2. Samuel 4 - O Debleskro Lab 2024 (Sinte-Manouche)

O Ish-Boshet vell maredo

¹ Har shounas o Sauleskro čavo, o Ish-Boshet, kay o Abner an o foro Hebron maredo vas, peras leskro dji an peskre rholopya, oun ap o tselo Israel vas traash.

² Douy leskre morshendar his pralstoune pral i lourdende. Ko yek kharas Baana, ko vavar Rekab. Lengro dad his o Rimmon dran o foro Beerot dran o kheer Benyamin. O foro Beerot his ninna an o them Benyamin.

³ Kolla kay glan lende an Beerot djivan, nashan penge an Gittayim, oun his koy vi-themarya bis kay dives.

⁴ Ninna o Sauleskro čaves, o Yonatanes, his i čavo. Kova his bango ap hake douy herya. Yob his panč bersh har leskro papo, o Saul, oun leskro dad, o Yonatan, marede van an Yesreel. Har kova leskri familya shounas, hadas les koy djouvel pre, kay ap leste yak das, oun nashas peske. Oun har yoy sik krik nashas, peras yob, oun his bango foun ko tsiro. Yob kharell Mefi-Boshet.

⁵ Koy djas o Rekab oun o Baana, kolengro dad o Rimmon hi, dran o foro Beerot, oun van pash ko kheer, kay o Ish-Boshet djivell. His ko tsiro, kay o dives tateder hi. Oun o Ish-Boshet sovas pal o rhapen ap peskro čiben.

⁶ Oun yon djan mashkral an o kheer har te lans le djob,

⁷ oun hatsan o Ish-Boshetes ap peskro čiben čiddo an peskri isema. Oun yon dan les moulo čourye, dan leskro shero tele, oun lan leskro shero, oun djan i tseli rati an o telstouno them, kay o pani Yordan nashell.

⁸ Oun anan ko shero pash o baro rayeste, o David, an o foro Hebron, oun penan ap leste: “Dik, kava hi ko shero foun o Ish-Boshet. Leskro dad, o Saul, kras touke čilačepen oun kamas tout te marell. Kava dives das o baro Devel o Sauleskre menshende pale, hoy o Saul ap toute, maro baro rayeste, kras.”

⁹ Koy penas o David: “Me dau man sovel pash o djido Debleste, kay las man vin dran hako čilačepen:

¹⁰ Ko bičepaskro, kay mange penas: O Saul hi moulo, oun patsas, kay yob lače labentsa vas, koles dom moulo an o foro Siklag. Yaake playsrom les peskre lače labenge.

¹¹ T'mer čilače menshe kran i djoungleder koova har kova kras! T'mer dan i morshes moulo, kay pal o čačepen djivas, oun dan les moulo an leskro kheer ap leskro čiben. T'mer hounte playsrenn leskro rateske! T'mer han bouder gar moldo te djivenn ap kay phoub.”

¹² Oun o David penas ap peskre lourdende: “Denn len moulo!” Kolla dan len moulo, oun dan lengre vasta oun herya tele. Oun pandan len pre pash o pani an o foro Hebron! O shero foun o Ish-Boshet lan yon oun paskran kova an o moulengro kheer, kay o Abner paskedo hi an o foro Hebron.