2. Petro 1 - O Debleskro Lab 2024 (Sinte-Manouche)

Maro kouč patsepen

¹ Me, o Simon Petro, činau kava liil. Me boudrau o Yezous Kristeske oun hom leskro bičepaskro. Me činau ap lauterende, kay lan ninna ko patsepen har mer. Ko kouč patsepen, kay čivas men an o čačepen glan o Debleste, das men maro Devel oun o Yezous Kristo, kay las men dran o čilačepen vin.

² Me mangau o Deblestar, te dell lo t'men peskro lačepen oun peskri barht an o dji, te prindjrenn les oun o Yezouses, maro rayes, feteder!

Har te djivas maro djipen

³ Yob hi baro oun raylo, oun his menge lačo, oun das men pash peste gole. Har lam les an maro dji pre, das men o Devel an peskri zoor halauter, hoy men hounte vell, te djivas maro djipen yaake, har yob kamella.

⁴ Glan i rah tsiro penas o Devel i menshenge, te bičrell lo lenge yekes, kay lell len dran o merepen vin, oun dell len o Debleskro djipen. Ko baro oun kouč koova kras lo kanna menge. Mer lam o Debleskro djipen oun hounte kras bouder gar ko djoungelo koova, hoy i menshe ap kay phoub yaake kamenna, oun hoy anell lenge o merepen.

⁵ Doleske čivenn t'maro tselo dji koy pre, te vell pash t'maro patsepen ninna i djoudjo djipen. Koon i djoudjo djipen djivella, hayvell, hoy o Devel lestar kamella.

⁶ Koon hayvas, hoy o Devel lestar kamella, kova rikrell pes lauterestar pale, hoy leske gar mishto hi. Koon rikrell pes lauterestar pale, hoy leske gar mishto hi, kova rikrell zoreles ap kova, hoy lačo hi. Koon kova krella, kamell o Debles.

⁷ Koon o Debles kamella, koles hi ninna i dji peskre phralenge oun phenyenge. Kones i dji hi peskre phralenge oun phenyenge, kova kamell ninna i tsele menshen ap kay phoub.

⁸ Te krenn t'mer kova lauter, oun djan doureder ap kava drom, palle prindjrenn t'mer maro rayes, o Yezous Kristes, boudeder oun feteder.

⁹ I patslo, kay krell kova gar, kova hi korelo, oun djivell an o tamlepen. Yob bistras, kay vas leskri tseli doosh lestar krik lino, hoy yob kras.

¹⁰ Mire phrala, o Devel das t'men gole, oun rodas t'men vin, te venn t'mer leskre čave. Doleske djivenn yaake t'mari tseli zoryah, te ačenn pash leste! Te djivenn t'mer yaake, perenn t'mer gar o Debleskro dromestar tele.

¹¹ Oun o Devel lell t'men lačes pash peste an o bolepen pre, kay hi maro ray, o Yezous Kristo, o ray hako tsiro, – yob, kay las men dran i tseli bibarht vin.

Ma bistrenn, hoy t'menge penom!

¹² Ninna te djinenn kova lauter, oun han zorelo tardo an o čačo patsepen, penau t'menge kova pale te pale.

¹³ Me patsau, hi mishto t'menge, te penap t'menge kova yaake rah, har me djivau, te bistrenn t'mer kova gar, oun te venn gar khino, te krenn kova lauter.

¹⁴ Me djinau, kay merau an i tikno tsiro. Maro ray, o Yezous Kristo, penas kova mange.

¹⁵ Doleske činau me lauter pre, te bistrenn gar, hoy me t'menge penom.

O Yezouseskro raylepen

¹⁶ Mer penam t'menge, te vell maro ray, o Yezous Kristo, i bari zoryah pale. Kova hi kek gosevi parmissa. Na-a. Mer dikam leskro baro raylepen mare yakentsa.

¹⁷ O Devel, leskro dad, das les peskro baro raylepen oun sharas les, har yob dran o bolepen ap leste penas: “Kava hi miro čavo, koles me o djiyestar kamau. Yob krell man barhtelo.”

¹⁸ Ko rakepen shounam mer dran o bolepen, har hams leha khetne ap koy Debleskri berga.

¹⁹ Doleske djinah mer čačepah, kay kova čačo hi, hoy o Debleskre rakepangre penan. T'mer krenna mishto, te denn garda koy pre. Ko lab hi har i momeli, hoy rhačella an i rat, bis te vell o dives. Palle djal i rayli momeli an t'mare djia pre.

²⁰ Oun kova hounte djinenn t'mer: Kek Debleskro rakepaskro rakras nay pestar Debleskre laba.

²¹ An kek tsiro vas o Debleskro lab i menshendar. Kol Debleskre rakepangre rakran, hoy o Devel lenge penas. Kova čivas lenge o Debleskro Dourho an o dji.