2. Rajengro liil 11 - O Debleskro Lab 2024 (Sinte-Manouche)

I Atalya vell rani an o them Youda

¹ Har o Ahasya moulo his, stas leskri day, i Atalya, pre, te marell li hakenes, kay o baro rayeha dran yek familya vas.

² Kova shounas i čay o baro rayestar Yoram. Lakro lab hi Yosheba. Oun lakro phraal his o Ahasya. Koya čoras peskro phraleskro čaves, o Yoash, mashkral dran o rayeskre čavende, kay venn marede. Oun anas les oun koy djouvel, kay das ap leste garda, an i čibyengri isema oun khatras les glan i Atalya. Oun yaake nay vas lo gar maredo.

³ Oun yob his pash i Yosheba khatedo an o baro Debleskro kheer shob bersha. An ko tsiro his i Atalya i rani pral o them.

O Yoash vell baro ray pral Youda

⁴ An o eftato bersh bičras o rashay Yoyada bičepangre, oun moukas kol pralstoune lourden oun klisten gole te dell, kay dan yak ap o rayeskro kheer. Oun yon van pash leste an o baro Debleskro kheer. Oun kote las yob lendar i sovel tele, te rikrenn le pash leste. Oun yob sikras len o rayeskro čavo.

⁵ Palle penas lo lenge, hoy te krenn le: “I triinto kotar t'mendar”, penas lo, “kay ap o Debleskro dives pash i boudi vell, dell garda an o baro rayeskro kheer.

⁶ I vavar triinto kotar dell garda ap o voudar, hoy kharell Sour. Oun pale i vavar triinto kotar dell garda ap o voudar pal o kheer, kay o baro rayeskre kliste tarde hi. Yaake han tardo troul o tselo kheer oun denn garda.

⁷ Kolla, kay lengri boudi kerdo hi ap o Debleskro dives, douy triinte kotya lendar, ačenn pash o baro Debleskro kheer, oun denn garda an o kheer ap o baro rayeste.

⁸ Yon hounte venn tardo troul leste, hakeno peskro rhareha an o vast. Koon phagell kote dren, kova hounte vell maredo. Ačenn pash o baro rayeste, te djal lo vin oun te djal lo dren!”

⁹ Oun i pralstoune lourde kran halauter, har les o rashay Yoyada ap lende penas, oun lan pengre morshen pash pende, kolen kay ap o Debleskro dives ap pengri boudi venn, oun kolen, kolengri boudi kerdi his, oun van pash o rashayeste Yoyada.

¹⁰ O rashay Yoyada das hako pralstouno lourdes kol vitsepaskre čourya oun kol sasterne patria, kay o baro rayes, o Davides his, oun an o baro Debleskro kheer pre-rikedo van.

¹¹ Oun i kliste his tardo glan o Debleskro kheer yek rigyatar bis ap i vavar, oun glan o sasterni rhačepaskri, oun troul o rayeste trouyel. Oun hakenes his peskro vitsepaskro čouri an o vast.

¹² Palle moukas o Yoyada o baro rayeskro čaves vin te vell, te nay dikell les hakeno, oun čivas leske koy rayeskri stadi ap o shero, oun das les ko liil, kay činlo hi, hoy te krell lo. Oun čoras djet pral leskro shero, te vell lo baro ray. Koy dan le halauter an i vasta oun dan gole: O baro ray te djivella!

I Atalya vell maredo oun i vavar debla venn paash kerdo

¹³ Har shounas i Atalya i gole kol klistendar oun vavar menshendar, djas li an o baro Debleskro kheer, kay kol menshe khetne van.

¹⁴ Oun dikas o nevo baro rayes kote tardo, kay i platsa o baro rayeske his: pash i bari lengsto bar. Oun troul leste his i pralstoune lourde oun i phourdepangre tarde. Oun i tsele menshe ko themestar his barhtelo oun phourdan an pengre bashepangre. I Atalya tserdas peskre ripya an kotya oun das gole: “Phoukepen, Phoukepen!”

¹⁵ Oun o rashay o Yoyada kamas gar te vell li maredo an o baro Debleskro kheer. Doleske penas lo kol pralstoune lourdenge: “Anenn lat vin! Oun koon lake pal nashella, koles denn moulo o rhareha!”

¹⁶ Oun yon tapran la oun anan la ko drom, kay i graya pash o baro rayeskro kheer nashenna. Oun kote vas li maredo.

¹⁷ Oun o Yoyada moukas o baro rayes oun i menshen dran Youda i sovel te dell o baro Debleske, te djivenn le yaake, har o baro Devel peskre menshendar kamella. Ninna moukas lo len i sovel te dell, te rikrenn le hako tsiro pash pengro baro rayes, oun yob pash lende.

¹⁸ Palle djan i tsele menshe dran o them Youda an o kheer ko deblestar Baal, oun kran kol tsele figure paash, hoy les sikran. Oun kol rhačepangre, kay firhen oun vavar koova leske rhačedo van, phagan le tele. Oun glan kol rhačepangre maran le leskro rashayes, o Mattan. Oun o rashay Yoyada bičras klisten, te denn le yak ap o baro Debleskro kheer.

¹⁹ Palle das lo lauteren khetne gole: i pralstoune lourden, i klisten, kay denn yak ap o baro rayeskro kheer oun ap leskri familya oun i tsele menshe dran Youda. Oun kolla anan o baro rayes tele dran o baro Debleskro kheer oun van pash ko voudar, kay kol kliste garda denna, oun doureder pash o baro rayeskro kheer. Kote beshas lo pes ap peskri rayeskri beshepaskri.

²⁰ Oun i tsele menshe dran Youda his barhtelo. Oun an o foro das kek kourepen, har maran le i Atalya o rhareha pash o baro rayeskro kheer.