2. Samuel 22 - O Debleskro Lab 2024 (Sinte-Manouche)

O David parkrell pes pash o baro Debleste i gilyah

¹ O David rakras glan o baro Debleste kol laba koy gilyatar an ko tsiro, kay o baro Devel les vin las dran i vasta lauterendar, kay kaman les te marell, ninna dran o Sauleskre vasta. Oun yob penas:

² Baro Devel, tou hal mange har i baro zorelo bar, kay nay khatrau man, har i zorelo kheer, kay nay krell kek mange čilačepen.

³ Miro Devel, tou hal kova, pash koleste nay vau oun man khatrau. Tire vasta rikreh tou pral mande. Tou hal ko zorelo ap miri rig, oun hal mange har i zorelo kheer pral ap i berga. Tou kreh miro djipen sasto, oun kreh, te doukrell man kek.

⁴ Me sharau o baro Debles! Te dau ap leste gole, lell lo man vin dran i vasta kolendar, hoy mange čilačepen kamenna.

⁵ O merepen pandas man an peskre shelle, oun merepaskri daar djas pral mande har zorele panya.

⁶ I moulengro them pandas peskre shelle troul mande, oun o merepaskre shelle tserdan man tele.

⁷ An miri daar kharom ap o baro Debleste. Ava, bari gole dom ap miro Debleste. An peskro raylo kheer shounas lo man, oun miri gole vas glan leskre kanda.

⁸ Koy trissas i phoub, pral oun tele djas o bolepen o Debleskri bari rholyatar.

⁹ Yagakro dourho djas dran leskro nak pre, baro tatepen vas dran leskro mouy vin, ninna yag das karye lestar vin.

¹⁰ Oun yob tserdas o bolepen ap i rig, oun vas tele. Kali rat his tel leskre herya.

¹¹ Oun yob beshas ap i keroub oun hadas pes har i čirklo; ava, yob moukas pes te hidjrell ap i moussya o dourhestar.

¹² Kali rat his leskro ripen. Pesse kale volke his troul leste.

¹³ Dran o raylepen glan leste peran barra hoy rhačran.

¹⁴ Oun o baro Devel moukas o bolepen bari gole te dell, ava, o Devel pral halauter moukas pes te shounell bari golyah.

¹⁵ Oun yob das yag karye dran o bolepen kate te kote, oun tradas i volke krik.

¹⁶ Kote vas o telstunepen tel i panya diklo, oun i telstouni phoub vas pre-čakedo, har tou, baro Devel, čingral oun trad dal an tiri rholi.

¹⁷ Dran o bolepen tapras man tiro vast, oun tserdas man dran o baro pani vin.

¹⁸ Tou lal man vin dran o vast kol zorelendar, kay kaman miro merepen, ava, dran ko vast kolendar, kay his yaake rhoyedo ap mande oun boud zorleder har me.

¹⁹ Ap o dives, kay i bibarht pral mande vas, peran le pral mande. Koy vas o baro Devel ap miri rig.

²⁰ Yob las man vin dran lengre vasta oun anas man an i bourhlo them. Yob kamell man, doleske kras lo kova.

²¹ O baro Devel djinas, te homs an o čačepen tardo. Doleske kras lo mange lačepen. Kek doosh his ap mande. Doleske his lo mange lačo.

²² Me rikrom man ap i dromma o baro Deblestar, oun moukom gar miro Debles.

²³ Ava, leskro tselo čačepen hi glan mire yaka, oun rikrau ap lauter, hoy yob kamell, te krap.

²⁴ Yaake te hatsell lo či ap mande, kay nay čingrell lo mantsa, oun dau yak, te vell kek doosh ap mande.

²⁵ Miro čačepen his glan leskre yaka. Oun kek doosh his ap mande. Doleske kras o baro Devel mange lačepen.

²⁶ Tou rikreh ap koleste, kay ap toute rikrell, oun kreh, hoy mishto hi koleske, kay krella, hoy tou lestar kameh.

²⁷ Tou hal lačo ap koleste, kay hi lačo ap i vavarende oun hal gosveder har kova, kay ap bange dromma djal.

²⁸ Tou veh ap i rig i čorvelenge, oun kol pre-phourden kreh tou tiknes.

²⁹ Ava, tou baro Devel, hal miri momeli, oun kreh miri rati yaake har vals dives.

³⁰ Ava, khetne touha nay djau me an o kourepen. Khetne miro Debleha nay stau me pral bare pre-čidde barra.

³¹ I tsele dromma, kay o Devel man anella, hi lačo. Leskre laba hi lačo oun čačo. Yob rikrell peskro vast pral hakeneste, kay vell pash leste.

³² Yek kokres hi o Devel. Kova hi o baro Devel. Yek kokres hi har i baro zorelo bar menge, kay nay khatrah men. Kova hi maro Devel.

³³ Yob hi kova, kay dell man zoor oun krell i lačo drom glan mande.

³⁴ Yob krell mire herya yaake sik, har te vans le i herya i vesheskri groumyatar, te vap zoreles tardo ap i pralstoune berge.

³⁵ Yob sikrell man, har mire vasta hounte kourenn pen, oun har miri moussi rikrell o sasterno bogo.

³⁶ Baro Devel, tou rikreh tiro vast pral mande, te doukrell man kek. Tou dikeh lačes ap mande oun kreh man bares.

³⁷ Tou kral, te nay stakrau zoreles pre, oun kral mange o drom dour pre.

³⁸ Me lom kolen palla, kay ap mande pre djan, oun vom zorleder har yon, oun moukom gar tele, bis te his le moulo dino.

³⁹ Me marom len yaake, te nay stan le gar bouder pre, oun stakrom len tel mire herya.

⁴⁰ Tou dal man i zoor, te nay kourom man lentsa oun vitsral kolen ap i phoub glan mande, kay hadan pen ap mande.

⁴¹ Tou kral, te hounte nashan le mandar. Yaake nay marom kolen, kay mange čilačepen kaman.

⁴² Yon dikan pal yekeste, kay lenge ap i rig vell. Oun kek his koy. Ap o baro Debleste dan le gole, oun yob rakras gar pale ap lende.

⁴³ Oun me dom len khetne, dom len tiknes har čik, hoy i baro dourho krik phourdell. Ava, har ap čik ap i dromma stakrom len khetne.

⁴⁴ Tou lal man vin dran o čingepen mire menshentsa, oun kral man o ray pral i menshende dran vavar themma, Menshe, kolen me gar prindjrom, boudrenn mange.

⁴⁵ I vi-themarya rakrenn shoukar ap mande, oun shounenn ap mande oun krenn sik, hoy penau.

⁴⁶ Len hi bouder kek zoor an pende. Daryah venn le dran pengre zorele rayengre khera vin.

⁴⁷ O baro Devel djivella! Les sharau: har i baro zorelo bar hi lo mange. Miro Debles hadau: yob moukell man gar – hako tsiro dell lo yak ap mande,

⁴⁸ oun kras man zorleder har kolla, kay kouran pen mantsa, oun vitsras i menshen dran vavar themma tel mande.

⁴⁹ Tou lal man vin dran i vasta kolendar, kay kaman miro merepen. Tou hadal man pral kolende, kay hadan pen ap mande, oun moukal man gar an i čilače vasta.

⁵⁰ Doleske sharau tout mank kolende, kay hi gar tire menshendar, baro Devel, oun givau gilya touke.

⁵¹ Tou kreh baro koova o Davideske, koles tou vi-rodal, te vell lo o baro ray. Oun hal yaake lačes ap leste oun kolende, kay lestar venn. Tiro kamlepen lenge ačell hako tsireske.