2. Samuel 10 - O Debleskro Lab 2024 (Sinte-Manouche)

O David das i Ammonaryen

¹ Pal ko tsiro meras o baro ray pral kol Ammonarya. Oun leskro čavo, o Hanoun, vas baro ray pal leste.

² Koy penas o David: “Me kamau o čaveha o Nahashestar, o Hanoun, maal te vell, yaake har leskro dad miro maal his.” Oun o David bičras morshen koy, oun moukas leske lendar kamle laba te penell pral leskro dadeste, te vell leske gar bouder ropaske. Har kanna kolla, kay o David bičras, an ko them Ammon van,

³ penan kol pralstoune pral kol Ammonarya ap pengro rayeste, o Hanoun: “Patseh tou čačepah, kay bičras o David morshen, te sharenn le tiro dades glan tire yaka, oun te penenn le touke kamle laba pral leste? Patseh tou gar, kay yob doleske morshen pash toute bičras, te dikell yob pal, har zorelo maro foro hi, oun hoy koy glan djala, te lell lo les dren oun krell les paash?”

⁴ Koy tapras o Hanoun kolen, kay o David bičras, oun moukas lenge i čor paash tele činell, oun i koola paash tele činell, bis tel lengri pereskri dori, oun moukas len te djal.

⁵ Kova his i bari ladj kol morshenge. Har o Davideske kova penlo vas, bičras yob morshen pash lende, oun moukas lenge te penell: “Ačenn an o foro Yericho, bis te t'mari čor pale bares vas! Koy pal avenn pale!”

⁶ Har kol Ammonarya dikan, kay kran le o Davides moulo rhoyedo, ginan le lourden dran vavar themma: 20.000 (biish-zerya) Syrarya dran o foro Bet-Rehob oun dran o foro Soba, 1.000 (yek zero) lourde o baro rayestar pral o them Maaka, 12.000 (deesh-te-douy-zerya) lourde dran o them Tob.

⁷ Har kova o David shounas, bičras yob o Yoabes pash lende peskre tsele lourdentsa.

⁸ Oun kol Ammonarya djan vin an o kourepen, oun ačan tardo pash ko baro voudar lengro forestar. Kol Syrarya dran Soba, dran Rehob, dran Tob oun dran Maaka his kokres penge tardo ap i kotar phoub.

⁹ Oun o Yoab dikas, kay kolla kaman pen leha te kourell, oun van foun glan oun pal. Koy rodas yob peskre feteder morshen vin, oun moukas len pen pre te čivell glan kol Syrarya.

¹⁰ Kol vavar lourden čivas yob tel o vast peskro phralestar Abishay, te kourenn pen kolla kolentsa dran o them Ammon.

¹¹ Oun penas ap leste: “Te hi kol Syrarya zorleder har me, veh tou ap mari rig. Te hi kol Ammonarya zorleder har tou, vau me ap tiri rig.

¹² Ma dare, te ačas mer gar kol zorleder! Kouras men mare menshenge oun kol foryenge maro Deblestar! O baro Devel krella, hoy mishto hi an leskre yaka.”

¹³ O Yoab vas kol lourdentsa, kay pash leste hi, te djan le ap i Syrarya pre. Kolla nashan penge lendar.

¹⁴ Har kol Ammonarya dikan, kay kol Syrarya nashan, nashan yon ninna glan o Abishay an o foro dren. Koy moukas o Yoab tele kol lourdendar dran o them Ammon, oun vas an o foro Yerusalem.

¹⁵ Har kol Syrarya dikan, kay yon i Israelendar dino his, lan le pengre tsele lourden khetne.

¹⁶ Oun o Hadad-Eser bičras morshen pash i Syrarya, kay djivenn vergel o pani Eufrat, oun moukas len gole te dell, te djan le an o kourepen. Kolla van an o foro Helam. Glan lende djas lengro pralstouno, o Shobak.

¹⁷ Oun o Davideske vas kova penlo. Oun yob las i tsele Israelitaryen khetne, oun djas pral o pani Yordan, oun yon van an o foro Helam. Oun kol Syrarya čivan pen tardo, te kourenn le pen o Davideha.

¹⁸ Oun kol Syrarya hounte nashan penge i Israelendar. Oun o David maras lendar 700 (efta-sheel) morshen, kay ap i kourepangre vourdya his, oun 40.000 (star-deesh-zerya) lourden. Oun o Shobak, ko pralstouno lourdo, rhas dava, yaake kay yob koy meras.

¹⁹ Oun kol tsele bare raya, kolengro pralstouno o Hadad-Eser hi, dikan, kay i Israelitarya i zorleder hi pral lende. Koy moukan le tele, te kourenn le pen lentsa. Oun o Israel las penepaske pral lende. Oun kol Syrarya trashan, te venn le doureder ap i rig kolenge dran o them Ammon.