2. Rajengro liil 7 - O Debleskro Lab 2024 (Sinte-Manouche)

¹ O Elisa penas: “Shounenn ap o baro Debleskre laba! Kava penell o baro Devel: Taysar an kava tsiro nay gineh an o foro Samaria i bari piri lačo yarro, hoy playsreh yek roupeni bema, ninna douy pirya djob, kolenge playsreh yek roupeni bema.”

² Ko pralstouno lourdo, kay čivas pes o baro ray ap leskri moussi, penas ap ko Debleskro morsheste: “Ninna te krals o baro Devel gomme kava dives o bolepen pre oun dals brishin, har nay djal kova?” O Elisa penas: “Tire yakentsa dikeh tou kova, oun či rhah tou kolestar.”

³ Glan ko foreskro voudar his star morsha, kolen i djoungelo nasslepen ap pengro mass hi. Oun yek penas ap o vavareste: “Hoske ačas mer kay bis te merah?

⁴ Ninna te kamah mer an o foro te djal, hi koy i menshen či rhapaske, oun mer hounte meras koy. Oun te ačah mer kay, merah ninna. Mer djah pash i lourdende dran Syria. Te moukenn yon men djido, djivah mer. Krenn yon men moulo, yaake ham mer moulo.”

⁵ Oun har i rat vas, djan le, te venn le pash kol lourdende dran Syria. Oun har yon kote van, his kek bouder koy.

⁶ O baro Devel kras, te shounenn kol Syrarya i bari gole, har te venn boud lourde grayentsa oun kourepangre vourdyentsa. Oun yon rakran yek ap o vavareste: “Shounenn, ko baro ray pral Israel čivas pes khetne kol bare rayentsa pral kol Hetarya oun pral kol Egiptarya, te perenn le khetne pral mende.”

⁷ Oun har i rat vas, nashan yon sik penge oun moukan lauter yaake tardo har his: pengre plarhtene khera, pengre graya, bourika, oun dan an i herya, te venn le gar maredo.

⁸ Kol morsha, kay nasselo ap pengro mass hi, van glan ap koy platsa, djan an yek plarhteno kheer, rhan, piyan oun lan roup, sonakay oun koola, djan krik oun khatran kova, van pale, djan an i vavar plarhteno kheer, lan lauter vin oun khatran kova ninna.

⁹ Koy penas yek ap o vavareste: “Kova hi gar mishto, hoy mer krah. Kay dives hi i baro dives. Men hi lače laba te penell. Te rikrah mer kal laba menge oun penah len gar doureder bis te vell taysarlakro, palle anah doosh ap mende. Avenn, mer djah pale an o foro pash o baro rayeste, te penas kote, hoy djas.”

¹⁰ Oun yon djan pale pale pash o foro, dan kolen gole, kay denn garda ap o foreskro voudar, oun penan lenge: “Mer vam pash koy platsa, kay kol Syrarya his. Koy his kek, oun kek menshes shounam. Kol graya oun bourika his koy an-pandlo oun kol plarhtene khera koy tardo.”

¹¹ Oun kolla, kay denn garda ap o foreskro voudar, dan yekes gole, te djal yob pash o baro rayeskro kheer oun penell kova kote.

¹² Oun o baro ray stas an i rati pre oun penas ap kol pralstunende, kay troul leste hi: “Kamau t'menge te penell, hoy kol Syrarya mentsa krenna. Yon djinenn, kay bokah. Doleske moukan le pengri platsa oun khatran pen ap i kotar them, oun penan penge: Te venn i Israelitarya vin dran o foro, taprah len djides, oun djah an o foro dren.”

¹³ Koy penas yek kol pralstunendar: “Le panč kol grayendar, kay ačan pral an kava foro! Biče morshen lentsa vin, te djinas, hoy koy glan djala. Ninna te rikrah len kay, djal lenge yaake har kol tsele vavar graya, kay meran.”

¹⁴ Koy lan le douy vourdya i grayentsa. Oun o baro ray bičras len pal kol lourdende dran Syria, oun penas: “Djan koy oun dikenn, hoy djas!”

¹⁵ Oun yon djan lenge palla bis pash o pani Yordan, oun dikan, kay ap o drom ripya oun vavar koova čiddo hi, kay kol Syrarya an o sikepen krik vitsran. Oun har kol bičepangre pale van oun kova o baro rayeske penan,

¹⁶ djan kol menshe dran o foro ap i platsa, kay i Syrarya his, oun čoran lendar lauter krik. Oun lauter vas yaake har o baro Devel penas: Yek bari piri yarro vas yek roupeni bema, oun douy pirya djob ninna yek roupeni bema.

¹⁷ Ko baro ray bičras ko pralstouno lourdes, kay čivell lo pes ap leskri moussi, pash o foreskro voudar. Oun kote pash ko baro voudar stakran kol menshe an leste yaake, kay meras lo, har ko Debleskro morsh kova penas, har o baro ray pash leste vas.

¹⁸ Oun kova vas lauter yaake har o Debleskro morsh o baro rayeske penas. Yob penas: “Taysar an kava tsiro venn douy pirya djob yek roupeni bema oun yek piri yarro vell yek roupeni bema an o foro Samaria.”

¹⁹ Oun koy pre penas ko pralstouno lourdo ap ko Debleskro morsheste: “Ninna te krals o baro Devel gomme kava dives o bolepen pre oun dals brishin, har nay djal kova?” Oun o Elisa penas koy pre: “Tire yakentsa dikeh tou kova, oun či rhah tou kolestar.”

²⁰ Yaake vas kova pral leste: Kol menshe stakran les khetne pash ko baro voudar yaake, kay meras lo.