2. Rajengro liil 3 - O Debleskro Lab 2024 (Sinte-Manouche)

I Israelitarya kourenn pen i menshentsa dran Moab

¹ O Ahabeskro čavo, o Yoram, vas o baro ray pral o them Israel, har o Yosafat 18 (deesh-te-orhta) bersha o baro ray pral o them Youda his. O Yoram djivas an o foro Samaria, oun his 12 (deesh-te-douy) bersha baro ray pral o them Israel.

^2-3 Oun yob kras, hoy glan o baro Debleskre yaka djoungeles his, oun kras savo koova har o Yerobeam kras, koleskro dad o Nebat his. Kova anas i Israelitaryen o Debleskro dromestar tele, te mangan le vavar deblen an. Ninna te moukas o Yoram len kova ninna te krell, his lo gar yaake čilačo har peskro dad oun peskri day. Yob las kol pre-čidde barra krik, hoy leskro dad o debleske Baal kras.

⁴ O Mesha, ko baro ray pral i Moabarya, koles his boud bakre oun hounte das ko baro rayes pral Israel sheel zerya terne bakre oun o bakrengro bal sheel zerya morsh bakrendar.

⁵ Har o Ahab meras, peras o baro ray pral kol Moabarya tele o baro rayestar pral Israel.

⁶ Oun sik djas ko baro ray Yoram dran Samaria vin oun las peskre tsele lourden dran Israel khetne,

⁷ oun bičras lourden pash o Yosafat, ko baro rayeste an o them Youda oun moukas leske te penell: “Ko baro ray pral kol Moabarya peras tele mandar. Am mantsa, te djas mer khetne ap lende pre!” O baro ray pral o them Youda penas: “Me kamau te vell. Me hom har tou. Oun mire menshe hi har tire menshe. Oun mire graya hi har tire graya.”

⁸ O Yoram penas: “Havo drom djas mer?” “Ko drom vergel o nango them Edom”, penas o Yosafat.

⁹ Yaake djan kol douy bare raya pral Israel oun pral Youda vin pengre lourdentsa. Ninna o baro ray pral Edom peskre lourdentsa djas lentsa. Har yon efta divessa dour djan, his kol lourden oun ko firhen, kay pash lende his, kek pani.

¹⁰ Koy penas ko baro ray pral Israel: “Havi bibarht! O baro Devel das men triin rayen kate gole, te dell lo men an i vasta kol menshendar Moab!”

¹¹ O Yosafat penas: “Hi kek baro Debleskro rakepaskro kay, te poučell kova menge o baro Deblestar?” Koy penas yek kol morshendar ko baro rayestar pral Israel oun penas: “Kate hi o Elisa, koleskro dad o Shafat hi. Yob boudras o Eliyeske, čoras leske o pani ap i vasta.”

¹² O Yosafat penas: “Palle nay penell lo menge, hoy o baro Devel mendar kamell.” Oun o Yosafat djas pash leste kol douy vavar bare rayentsa, ko baro ray pral Israel oun o baro ray pral Edom.

¹³ O Elisa penas ap o baro ray pral Israel: “Hoy djah tou man an? Dja pash kol Debleskre rakepangre, kolendar tiro dad oun tiri day i lab poučan!” “Na-a”, penas o baro ray pral Israel ap leste, “o baro Devel das men triin rayen kay gole, te dell lo men an kol vasta i menshendar Moab.”

¹⁴ O Elisa penas: “Me dau man sovel pash o baro Debleste, ko rayeste pral o bolepen oun i phoub, koleske boudrau, kova hi čačo, te sharoms me gar o baro rayes pral Youda, o Yosafates, dikoms gar ap toute pre.

¹⁵ Kanna, anenn mange i bashepaskro!” Oun har ko bashepaskro ap i doryengri bashepaskri bashras, vas o baro Debleskri zoor ap o Elisa,

¹⁶ oun yob penas: “Kova penell o baro Devel: Hadenn phoub vin kate oun kote an kay tala!

¹⁷ Ninna te shounenn t'mer kek dourho oun dikenn kek brishin, vell kay tala pherdo pani. Oun t'mer oun t'mare firhe nay piyenna.

¹⁸ Kova hi kek baro koova o baro Debleske. Yob dell ninna kol Moabarya an t'mare vasta.

¹⁹ Lengre tsele zorele oun kouč forya lenn t'mer dren. Oun kol tsele lače rouka denn t'mer trouyel, oun krenn pandlo i tsele brounne, kay nashell pani vin, oun čivenn barra ap lengri harhetikri phoub, yaake kay nay vell či bares pre.”

²⁰ O vavar dives taysarlakro, an ko tsiro, kay rhačran le rhapen o Debleske, vas pani i berge Edom tele. Oun ko them vas pherdo pani.

²¹ Har i Moabarya shounan, kay kol triin bare raya pengre lourdentsa pre van, te kourenn le pen lentsa, dan yon i tsele morshen khetne gole, kay phouro doha his, kay nay djan an o kourepen, oun anan len pash i themeskri rig, kay o them Israel vell.

²² Oun har yon taysarlakro pre stan, oun o kham pre djas pral o pani, dikas kova i lourdenge dran Moab doural yaake vin, har te vell ko pani lolo har rat.

²³ Oun yon penan: “Kova hi rat. Kol bare raya maran pen o rhareha, oun yek maras kol vavares. Kanna, Moab dja koy oun le touke, hoy kameh!”

²⁴ Oun har yon pash koy platsa van, kay i Israelitarya his, van kolla vin, oun dan kol Moabaryen. Oun yon nashan krik lendar. Oun i Israelitarya lan len palla oun dan len.

²⁵ Lengre forya kran le paash, oun yon vitsran barra ap haki lači harhetikri phoub, yaake kay koy phoub i barrendar čakedo vas. Oun kol brounna kran le pherdo čik, oun hako lačo rouk dan le trouyel. Kokres i pre-čidde barra troul o foro Kir-Heres ačan tardo. Troul o tselo foro his vitsepangre tardo oun vitsran barra ap leste.

²⁶ Har ko baro ray pral kol Moabarya dikas, kay nashrell lo o kourepen, las yob 700 (efta-sheel) lourden peha, kay kourenn pen nay o rhareha, oun kamas lentsa te nashell kote, kay o baro ray pral Edom peskre lourdentsa tardo hi. Kova djas lenge gar.

²⁷ Koy las yob peskro phoureder čaves, kay vals pal leste baro ray, maras les, oun rhačras les ap kol pre-čidde barra, hoy troul o foro hi. Koy vas i bari rholi pral o Israel, yaake kay tserdan yon pen pale, oun djan pale an pengro them.