2. Samuel 9 - O Debleskro Lab 2024 (Sinte-Manouche)

O David lell o Mefi-Boshet an peskro kheer

¹ Oun o David poučas: “Ačas yek djido o Sauleskre menshendar, te krap lačepen ap leste? Kova krau me o Yonataneske.”

² Koy his i boudepaskro dran o Sauleskro kheer. Kova kharas Siba. Koles dan yon gole pash o Davideste. Oun o baro ray David poučas lestar: “Hal tou o Siba?” Penas lo: “Ava miro ray, me hom o Siba.”

³ Penas o baro ray ap leste: “Hi kote gomme yek o Sauleskre menshendar, te krap me o Debleskro lačepen ap leste?” Penas o Siba ap o baro rayeste: “Koy hi gomme i čavo o Yonatanestar, koleskre herya hi bango.”

⁴ “Kay hi lo?” poučas o baro ray. Penas o Siba: “Yob hi an Lo-Dabar, an ko kheer, kay o Makir djivell. Koleskro dad hi o Ammiel.”

⁵ Koy bičras o baro ray David yekes an Lo-Dabar pash o Makir, koleskro dad o Ammiel hi, oun moukas o Mefi-Boshet te lell.

⁶ Leskro dad his o Yonatan oun leskro papo o Saul. Oun har kanna o Mefi-Boshet pash o Davideste vas, vitsras yob pes glan leste tele ap peskro mouy. O David poučas lestar: “Mefi-Boshet?” Penas kova: “Ava miro ray, me hom o Mefi-Boshet.”

⁷ Oun o David penas ap leste: “Ma traash! Me kamau lačepen ap toute te krell. Kova krau tiro dadeske Yonatan. Ko tselo bravlepen tiro papestar Saul kamau touke pale te dell. Oun tou nay rhah hako dives ap miri rhapaskri.”

⁸ Koy moukas o Mefi-Boshet pes ap i phoub te perell glan leste, oun penas: “Miro ray, koon hom me? Hom gar feteder har i moulo djouklo, oun tou hal yaake lačes ap mande!”

⁹ Koy das o baro ray pal o Siba gole, kay o Sauleske boudras, oun penas ap leste: “Lauter, hoy his o Sauleske oun leskri familya, dom me o Mefi-Boshet, ko čaves tiro rayestar.

¹⁰ Kanna boudress tou, tire čave oun tire boudepangre ap leskro kotar phoub. Oun t'mer anenn leske dren, hoy koy pre baro vella, te vell i menshen tiro rayestar rhapaske. Oun o Mefi-Boshet, ko čavo tiro rayestar rhal hako dives ap miri rhapaskri.” O Sibanes his deesh-te-panč morsh čave oun biish boudepangre.

¹¹ Yob penas ap o baro rayeste: “Krau lauter yaake har tou, miro baro ray, mange penal.” Oun o Mefi-Boshet rhas ap o baro rayeskri rhapaskri har te vals lo yek leskre čavendar.

¹² O Mefi-Boshetes his i tikno čavo. Kova kharas Mika. Oun lauter kolla, kay djivan an o kheer foun o Siba, boudran o Mefi-Bosheteske.

¹³ Oun o Mefi-Boshet djivas an o foro Yerusalem oun rhas hako dives ap o baro rayeskri rhapaskri. Oun yob his bango ap hake douy herya.