2. Samuel 12 - O Debleskro Lab 2024 (Sinte-Manouche)

O Natan penell o Davideske zorele laba, oun o Davides khaytell peskri doosh

¹ Oun o baro Devel bičras peskro rakepaskres, o Natanes, pash o David. Yob vas pash leste oun penas ap leste: “His douy morsha an i foro. Ko yek his bravelo, ko vavar čorvelo.

² Ko braveles his boud bakre oun groumya.

³ Ko čorveles his či har i tikno bakro. Kova ginas yob peske, das les te rhal, oun kova vas baro leskre čaventsa. Ko tikno bakro rhas leskro rhapastar, piyas dran leskro čaro, oun sovas ap leskre herya. Ko tikno bakro his leske har peskri čay.

⁴ Har pash ko braveleste yek vas, kamas lo gar yek peskre bakrendar te marell, vitar gar yek peskre groumyendar, te krell lo koleske čomone te rhal, kay pash leste vas. Na-a! Yob las ko bakro ko čorvelestar, oun kras koleske i rhapen, kay vas pash leste.”

⁵ Koy las o David i bari rholi pral ko morsheste, oun penas ap o Nataneste: “Me dau man sovel pash o djido Debleste: Ko morsh, kay kova kras, hounte vell maredo.

⁶ Ninna hounte playsrell yob star kope yaake boud ko bakreske, hoy lo las, doleske, kay his les kek dji o čorveleske.”

⁷ “Tou hal ko morsh”, penas o Natan ap leste. “Oun kova penell o baro Devel, o Devel pral o Israel: Me makom tout djeteha, te vess baro ray pral o Israel. Me lom tout dran o Sauleskre vasta vin,

⁸ oun dom tout o kheer tiro rayestar, ninna leskre romyen, oun krom tout baro ray pral o kheer Israel oun o kheer Youda. Te vals kova gar doha, nay doms tout gomme boud vavar koova.

⁹ Hoske rikral tout gar ap miro lab? Hoske kral, hoy gar mishto hi glan mire yaka? O Uriya, ko Hetares, dal o rhareha moulo. Leskri romyat lal tou, te vell yoy tiri romni. Oun tou čival les kote an o kourepen, kay i Ammonarya les moulo dan.

¹⁰ An tire yaka his miro lab či moldo, har lal tou touke koy romyat foun o Uriya, te vell li tiri romni. Kanna vell o rharo ap tiro kheer gar bouder krik lino.

¹¹ Yaake penell o baro Devel: Me moukau bibarht pral toute te vell, hoy vell dran tiri familya. Oun kamau tire romyen toutar krik te lell glan tire yaka, oun dau len i vavareste, te sovell kova pash lende mashkral ap o dives.

¹² Tou kral kova čorrhanes. Me krau kova glan o tselo Israel oun mashkral ap o dives.”

¹³ Koy penas o David ap o Nataneste: “Me anom doosh ap mande, oun krom i čilačo koova ap o baro Debleste.” Penas o Natan: “Kanna las o baro Devel tiri doosh toutar krik, oun tou mereh gar.

¹⁴ Yek phagi leh tou. Dran kava koova, hoy kral, rakrenn kolla djoungeles pral o baro Debleste, kay les gar kamenna. Doleske merell ko ternepen, kay touke boldo vella.”

O Davideskro ternepen merell

¹⁵ Oun o Natan djas khere. Oun o baro Devel moukas kol ternepas phares nasselo te vell, hoy o Uriyeskri romni o Davideske ap i phoub anas.

¹⁶ Oun o David rodas o Debles kol ternepaske oun rhas či. Oun te vas yob khere, his yob i tseli rati ap i phoub čiddo.

¹⁷ Koy van kol phoureder dran leskro kheer oun kaman les pre hadell i phoubyatar. Oun yob kamas gar, oun rhas vitar gar lentsa.

¹⁸ Ap o eftato dives meras ko ternepen. Oun o Davideskre boudepangre trashan, te penenn leske, kay ko ternepen moulo hi. Yon penan penge: “Har ko ternepen djivas, rakram mer o Davideha, oun yob shounas gar ap mende. Har nay penah mer leske kanna, kay ko ternepen moulo hi? Yob kamals bouder gar te djivell.”

¹⁹ Har o David dikas, kay leskre boudepangre lokes rakran, hayvas yob, kay ko ternepen moulo hi, oun penas ap peskre boudepangre: “Hi ko ternepen moulo?” “Ava”, penan le.

²⁰ Koy stas o David i phoubyatar pre, thovas pes, makas pes dren, rivas vavar koola ap peste, oun djas an o baro Debleskro kheer, oun mangas o Debles an. Pal kova djas lo khere oun moukas pes rhapen te anell, oun rhas.

²¹ Koy penan leskre boudepangre ap leste: “Hoy kreh tou koy? Har ko ternepen djivas, rhal oun piyal tou či, oun roval. Kanna, kay meras lo, steh tou pre oun rhah.”

²² Koy penas yob ap lende: “Har ko ternepen djivas, rhom oun piyom či oun rovom. Me penom mange: O baro Devel nay krell mange peskro dji pre, oun moukell ko ternepas te djivell.

²³ Kanna hi yob moulo. Hoske hounte rhap oun piyap či? Nay krau les djido? Yek dives vella, kay djau pash leste. Yob nay vell gar pale pale pash mande.”

O Salomo vell boldo

²⁴ Oun o David penas kamle laba ap peskri romyate Batsheba. Oun yob djas pash late oun sovas lah. Oun yoy anas i čavo ap i phoub. Koles das lo ko lab Salomo. Oun o baro Devel kamas les,

²⁵ oun moukas peskro rakepaskro Natan o Davideske kova te penell. Doleske das o Natan les ko lab Yedidja. Kova kharell: O baro Devel kamell les.

O foro Rabba vell dren lino

²⁶ Yaake kouras pes o Yoab oun leskre lourde ko foreha Rabba, ko baro foreha kol Ammonendar, oun las ko foro dren, kay lengro baro ray djivell.

²⁷ Oun yob bičras morshen pash o Davideste, oun moukas leske te penell: “Me kourom man ko foreha Rabba, oun las ko kotar dren, kay o pani nashell.

²⁸ An kanna tire vavar lourden khetne oun ab lentsa kay, te čivenn yon pen troul ko foro! Koure tout oun le tou ko foro dren, te penell nay kek, kay me kova homs!”

²⁹ Yaake las o David kol tsele lourden khetne, djas koy, oun kouras pes ko foreha Rabba oun las les dren.

³⁰ Oun las leskro baro rayeske peskro shereskro sonakay tele. Kova his 35 (triyanda-te-panč) kilogramme pharo oun ap leste his kouč barra. Oun kava shereskro sonakay čivan yon ap o Davideskro shero. Oun yob anas boud bravlepen dran ko foro krik.

³¹ Kol menshen dran ko foro anas lo vin. Oun kolla hounte boudran phares ap i činepangre, te činenn le bar, oun ap i sasterne tover oun vavar sasterne koola, oun moukas len boudrenn pash o bob, kay venn barra dran čik rhačedo. Yaake kras yob kol tsele foryentsa kol Ammonendar. Pal kova djas o David peskre tsele lourdentsa pale an o foro Yerusalem.