2. Tessalonikarja 1 - O Debleskro Lab 2024 (Sinte-Manouche)

Ap i patslende an o foro Tessalonika

¹ Mer, o Paulo, o Silvano oun o Timoteo, činah kava liil ap t'mende, kol patslende, kay venna khetne an o foro Tessalonika. T'mer patsenn ap o Debleste, maro dadeste, oun ap maro rayeste, o Yezous Kristeste.

² Lačepen oun barht t'menge! Kova dell t'men o Devel, maro dad, oun maro ray, o Yezous Kristo.

O Yezous vell pale

³ Mire phrala, mer hounte parkras men t'menge pash o Debleste hako tsiro, yaake boud lačepen shounam t'mendar. T'maro patsepen vell baro oun bareder. Oun pash t'mende lauterende vell o kamlepen bareder, kay yek o vavareske hi.

⁴ Mer sharah men t'mentsa pash i patslende, kay venn khetne an o Debleskro lab an i vavar forya, oun penah lenge, hoy t'mer lauter ap t'mende lenna, oun te moukenn gar t'maro patsepen, ninna te lenn le t'men palla oun krenn t'maro djipen phares.

⁵ Ap kova lauter dikenn t'mer, kay djal o Devel pal o čačepen ap ko dives, kay rakrell lo o čačepen vin pral i menshende. T'mer, kay lan leske boud pharo koova ap t'mende, lell lo pash peste. T'mer han leske moldo, te djivenn leha khetne an o bolepen.

⁶ Yob djal ninna pal o čačepen, te dell lo kolen i phagi, kay t'men palla lan.

⁷ T'mer, kay venn kanna palla lino, t'men dell lo i bari barht. Kova dell lo t'men mentsa khetne ap ko dives, kay vell maro ray Yezous pale dran o bolepen, oun lauter dikenn les. Leskre zorele bolepangre venn leha,

⁸ oun i yag hi troul lende. Palle vell o Debleskri rholi pral kolende, kay kaman lestar či te djinell, kolla kay shounan gar ap o lačo lab maro rayestar, o Yezousestar, oun kaman gar ap leskro drom te djal.

⁹ Kolla lenn i phagi: Yon djan hako tsireske nashedo, oun nay venn bouder gar pash o Debleste, oun dikenna gar leskro baro raylepen

¹⁰ ap ko dives, kay vell maro ray Yezous pale, te vell lo sharedo peskre menshendar. Oun i tsele patsle dikenn les, oun hi barhtelo pral leste, ninna t'mer, kay patsan ap o Debleskro lačo lab, hoy mer t'menge penam.

Mer mangah o Debles t'menge

¹¹ O Devel rodas t'men vin, te djivenn pash leste. Doleske mangah lestar hako tsiro, te djivenn t'mer kanna yaake ap kay phoub, har yob kova peskre čavendar kamella. Ninna mangah lestar, te dell lo t'men i zoor, te nay krenn o lačo koova, hoy kamenn te krenn dran t'maro patsepen.

¹² Palle vell maro ray Yezous sharedo dran t'mende. Oun leha khetne venn t'mer ninna sharedo. Yaake lačo hi maro Devel oun maro ray, o Yezous Kristo, t'menge.