2. Petro 3 - O Debleskro Lab 2024 (Sinte-Manouche)

O Yezous Kristo vella pale

¹ Lače phrala oun phenya, kava hi o douyto liil, hoy me t'menge činau. Kalla lila činau, te venn t'mer gar khino an t'maro patsepen. Ma bistrenn,

² hoy penan o Debleskre rakepangre glan i rah tsiro! Bistrenn vitar gar kol laba, hoy t'menge kolla penan, kolen maro ray Yezous pash t'mende bičras, – yob, kay las men dran o čilačepen vin.

³ Me kamau, te djinenn t'mer, glan ko tsiro, kay o Yezous Kristo pale vella, venna menshe pash t'mende, kay san pral t'maro patsepen. Kolla djivenn yaake har yon kamenna,

⁴ oun penenn ap t'mende: “Kay hi t'maro Yezous? Yob penas, kay yob pale vella. Mare phoure meran, oun lauter ačas yaake har his, har i phoub kerdo vas.”

⁵ Kol menshe kamenn gar te hayvell, kay kras o Devel o bolepen oun i phoub glan i rah tsiro. Yaake har yob penas, djas i phoub vin dran o pani oun ačas ap yek rig čiddo, oun o pani ap i vavar rig.

⁶ Koy phouri phoub djas tele an o baro pani.

⁷ Pral o bolepen oun i phoub, hoy kanna kay hi, penas o Devel, te ačenn le yaake rah, bis te venn le rhačedo an i yag. Yon ačenn yaake rah tardo, bis te vell ko dives, kay vell o Debleskri rholi pral i menshende ap kay phoub, oun yob kolen i phagi della, kay gar ap leste shounan.

⁸ Lače phrala oun phenya, yek koova hounte djinenn t'mer: Pash o Debleste hi yek dives har i zero bersha, oun i zero bersha hi har yek dives.

⁹ Hi menshe, kay penenna: “O ray Yezous lell pes boud tsiro, te vell lo pale.” Kova hi gar čačo. Les hi i baro dji t'menge, oun kamell, te djal kek t'mendar nashedo. Yob kamella, te moukell hakeno peskro čilačo drom oun vell ap o Debleskro drom.

I nevi phoub oun o nevo bolepen

¹⁰ Kek djinell o dives, kay maro ray Yezous pale vella. Ko dives vella yaake har i dre-phagepaskro vella. Palle djal o bolepen krik bari golyah. I bolepangre momlia rhačrenna krik. Ninna i phoub oun ko tselo koova, hoy ap i phoub hi, rhačrella pre.

¹¹ Mer djinah, kay lauter yaake paash djala. Doleske hounte kras mer lauter, te ačas o Debleha, oun djivas yaake, har yob kamella.

¹² Djivenn yaake, te vell o Debleskro baro dives sikeder! Ap ko dives rhačrell o bolepen pre, oun djal paash an i yag. Oun i bolepangre momlia rhačrenna ninna pre.

¹³ Mende das o Devel peskro lab, te krell lo i nevo bolepen oun i nevi phoub. Kote della bouder kek čilačepen. Ap kova dikah mer.

Ma moukenn t'men o Debleskro dromestar tele te anell!

¹⁴ Lače phrala oun phenya, t'mer kamenna, te vell ko dives sik. Doleske krenn lauter, te vell či mank t'mende oun o Debleste tardo! Djivenn yaake, te hi t'men i djoudjo dji, oun te hatsell o Devel kek doosh ap t'mende ap ko dives, kay venna glan leste tardo!

¹⁵ Dikenn, te vell maro ray Yezous gar yaake sik pale, krell lo kova, te dell lo i menshen gomme i tsiro, te venn le pash leste. Kova činas t'menge ninna maro kamlo phraal Paulo, koles o Devel boud gosvepen das.

¹⁶ Pral ko koova činell lo an peskre tsele lila. Koy hi ninna laba dren činlo, hoy hi pharo te hayvell. Oun kol menshe, kay hayvenn kova gar, kolengro patsepen gar zorelo hi, kolla rissrenn kol laba trouyel, yaake har yon ninna krenna kol vavar Debleskre labentsa, hoy činlo hi. Oun yaake djan le nashedo.

¹⁷ Lače phrala oun phenya, kanna djinenn t'mer, kay čilače menshe venna, kay shounenn gar ap o Debleste. Doleske denn garda, te patsenn gar o rhorhepen, hoy yon rakrenna! Ma djan lentsa, te perenn t'mer gar o čačo dromestar tele! Ačenn zoreles an o patsepen tardo!

¹⁸ Djivenn boud oun boudeder dran o lačepen, hoy maro ray, o Yezous Kristo, t'men della! Yob las men vin dran o čilačepen. Prindjrenn les boud oun boudeder! Sharedo vell yob kanna oun hako tsiro. Amen.