2. Rajengro liil 12 - O Debleskro Lab 2024 (Sinte-Manouche)

Ap o Debleskro kheer vell pale neves oun shoukar kerdo, hoy paash oun djoungelo vas

¹ O Yoash his efta bersha phouro, har lo baro ray vas.

² An ko tsiro his o Yehou an o eftato bersh o baro ray pral o them Israel. O Yoash his star-deesh bersha baro ray pral o them Youda, oun djivas an ko tsiro an o foro Yerusalem. Leskri day kharas Sibya, oun vas dran o foro Beersheba.

³ Oun o Yoash kras, hoy o baro Debleske mishto his, yaake rah har o rashay Yoyada leskro sikepaskro his.

⁴ Kokres kol moulne platse moukas lo gar khetne te dell, kay rhačran i menshe i moule deblenge firhen oun soungepaskro koova.

⁵ Oun o Yoash penas ap i rashayende: “Lenn ko tselo roup, hoy i menshe anenna an o baro Debleskro kheer: kol love, hoy hounte denn le, oun ninna kol love, hoy denn le pendar dran o dji.

⁶ Hako rashay te lell kol love pash peste kolendar, kay prindjrell lo. Kol loventsa vell o Debleskro kheer kote pale nevo oun shoukar kerdo, kay čomone paash djas oun djoungelo vas.”

⁷ Oun har o biish-te-triinto bersh vas, kay o Yoash baro ray his, oun i rashaya kran gomme či neves oun shoukar ap o Debleskro kheer,

⁸ das o baro ray Yoash o rashayes Yoyada pash peste gole, ninna kol vavar rashayen, oun poučas lendar: “Hoske krenn t'mer či ap o Debleskro kheer neves oun shoukar? Kanna, ma lenn bouder kek love pash t'mende kol menshendar, kay t'mer prindjrenna! Denn kol tsele love, te vell ap o Debleskro kheer kova neves oun shoukar kerdo, hoy paash oun djoungelo hi.”

⁹ “Mishto” penan i rashaya, “mer lah bouder kek love i menshendar.” Oun lenge his mishto, te hounte kran le či neves oun shoukar ap o Debleskro kheer.

¹⁰ Oun o rashay Yoyada las i morhton oun kras i rheb dren, oun moukas ko morhton pash o sasterno bob te čivell ap i čači rig, kote kay i menshe dren venna an o baro Debleskro kheer. Kol rashaya, kay kote yak dan, čivan ko tselo roup kote dren, hoy an o baro Debleskro kheer anlo vella.

¹¹ Oun yaake vas, har yon dikan, kay boud roup an ko morhton dren his, vas ko morsh, kay činas i lila o baro rayeske. Yob vas khetne o baro rashayeha, oun kol douy dikan pal, har boud roup an o baro Debleskro kheer anlo his, oun pandan o roup khetne an gone,

¹² oun čivan les ap i vaga oun dikan pal, har boud kova his. Oun palle dan le les i pralstunende pral i boudepangre, kay boudran an o baro Debleskro kheer. Oun kolla dan les kolende, kay boudrenn o kashteha oun krenn i massurya,

¹³ ap kolende, kay čivenn i barra yek ap o vavar, oun ap kolende, kay činenn i barra, ninna ap kolende, kay ginenn kasht oun shoukar dine barra dren oun ko tselo vavar koova, hoy hounte vas ninna ginlo o khereske.

¹⁴ Kol loventsa, hoy an o baro Debleskro kheer anlo vas, van kek khore, čare, čourya oun phourdepangre bashepangre dren ginlo, vitar kek sonakangre oun roupene koola o baro Debleskro khereske.

¹⁵ Kol tsele love dan le kol boudepangren, te nay vell halauter pale neves oun shoukar kerdo, hoy paash oun djoungelo his ap o baro Debleskro kheer.

¹⁶ Oun kol morshen, kay ko tselo roup dino vas, te denn le les i boudepangren, kolla hounte penan kekeske, har yon ko roup vin dan. Yon his morsha o labestar oun lenge vas patslo.

¹⁷ Kol vavar love, hoy i menshe pashel dan, har anan le firhen o Debleske, te vell lengri doosh krik lino, oun te vell lauter pale mishto, kol love vas gar o baro Debleskro khereske lino. Kol love his i rashayenge kokres.

O Yoash dell kouč koova krik, te vell kek kourepen

¹⁸ An ko tsiro djas o baro ray pral o them Syria, – leskro lab his Hasael – pash o foro Gat oun las les peske dren. Oun har lo doureder djas, te kourell lo pes o foreha Yerusalem,

¹⁹ las o Yoash, ko baro ray pral o them Youda, ko tselo kouč koova, hoy dan leskre phoure, kol bare raya, o Yosafat, o Yoram oun o Ahasya, o baro Debleske, ninna kova, hoy yob kokres o Debleske das, oun ko tselo sonakay, hoy vas hatslo an o baro Debleskro kheer oun an o baro rayeskro kheer, oun bičras halauter pash o Hasael, ko baro rayeste pral o them Syria. Kote djas peske o Hasael o forestar Yerusalem krik.

²⁰ Ko tselo vavar koova, hoy pral o Yoash penepaske hi, oun halauter, hoy lo kras, kova hi činlo an i familyakro liil i bare rayendar pral o them Youda.

^21-22 Oun leskre pralstoune boudepangre kran pen khetne, te denn le les moulo. Oun douy lendar dan les moulo an o kheer pash o Millo, ap ko drom, kay djal an o foreskro kotar, hoy kharell Silla. Kol douy his o Yozabad, koleskro dad o Shimat hi, oun o Yehozabad, koleskro dad o Shomer hi. Oun yon paskran les pash peskre phourende an o Davideskro foro. Oun leskro čavo, o Amazya, vas baro ray pal leste.