2. Rajengro liil 9 - O Debleskro Lab 2024 (Sinte-Manouche)

O Yehou vell baro ray pral Israel

¹ Oun o Debleskro rakepaskro, o Elisa das yekes kol terne Debleskre rakepangren gole, oun penas ap leste: “Čip i pereskri dori troul toute, oun le ko khoro, kay djet dren hi, touha, oun dja an ko foro Ramot an Gilead!

² Te veh tou koy, hatseh ko morshes Yehou, koleskro dad o Yosafat hi, oun koleskro dad o Nimshi hi. De les vin gole dran kolende, kay pash leste hi! Oun dja leha an i palstouni isema!

³ Le ko khoro, kay djet dren hi, čore kova pral leskro shero oun pen: Yaake penell o baro Devel: Me makau tout kava djeteha, te vess baro ray pral o Israel. Koy pal kre o voudar pre oun naash touke yaake sik har djala!”

⁴ Oun ko terno Debleskro rakepaskro djas an o foro Ramot an o them Gilead.

⁵ Oun har yob koy vas, his kol pralstoune kol lourdendar koy khetne beshdo. Oun yob penas: “Tou pralstouno, touke kamau čomone penell.” Koy poučas o Yehou: “Koneske mendar?” Kova penas: “Touke, pralstouno!”

⁶ Koy stas yob pre oun djas an o kheer dren. Oun o Debleskro rakepaskro čoras ko djet ap leskro shero oun penas ap leste: “Kova penell o baro Devel, ko Devel pral o Israel: Me makau tout kava djeteha dren, te vess baro ray pral mire menshende, i Israelende.

⁷ Oun tou maress kol menshen, kay venna tiro rayestar Ahab. Yaake dau len i phagi ko rateske, hoy ratas, har maras i Isebel mire boudepangren, mire rakepangren oun kol tsele vavaren, kay mange koy his.

⁸ Ava, kamau, te venn kol tsele morsha maredo, kay venna pal o Ahab, i terne har i phoure.

⁹ Oun me kamau, te djal i menshenge, kay van pal o Ahab, yaake har kol menshenge, kay van pal o Yerobeam, koleskro dad o Nebat his, oun har kol menshenge, kay van pal o Baasha, koleskro dad o Ahia his.

¹⁰ Oun i Isebel, i djoukle rhan lat pre ap ko kotar them pash Yesreel oun kek hounte paskrell lat.” Oun har yob kova penas, kras lo o voudar pre oun nashas peske.

¹¹ Oun har o Yehou vin djas pash kol menshende leskro rayestar, poučan le lestar: “Hi čomone? Hoske vas ko dinelo pash toute?” “Či”, penas yob. “T'mer prindjrenn kol morshes, kova rakrell dinelo koova.”

¹² Yon penan: “Tou rhorheh men. Pen menge o čačepen!” Koy penas yob lenge, hoy o Debleskro morsh leha rakras, oun har lo penas: “Yaake penell o baro Devel: Me makom tout kava djeteha dren, te vess baro ray pral o Israel.”

¹³ Koy las sik hakeno peskri plaashka, čivas lat glan leste ap kol pralstoune barra ko dromestar. Yon phourdan an i phourdepaskri oun dan gole: “O Yehou hi baro ray!”

O Yehou marell i bare rayen Yoram oun Ahasya

¹⁴ Oun o Yehou, koleskro dad o Yosafat oun koleskro papo o Nimshi hi, hadas pes pral o baro ray Yoram oun kamas gar, te ačell o Yoram baro ray. [Glan yek tsiro djas o Yoram khetne kol tsele lourdentsa dran Israel pash ko foro Ramot an Gilead, te kourell lo pes o baro rayeha pral o them Syria, o Hasael.

¹⁵ An ko kourepen vas o baro ray Yoram ratles dino. Doleske vas yob pale an o foro Yesreel, te moukell lo pes sasto te krell kol davendar, hoy kol Syrarya les dan.] Oun o Yehou penas: “Te kamenn t'mer pash mande rikrell, palle moukenn kekes dran o foro te nashell, te nay djal yob an o foro Yesreel oun penell kote, hoy kay djas.”

¹⁶ Oun yob djas ap peskro vourdin oun ouleras an o foro Yesreel. Kote his o Yoram čiddo. Oun o Ahasya, ko baro ray pral Youda, vas tele, te djal lo pash o Yoram.

¹⁷ Pral ap ko turmo an Yesreel his yek tardo, kay dell yak. Kova dikas kol kourepangre vourdya, kolentsa o Yehou vas, oun penas: “Me dikau lourden.” Koy penas o Yoram: “Biče i klissepaskres pash lende, te poučell yob: Avenn t'mer an o lačepen?”

