2. Samuel 6 - O Debleskro Lab 2024 (Sinte-Manouche)

O David lell o morhton, kay o Debleskre deesh laba dren hi, an o foro Yerusalem

¹ Oun o David las pale kol tsele terne lourden khetne: triyanda zerya morsha.

² Oun djas lentsa an o foro Baala, an ko them Youda, te anell yob kotar o Debleskro morhton vin, kay o Debleskre deesh laba dren hi. Ko morhton vas kharedo pal o baro Debleste, ko rayeste pral o bolepen oun i phoub. Kova hi beshdo pral i bolepangre, kay kharenna Keroubim.

³ Yon lan ko morhton dran o kheer, kay o Abinadab djivas. Ko kheer his ap i tikni berga. Oun čivan o morhton ap i nevo vourdin. O Abinadabeskre čave, o Ouza oun o Ahio, djan o vourdineha,

⁴ kay o morhton pre his. O Ahio djas glan.

⁵ Oun o David oun i tsele menshe an Israel khelan barhteles glan o baro Debleste, givan gilya, oun kran bashepen ap doryengre bashepangre, ap tikne pauke oun ap vavar bashepangre.

⁶ Har van le pash ko djobeskri platsa o morshestar Nakon, perans i groumya, oun o Ouza rikras o morhton, te perell lo gar.

⁷ Kova hounte krals lo gar. Yob hounte tapras gar i Debleskro koova an. Koy vas o baro Debleskri rholi pral o Ouza. Oun o Devel maras les koy. Oun yob meras koy pash o Debleskro morhton.

⁸ Koy vas o David rhoyedo, kay o baro Devel o Ouzaes yaake krik las. Doleske kharell koy platsa Perez-Ouza gomme kay dives.

⁹ Oun o David trashas o baro Deblestar ap ko dives, oun penas: “Har nay lau me o baro Debleskro morhton pash mande?”

¹⁰ Oun yob moukas les gar pash peste te anell an o Davideskro foro. Na-a, yob moukas les an ko kheer te anell, kay djivell o Obed-Edom. Kova his i morsh dran o foro Gat.

¹¹ Yaake ačas o baro Debleskro morhton triin čon an koleskro kheer. Oun o baro Devel čivas peskri barht oun zoor ap leste oun ap leskro tselo kheer.

¹² Oun o baro rayeske David vas penlo, kay čivas o baro Devel peskri barht oun zoor ap o Obed-Edomeskro kheer, oun ap lauter, hoy les his, doleske, kay o Debleskro morhton pash leste hi. Koy djas o David koy oun las o Debleskro morhton dran o kheer foun o Obed-Edom, oun anas les an o Davideskro foro i barhtelo djiyeha.

¹³ Har kol hidjepangre, kay hidjran o Debleskro morhton, shob kope yek heri glan i vavar čivan, rhačran yon i gouroum oun i thoulli terni groumni o Debleske.

¹⁴ O David khelas peskri tseli zoryah glan o baro Debleste. Oun troul leste his les i rashayeskri layntikri damdira.

¹⁵ O David oun i tsele menshe dran Israel anan o baro Debleskro morhton pral an o foro Yerusalem, oun dan gole i barhtyatar oun bashran ap i phourdepangre.

¹⁶ Oun har o Debleskro morhton an o Davideskro foro anlo vas, dikas i Mikal, kolakro dad o Saul his, dran i vorhni, oun dikas o baro rayes o David, har yob khelas oun stas glan o Debleste, oun an lakro dji dikas li tele ap leste.

¹⁷ Har yon o Debleskro morhton dren anan, čivan yon les ap leskri platsa mashkral an o plarhteno kheer, hoy o David leske pre čivas. Oun o David rhačras firhen o baro Debleske, oun maras vavar firhen, te rhan le len khetne glan o baro Debleste.

¹⁸ Oun pal kova rakras lo pral i menshende i barht o baro Deblestar vin, kay o ray pral o bolepen oun i phoub hi.

¹⁹ Oun yob das hako menshes, kay kote hi, morshen oun djouvyen, hakenes, yek maro, yek kotar mass oun yek drakengri merkli. Koy pal djan i tsele menshe khere, hakeno an peskro kheer.

²⁰ Oun o David vas khere, te penell lo peskre menshenge lačo dives oun te poučell lo lendar, har lenge djala. Oun i Mikal, o Sauleskri čay, djas vin pash leste, oun penas: “Havo raylepen his ko baro rayes pral Israel kay dives, har rivas yob pes vin glan kol djouvyende, kay leskre pralstunenge boudrenn, yaake har pen kol vi-ladjede menshe vi-rivenna!”

²¹ O David penas ap i Mikal: “Me khelom, te sharap o baro Debles. Yob rodas man vin glan tiro dadeste oun leskri familya, te krell yob dran mande o ray pral leskre menshende, o Israel. Doleske kamau doureder glan leste te khelell,

²² oun kamau gomme tikneder te vell har kanna, oun či te vell an mire yaka. Pash kol djouvyende, kolendar tou rakral, vau an-diklo.”

²³ Oun i Mikal, o Sauleskri čay, kolat his kek ternepen an peskro tselo djipen.