2. Rajengro liil 2 - O Debleskro Lab 2024 (Sinte-Manouche)

O Eliya vell an o bolepen hadedo

¹ O dives vas, kay kamas o baro Devel o Eliyas an i zorelo phourdepen an o bolepen te lell. O Eliya oun o Elisa djan dran Gilgal krik.

² Oun o Eliya penas ap o Elisa: “Ač tou kay, o baro Devel bičras man an o foro Betel.” O Elisa penas: “Me dau man sovel pash o djido Debleste. Yaake har čačo hi, kay tou djiveh, me moukau tout gar kokres.” Oun har yon an Betel van,

³ djan o Debleskre rakepangre, kay kote djivan, vin pash o Elisa, oun penan ap leste: “Djineh tou ninna, kay o baro Devel kava dives tiro rayes toutar krik lella?” Koy penas yob: “Kova djinau me. Ačenn!”

⁴ Oun o Eliya penas ap leste: “Elisa, ač tou kay, man bičras o baro Devel, te djap an Yericho.” Yob penas: “Me dau man sovel pash o djido Debleste. Yaake har čačo hi, kay tou djiveh, me moukau tout gar kokres.” Oun har yon an Yericho van,

⁵ van kol Debleskre rakepangre, kay kote djivan, vin pash o Elisa, oun penan ap leste: “Djineh tou ninna, kay o baro Devel kava dives tiro rayes toutar krik lella?” Koy penas yob: “Kova djinau me. Ačenn!”

⁶ Oun o Eliya penas ap leste: “Ač tou kay, man bičras o baro Devel pash o pani Yordan.” Koy penas yob: “Me dau man sovel pash o djido Debleste. Yaake har čačo hi, kay tou djiveh, me moukau tout gar kokres.” Oun kol douy djan ko drom khetne.

⁷ Har his le pash o Yordan tardo, van paash-sheel Debleskre rakepangre koy oun ačenn i kotar dour krik tardo.

⁸ Koy las o Eliya peskri plaashka, čivas lat khetne oun das koy peha ap o pani. Koy djas o pani ap douy rigya, yaake kay kol douy ap trouk phoub vergel djan.

⁹ Oun har yon vergel van, penas o Eliya ap o Elisa: “Mang mandar, hoy krap touke, glan te vau toutar krik lino!” O Elisa penas: “De man douy kotya tiri Debleskri zoryatar.”

¹⁰ O Eliya penas: “Tou mangal pharo koova. Te dikeh tou, har me krik lino vau, leh tou kova. Te dikeh man gar, leh tou kova gar.”

¹¹ Oun har yon yaake djan oun khetne rakran, koy vas i yagakro vourdin i grayentsa dran yag oun djas mank lende. Oun i phourdepen hidjras o Eliya an o bolepen.

¹² O Elisa dikas kova oun das gole: “Miro dad, miro dad, tou baro kourepaskro i Israelenge!” Oun dikas les gar bouder. Koy tapras yob peskre koola oun phagas len an douy kotya,

¹³ oun hadas o Eliyeskri plaashka pre, hoy peras lestar tele, djas pale pale pash o Yordan,

¹⁴ oun las koy plaashka, das ap o pani oun penas: “Kay hi kanna o baro Devel, ko Devel, koleske o Eliya boudras?” Oun das ap o pani. Koy djas o pani ap douy rigya, oun o Elisa djas ap i vavar rig.

¹⁵ Oun har dikan kova kol Debleskre rakepangre, kay ap i vavar rig pash Yericho his, penan yon: “Koy zoor o Eliyestar hi ap o Elisa čiddo.” Oun yon djan pash leste oun peran glan leste tele ap i phoub.

¹⁶ Oun penan ap leste: “Mer ham tire boudepangre. Mashkral mende hi paash-sheel zorele morsha. Kolen mouk te djal, te rodenn le tiro rayes. Kova nay vas yaake, kay las o baro Debleskro dourho les oun vitsras les ap i berga oder an i tala.” Koy penas yob: “Na-a, moukenn len gar te djal!”

¹⁷ Yon rakran i zoryah ap leste dren, bis te yob palla das oun penas: “Mouk len koy te djal!” Oun yon bičran kol paash-sheel morshen koy. Oun kolla rodan triin divessa pal o Eliya, oun hatsan les gar.

¹⁸ Oun yon van pale an o foro Yericho, kay o Elisa gomme his. Oun yob penas ap lende: “Penom me t'menge gar, te djan gar koy?”

O Elisa krell o pani djoudjo

¹⁹ Oun kol morsha an ko foro Yericho penan ap o Elisa: “Maro ray, tou dikeh, an kava foro djivah nay mishto. Kokres o pani hi gar mishto, oun krell, te venn i čave moules boldo.”

²⁰ Koy penas yob: “Anenn mange i nevo čaro oun čivenn loon dren!” Oun yon anan leske kova.

²¹ Koy djas yob vin pash ko pani, čivas ko loon dren oun penas: “Yaake penell o baro Devel: Me krom ko pani djoudjo, oun kek merell bouder koy pre oun kek čave venn bouder moules bolde.”

²² Yaake vas ko pani djoudjo bis kava dives, yaake har o Elisa kova penas.

Tikne čave san pral o Elisa

²³ Oun yob djas pre an o pralstouno them pash Betel. Koy van tikne morsh čave dran ko foro, san pral leste oun dan ap leste gole: “Nango shero, am kay pral, nango shero am pral!”

²⁴ Yob rissras pes trouyel, oun har yob len dikas, praasas yob len an o baro Debleskro lab. Koy van douy bere dran o veesh oun dandran star-deesh-te-douy kol morsh čavendar an kotya.

²⁵ Kotar djas yob doureder oun vas ap koy berga Karmel. Palle djas lo pale pale an o foro Samaria.