2. Rajengro liil 22 - O Debleskro Lab 2024 (Sinte-Manouche)

O baro ray Yosia pral Youda

¹ O Yosia his orhta bersha, har vas lo baro ray; oun yob his 31 (triyanda-te-yek) bersha baro ray an o foro Yerusalem. Leskri day kharas Yedida, lakro dad his o Adaya dran Bozkat.

² Oun yob kras, hoy mishto hi glan o baro Debleskre yaka, oun djas o drom, kay leskro phouro dad o David ninna djas, oun peras gar kava dromestar tele, gar ap i čači rig oun vitar gar ap i servi rig.

³ Oun har o Yosia an o deesh-te-orhtato bersh baro ray his, bičras lo o Shafan, kay i lila činas, an o baro Debleskro kheer. O Shafaneskro dad his o Azalya oun leskro papo his o Meshoullam. Oun o Yosia penas:

⁴ “Dja pral pash o baro rashayeste o Hilkiya, te dikell lo palla, har boud kol love hi, hoy an o baro Debleskro kheer anlo vas, hoy kol morsha, kay ap o voudar garda denna, i menshendar dren lan.

⁵ Oun o rashay mou dell kol love kol morshenge an o vast, kay pral i boudepangre tardo hi, kay ap o baro Debleskro kheer boudrenna, te krenn le kova pale neves, hoy ap o kheer paash djas.

⁶ Kal loventsa hounte venn kol morsha playsedo, kay boudrenn o kashteha, ninna kolla, kay čivenn i barra pre. Ninna kasht oun činle barra venna dre-ginlo kol loventsa.

⁷ Kol pralstoune boudepangre krenn pengri boudi an o čačepen. Doleske hounte poučell o rashay lendar gar, hoy le kol tsele loventsa kran.”

⁸ Har o Shafan kova lauter o baro rashayeha Hilkiya rakras, penas kova ap leste: “Me hatsom i liil an o baro Debleskro kheer, kay menge o Debleskro drom siklo vella.” Oun o Hilkiya das ko liil o Shafaneste, oun kova draveras les.

⁹ Oun djas pash o baro rayeste oun penas leske, har halauter djas, oun penas: “Tire boudepangre, i rashaya, lan kol tsele love vin, hoy an o baro Debleskro kheer his, oun dan len kol morshenge ap o vast, kay pral kolende hi, kay boudrenna an o baro Debleskro kheer.”

¹⁰ O Shafan penas o baro rayeske ninna: “O rashay Hilkiya das man i liil.” Oun o Shafan draveras ko liil glan o baro rayeste.

¹¹ Yaake vas, har o baro ray i laba dran ko liil shounas, kras lo peskre koola paash, kay ap leste his.

¹² Oun o baro ray kharas kol morshen khetne: o rashay Hilkiya, o Ahikam, ko his i čavo o Shafanestar, o Akbor, koleskro dad o Mikaya hi, o Shafan, kay činas i lila, oun o Asaya, ko his i pralstouno an o baro rayeskro kheer. Oun o baro ray penas lenge:

¹³ “Djan koy oun poučenn o baro Debles mange oun i menshenge an o them Youda, pral kol laba an ko liil, hoy hatslo vas. Mare phoure shounan gar ap kol laba, hoy kote tardo hi, oun djivan gar yaake, har kote tele činlo hi. Doleske hi o baro Debleskri rholi bares ap mende čiddo.”

¹⁴ Kote djan o rashay Hilkiya, o Ahikam, o Akbor, o Shafan oun o Asaya pash i Debleskri rakepaskretsa Houlda. Koya djivas an o nevo kotar o forestar Yerusalem. Lakro rom his o Shalloum. Leskro dad his o Tikva. Koleskro dad his o Haras. O Shalloum das garda ap o ripyengro kheer. Oun kol morsha rakran lah.

¹⁵ Yoy penas ap lende: Kava penell o baro Devel, ko Devel pral o Israel: Penenn ko morsheske, kay t'men pash mande bičras:

¹⁶ Kava penell o baro Devel: “Me anau čilačepen pral kava foro oun pral i menshende, kay kate djivenn. Ko tselo koova, hoy an ko liil tardo hi, oun hoy moukas peske o baro ray pral Youda glan te draverell, anau pral t'mende.

¹⁷ I menshe an Yerusalem moukan man oun anan vavar aseblenge firhen, te rhoyrenn le man halautereha, hoy le pengre vastentsa kran; doleske vell miri rholi har i yag ap kava foro, oun kek nay krell les vin.”

¹⁸ Ko baro rayeske pral o them Youda, kova kay t'men pash mande bičras, te poučenn o baro Debles, nay penenn: Kava penell o baro Devel, ko Devel pral o Israel: “Tou shounal kol laba an kava liil.

¹⁹ Oun kral tiro dji lenge pre. Oun kral tout tiknes glan o baro Debleste, har tou shounal, hoy me penom pral kava foro oun kol menshende, kay kate djivenna, te djal lenge yaake djoungeles, te ačell vavar menshenge o rakepen krik i trashatar. Oun kova, kay kamell te vell i bibarht pral i vavareste, penella: Touke te djal, har djas o foreske Yerusalem! Har tou kova shounal, kral tire koola paash, kay ap toute his, oun roval glan mande. Doleske shounom me tout ninna”, penell o baro Devel.

²⁰ “Oun anau kay bibarht gar pral kava foro yaake rah har tou djiveh. Tou dikeh lat gar tire yakentsa. Me moukau tout an o lačepen te merell. Oun tou veh paskedo an o moulengro kheer tire phourendar.” Oun kol morsha penan kal laba o baro rayeske.