¹⁸ Oun ko klissepaskro klissas koy oun penas: “O baro ray poučell: Avenn t'mer an o lačepen?” O Yehou penas: “Hi kova tiro koova? Dja pal mande oun am mantsa!” Kova, kay yak das, penas: “Ko bičepaskro vas pash lende koy oun vell gar pale.”

¹⁹ Koy bičras o Yoram o douyto klissepaskro. Har kova pash lende vas, penas yob: “O baro ray poučell: Avenn t'mer an o lačepen?” O Yehou penas: “Hi kova tiro koova? Dja pal mande oun am mantsa!”

²⁰ Pale penas kova, kay yak das: “Yob vas pash lende oun vell gar pale. Oun koy hi yek, kay oulerell har i divyo, har o Yehou, koleskro dad o Nimshi hi.”

²¹ Koy penas o Yoram: “Čivenn i graya glan o vourdin!” Oun yon čivan i graya glan leskro vourdin. Oun kol douy bare raya, o Yoram, ko ray pral Israel, oun o Ahasya, ko ray pral Youda, ouleran hakeno ap peskro vourdin pash o Yehou. Oun yon tapran pen ap ko kotar them, hoy his o Nabotes dran Yesreel.

²² Har o Yoram o Yehou dikas, poučas yob: “Avenn t'mer an o lačepen?” Koy penas lo: “Hoy – an o lačepen? Har nay vah an o lačepen yaake rah har tiri day, i Isebel, sharell moule deblen oun krell bengeskro koova?”

²³ Koy rissras pes o Yoram trouyel, das an i herya oun das gole ap o Ahasya: “Phoukepen, Ahasya!”

²⁴ O Yehou tapras peskro bogo oun das o Yorames mashkral i phika karye, yaake kay djas ko faylo an leskro dji. Oun o Yoram phagas khetne an peskro vourdin.

²⁵ O Yehou penas ap peskro lourdeste, o Bidkar: “Le les pre oun vitse les ap ko kotar them, hoy his ko morshes Nabot dran Yesreel! Mange vas an o shero, hoy o baro Devel ap o Yorameskro dad, o Ahab, penas, har ouleram mer douy ap i vourdin pal leste.

²⁶ O baro Devel penas leske: Me dikom har taysar o Nabot oun leskre čave moulo dino van. Kate ap leskro kotar them dau tout pale, hoy tou leske kral. Doleske penau touke: Le les oun vitse les koy! Yaake vell kova, har o baro Devel penas.”

²⁷ Har o Ahasya, ko baro ray pral Youda dikas, hoy djas, nashas yob pash o foro Bet-Gan. O Yehou las les palla oun moukas les ninna te marell ap o vourdin. Oun yon dan ap leste karye ap ko drom pash o foro Gour, kay pash o foro Yibleam čiddo hi. Oun yob nashas peske an Megiddo oun meras koy.

²⁸ Oun leskre lourde anan les an Yerusalem oun paskran les an leskro moulengro kheer pash leskre phourende an o Davideskro foro.

²⁹ Har o Yoram, o Ahabeskro čavo, an o deesh-te-yekto bersh baro ray pral o Israel his, vas o Ahasya baro ray pral o them Youda.

I rani Isebel vell maredo

³⁰ Har o Yehou an o foro Yesreel vas, oun i Isebel kova shounas, kras yoy peskre yaka shoukar oun peskre balla ap o shero rayles, oun dikas dran i vorhni vin.

³¹ Oun har o Yehou tel ko foreskro voudar vas, penas yoy: “Djal mishto, tou Simri, kay peskro rayes moulo das?”

³² Yob dikas pral pash i vorhni oun das gole: “Koon hi ap miri rig?” Koy dikan douy, triin pralstoune boudepangre ap leste tele.

³³ “Vitsrenn la tele”, penas yob. Koy vitsran le i Isebel tele. Oun lakro rat peras ap i massouri oun ap i grayende. Oun yob ouleras pral late.

³⁴ Palle djas yob dren, rhas oun piyas. Pal o rhapen penas lo: “Dikenn pal koy bibarhtliate oun paskrenn lat! I baro rayeskri čay hi li.”

³⁵ Har yon kote djan, te paskrenn le lat, hatsan yon latar či har i kokale o sherestar, i heryendar oun i vastendar.

³⁶ Oun yon van pale oun penan kova ap o Yehou. Koy penas yob: Kova vas yaake, har moukas o baro Devel peskro boudepaskres glan-vi te penell. Yob, o Eliya dran Tishbe, penas: “Ap o kotar them glan Yesreel rhan i djoukle i Isebelakro mass.

³⁷ Oun yoy vell har firhengro foul ap o them pash Yesreel. Kek penell nay bouder: Kova hi i Isebel.”