2. Tessalonikarja 3 - O Debleskro Lab 2024 (Sinte-Manouche)

Mangenn o Debles menge!

¹ Ninna mangau t'mendar, mire phrala: Mangenn o Yezousestar, maro rayestar, menge, te nay penah leskro lab an boud vavar forya, te vell lo kote yaake sharedo, har pash t'mende.

² Mangenn lestar ninna, te dell lo garda ap mende, te nay krenn men kol midjak oun čilače menshe kek čilačepen. Gar hakeno patsell ap o Yezous Kristeste.

³ Maro ray Yezous moukell t'men gar. Yob dell t'men zoor, oun dell garda ap t'mende, te vell kek čilačo koova ap t'mende.

⁴ Yob hi maro oun t'maro ray. Doleske djinah, t'mer krenn, hoy mer t'menge penah, kanna oun an ko tsiro, hoy glan mende hi.

⁵ Maro rayestar, o Yezousestar, mangah, te krell lo t'mare djia pre, te dikenn t'mer, har baro o Debleskro kamlepen t'menge hi. Oun lestar mangah ninna, te denn t'maro patsepen gar pre, ninna te vell t'maro djipen pharo, yaake har o Yezous Kristo gar pre das.

Koon kamell gar te boudrell, kova hounte rhal gar

⁶ Mire phrala, an o lab maro rayestar, o Yezous Kristestar, penah t'menge zoreles: Rikrenn t'men kol phralendar krik, kay kamenn gar te boudrell! Yon djivenn gar yaake, har mer t'menge penam.

⁷ T'mer djinenna, har te djivenn. Djivenn yaake, har mer djivam, har hams pash t'mende! Mer kram mari boudi,

⁸ rham pash kekeste čičeske. O dives oun i rati boudram, te djivas mer gar t'mare lovendar.

⁹ Mer mangams nay t'mendar kova, hoy men hounte vals djipaske, oun kram kova gar. Mer kamam, te dikenn ap maro djipen, har te djivenn.

¹⁰ Ninna har pash t'mende hams, penam t'menge: Kova, kay kamell gar te boudrell, kova hounte rhal vitar gar.

¹¹ Mer shounam, mashkral t'mende hi menshe, kolla kamenn gar te boudrell. Či boudrenn le, oun kova, hoy či moldo hi, krenn le.

¹² Kolenge penah mer an o lab maro rayestar, o Yezous Kristestar, te boudrenn le, te nay ginenn le penge, hoy len hounte vell djipaske.

¹³ T'mer, mire phrala, ma avenn khino te krenn kova, hoy lačo hi!

¹⁴ Yek te krell kova gar, hoy mer an kava liil činam, penenn kova i vavar patslenge, oun rikrenn t'men lestar pale, te vell i ladj pral leste!

¹⁵ Ma dikenn ap leste har ap yekeste, kay kras t'menge čilačo koova. Na-a, yob hi t'maro phraal. Penenn leske, hoy yob gar mishto kras, te vell lo pale ap o čačo drom!

Ačenn o Debleha!

¹⁶ Maro ray Yezous, kolestar vella i tseli barht, kolestar mangau, te dell lo t'men hako tsiro peskri barht an o dji, kote, kay t'mer han. Maro ray Yezous djal t'mentsa lauterentsa!

¹⁷ Kal laba činau miro vasteha: Ačenn o Debleha! Yaake činau an mire tsele lila. Kova sikrell t'men, kava liil vell mandar.

¹⁸ O lačepen maro rayestar, o Yezous Kristestar, djal t'mentsa lauterentsa!