn le i djipen, hoy o Devel kamella.

¹⁷ I mensho, kay kamell o Debleske koy te vell, hatsell an o Debleskro lab lauter, hoy les hounte vell, te nay krell lo lauter yaake, har o Devel kamella.