2. Samuel 7 - O Debleskro Lab 2024 (Sinte-Manouche)

O Devel penell o Davideske: Yek tire čavendar ačell baro ray hako tsiro

¹ Har kanna o baro ray an peskro kheer beshdo his, oun o baro Devel kolen lauteren lestar krik rikras, kay troul leste djivan oun leha čingepen kaman,

² penas yob ap ko Debleskro rakepaskro, o Natan: “Me djivau an i kheer dran cedertikro kasht, oun o Debleskro morhton hi an i plarhteno kheer. Hi kova mishto?”

³ Penas o Natan ap leste: “Dja koy oun kre lauter, hoy tout ap o dji hi! O baro Devel hi pash toute!”

⁴ Oun an i rati penas o baro Devel ap o Nataneste:

⁵ Dja koy oun pen ap miro boudepaskro o David: Yaake penell o baro Devel: “Kameh tou mange i kheer te krell, te djivap koy dren?

^6-7 Me djivom an kek kheer, foun ko dives, kay me kol Israelitaryen vin anom dran o them Egiptia bis kay dives. Man his či har i plarhteno kheer har djom lentsa trouyel. An ko tselo tsiro penom me kekeske, kay das garda ap mire menshende Israel: Hoske kreh tou mange kek kheer dran cedertikro kasht?

⁸ Doleske hounte peness tou ap miro boudepaskro o David: Yaake penell o baro Devel, ko ray pral o bolepen oun i phoub: Me lom tout i bakrendar krik, kay tou pre garda dal, te vess tou ray pral mire menshende Israel.

⁹ Me homs pash toute, kay tou ninna djal, oun marom kolen lauteren glan toute, kay kouran pen touha. Me kamau tiro lab bares te krell, yaake prindjedo har i laba kol bare rayendar ap i phoub.

¹⁰ Oun me kamau mire menshen Israel i them te dell, kay nay ačenn yon. Oun koy djivenn le, kay trashenn yon bouder gar, oun kay venn yon gar bouder tele rikedo kol čilače menshendar, har an ko tsiro,

¹¹ kay rodom me čačepangre raya mire menshenge vin. Me rikrau lauteren kolen toutar krik, kay kamenn te kourenn pen touha. Me, o baro Devel, penau touke, tou kreh mange kek kheer. Me krau touke i kheer.

¹² Te hi tiro tsiro trouyel, oun tou mereh, hadau yekes tire čavendar, kay pal toute venna, te vell lo baro ray, oun ačell kova.

¹³ Kova krell mange i kheer. Oun me krau te ačell lo hako tsiro baro ray.

¹⁴ Me kamau leskro dad te vell. Oun yob vell miro čavo. Oun yob te krell i čilačo koova, dau me les i phagi, yaake har menshe i phagi denna.

¹⁵ Miro lačepen lau gar lestar krik, har me miro lačepen o Saulestar krik lom, koles krik lom, te vess tou baro ray.

¹⁶ Hako tsiro hi tout čave, kay pal toute venna, oun yek lendar hi baro ray glan mande. Oun tiro rayengri beshepaskri ačell hako tsiro.”

¹⁷ Har o Natan kol tsele laba, hoy o Devel leske sikras, o Davideske penas,

¹⁸ djas o baro ray David an o Debleskro plarhteno kheer, čivas pes tele glan o baro Debleste oun penas: “Baro Devel, miro ray, koon hom me, oun hoy hi miro kheer, kay tou kral yaake boud mange?

¹⁹ Oun kanna hi kova touke gar doha. Baro Devel, miro ray, tou penal mange, hoy mire čavende kameh te dell, ninna an ko tsiro, hoy dour glan mende hi. Oun tou moukeh kova man, i menshes, te djinell.

²⁰ Oun hoy nay rakrau me, tiro boudepaskro, gomme boudeder? Tou baro Devel, miro ray, djineh, hoy an miro dji hi.

²¹ Pal tiro lab oun pal tiro dji kral tou ko tselo baro koova, oun penal kova mange, tiro boudepaskro.

²² Baro Devel, miro ray, har baro hal tou! Kek hi yaake har tou! Oun dell kek devel har tou, pal lauter, hoy mer mare kandentsa shounam.

²³ Oun kay hi menshe ap i phoub har tire menshe Israel? Kolenge djal tou koy, te less len dran o pandepen vin, te venn le tire menshe. Ko baro oun zorelo koova, hoy tou lenge kral, kras, te val prindjedo ap i phoub. Tou tradal vavar menshen lengre deblentsa vin glan tire menshende, kay tou vin lal dran Egiptia, te venn le tire.

²⁴ Tou rodal touke kol menshen Israel vin, te venn yon tire menshe hako tsiro, oun tou, baro Devel, val lengro Devel.

²⁵ Mo ray oun baro Devel, mouk kanna ko lab tardo ačell hako tsireske, hoy tou pral mande oun pral miro kheer penal, oun kre yaake, har tou penal!

²⁶ Palle vell tiro lab sharedo an hake tsirya, oun i menshe penenna: O baro Devel, ko ray pral o bolepen oun i phoub, hi o Israeleskro Devel. Oun o kheer David, kay tiro boudepaskro hi, ačell tardo glan toute.

²⁷ Tou, baro Devel oun ray pral o bolepen oun i phoub, kay hal o Israeleskro Devel, tou sikral man, hoy kameh te krell – oun penal mange: Me krau touke i kheer. Doleske lom man khetne oun rakrom yaake ap toute.

²⁸ Baro Devel, miro ray, tou hal o čačo Devel. Oun tire laba hi o čačepen. Oun kanna dal tou man tiro lab, te dess ko tselo lačo koova mande, kay hom tiro boudepaskro.

²⁹ Kanna čip tiri barht pral mande oun mire menshende, te ačenn le glan toute hako tsiro, yaake har tou baro Devel, miro ray, rakral. Mouk te vell tiri barht oun tiri zoor ap mire menshende hako tsiro!”