2. Rajengro liil 16 - O Debleskro Lab 2024 (Sinte-Manouche)

O Ahas krell o baro Debleskro kheer pale-čiddo

¹ Har o Peka, koleskro dad o Remalya his, an o 17. (deesh-te-eftato) bersh baro ray pral Israel his, vas o Ahas o baro ray pral o them Youda. Leskro dad his o Yotam.

² Biish bersha phouro hi o Ahas, har lo baro ray vas; oun 16 (deesh-te-shob) bersha his lo baro ray, oun djivas an ko tsiro an o foro Yerusalem. Leskro phouro dad, o David kras, hoy glan peskro baro Debleskre yaka mishto hi. Kova kras o Ahab gar.

³ Na-a, yob djas ap kol dromma, kay kol bare raya dran o them Israel ninna djan. Ninna moukas lo peskro čaves an i yag te rhačrell, yaake har kova kol menshe kran, kay o baro Debles gar prindjrenn oun savo djoungelo koova krenn. Kolen tradas o baro Devel glan i Israelitarya dran o them vin, te nay djivenn i Israelitarya koy dren.

⁴ Oun yob rhačras firhen oun soungepaskro koova i rhorhene deblenge ap kol moulne platse oun tel hako zenelo rouk.

⁵ An ko tsiro djas o Rezin, ko baro ray dran o them Syria, oun o Peka, koleskro dad o Remalya his, ko baro ray dran o them Israel, pral an o them Youda, te kourenn le pen o foreha Yerusalem. Oun yon čivan pengre kourepangre troul o foro Yerusalem. Yon nay lan ko foro gar dren.

⁶ An ko tsiro anas o Rezin, ko baro ray pral o them Syria, ko fores Elat pale pash o them Edom, oun tradas i menshen dran Youda dran o foro Elat vin. Pal kova van i Edomarya oun djivan pale an Elat. Kote hi le ninna kava dives.

⁷ Oun o Ahas bičras peskre bičepangre pash o Tiglat-Pileser, ko baro rayeste pral o them Assour, oun moukas leske te penell: “Me hom tiro boudepaskro oun tiro čavo. Ab pre oun le man kate vin dran i vasta kol bare rayendar pral i themma Syria oun Israel. Kolla djan ap mande pre!”

⁸ Oun o Ahas las ko roup oun ko sonakay, hoy lo an o baro Debleskro kheer hatsas, oun hoy lo an peskro rayeskro kheer hatsas, oun bičras halauter o baro rayeske pral o them Assour, te lell lo les dran leskro vast kamles pash peste.

⁹ Oun o baro ray pral o them Assour shounas ap leste oun djas pral pash o foro Damaskus oun las les dren. Oun moukas kol menshen, kay kote djivan, pandles krik te anell an o foro Kir, oun maras o baro rayes Rezin.

¹⁰ Oun o baro ray Ahas djas an o foro Damaskus, te dikell lo kote o baro rayes dran o them Assour, o Tiglat-Pileser. Oun har lo koy sasterni rhačepaskri dikas, kay an o foro Damaskus tardo hi, kote bičras o baro ray Ahas peskre bičepangre pash o rashay Ouriya oun moukas leske te sikrell, har koy rhačepaskri vin dikell oun har baro koya hi oun har li kerdo vas.

¹¹ Oun o rashay Ouriya kras savi rhačepaskri har les kol bičepangre sikran, kolen o baro ray Ahas dran Damaskus pash leste bičras. Oun koy rhačepaskri his kerdo, har o baro ray Ahas dran o foro Damaskus pale vas.

¹² Oun har lo pale vas, oun koy rhačepaskri dikas, djas lo koy pral,

¹³ oun rhačras kote marede firhen oun rhapen, oun čoras mool koy vin oun vitsras ko rat koy pre kol marede firhendar, hoy rhan le khetne.

¹⁴ Oun koy rhačepaskri dran lolo saster, kay o baro Debleske firhe rhačedo van, koy rhačepaskri moukas lo krik te čivell, te vell li gar mashkral koy nevi rhačepaskri oun o baro Debleskro kheer tardo, oun čivas les serves pash koy nevi rhačepaskri.

¹⁵ Oun o baro ray Ahas moukas o rashayeske Ouriya te penell: “Ap koy nevi bari rhačepaskri rhače kol firhen, hoy venn taysarlake rhačedo, oun ko rhapen, hoy vell rati rhačedo, ninna kol firhen oun rhapen, hoy anell o baro ray, oun kol tsele firhen oun ko rhapen oun koy mool, hoy anenn i menshe. Oun ko tselo rat i firhendar, kolendar, kay venn rhačedo oun kolendar, kay venn rhalo, ko rat vitse ap koy nevi rhačepaskri. Koy rhačepaskri dran lolo saster lau mange, te rodap an i firhengre bouke, hoy te krap.”

¹⁶ Oun o rashay Ouriya kras halauter, hoy leske o baro ray Ahas penas.

¹⁷ O baro ray Ahas phagas kol sasterne rigya tele kol tikne vourdyendar, kay i pirya pre tardo his, oun las kol pirya tele. Oun ko thopaskro čaro, hoy ap sasterne groumyende tardo his, las lo tele, oun čivas les ap i barrengri phoub.

¹⁸ Ninna las lo koy dacha krik, hoy pral koy platsa his, kay i menshe ap o Debleskro dives an o baro Debleskro kheer djan. Oun ko vinstouno voudar, kay i bare raya an o Debleskro kheer djan, kras lo pandlo. Kova lauter kras lo yaake, har o baro rayeske pral o them Assour mishto his.

¹⁹ Ko tselo vavar koova, hoy pral o Ahas penepaske hi, oun hoy lo kras, kova hi činlo an i familyakro liil i bare rayendar pral o them Youda.

²⁰ Oun o Ahas meras oun vas paskedo pash peskre phourende an o Davideskro foro. Oun leskro čavo Hiskiya vas baro ray pal leste.