2. Mose 9 - O Debleskro Lab 2024 (Sinte-Manouche)

I pančti phagi: I firhe venn nasselo oun merenna

¹ Kote penas o baro Devel ap o Mose: “Dja pash o Farao dren oun pen leske: Kava penell o baro Devel, o Devel pral i Hebrearya: Mouk mire menshen te djal, te nay mangenn le man an.

² Te moukeh len tou gar te djal, oun rikreh len pale pale,

³ palle dikeh tou, te vell o baro Debleskro vast pral tire firhende: pral tire graya, tire bourike, tire khamele, tire groumya oun tire bakre oun bouzya. Yek baro nasslepen vell ap lende.

⁴ Kava baro nasslepen vell gar ap i firhende, hoy i Israelitaryen hi. O baro Devel krell vavarčandes pash i Egiptarya har pash i Israelitarya. Kolendar merell kek firho.”

⁵ Ninna penas o baro Devel o tsiro, kaana yob kova krella, oun penas: “Taysar moukell o baro Devel kay bibarht pral o them te vell.”

⁶ Oun o baro Devel kras kova ap o vavar dives yaake. Oun i tsele firhe, hoy i Egiptaryen his, meran. Kol firhendar, hoy i Israelitaryen his, meras kek firho.

⁷ Oun o Farao bičras morshen pash lende, te dikenn le palla, hoy i Israeltikre firhentsa hi. Oun har kolla koy his, dikan le, te meras pash lende kek lengre firhendar. Ninna kava kopo ačas o Faraeskro dji pandlo oun yob moukas i Israelitaryen gar te djal.

I shobti phagi: Baro nasslepen ap o mass

⁸ Kote penas o baro Devel ap o Mose oun ap o Aron: “Lenn t'menge i douy vastentsa čik dran o bob vin, oun o Mose vitsrell lat glan o Faraeskre yaka pre an o bolepen.

⁹ Palle vell i čik phourdedo pral o tselo them Egiptia. Oun i menshe oun i firhe taprenn i djoungelo nasslepen ap pengro mass.”

¹⁰ Oun o Mose oun o Aron lan čik dran o bob oun djan glan o Farao. Oun o Mose vitsras koy čik pre an o bolepen. Koy tapran i menshe oun i firhe i djoungelo nasslepen ap pengro mass.

¹¹ Kava kopo nay van i dourkepangre gar glan o Mose, te krenn le yaake har yob. Ko djoungelo nasslepen his ninna ap lende har ap hako Egiptari.

¹² Oun o baro Devel pandas o Faraeskro dji, oun yob shounas gar ap lende. Yaake vas, hoy o baro Devel ap o Mose penas.

I eftati phagi: Barrengro brishin perell ap i phoub

¹³ Kote penas o baro Devel ap o Moseste: “Taysarla ste sik pre, dja glan o Farao oun pen ap leste: Kava penell o baro Devel, o Devel pral i Hebrearya: Mouk mire menshen te djal, te nay mangenn le man an.

¹⁴ Te shouneh tou kava kopo pale gar, palle kamau me i djoungleder bibarht pral toute oun tire pralstunende oun pral tire tsele menshende te bičrell, te dikess oun hayvess, te hi kek ap kay phoub yaake har me.

¹⁵ Me nay hadoms glan rah tsiro miro vast pre oun doms tout i nasslepah temerl, tout oun tire tsele menshen, yaake te vans t'mendar kek bouder ap kay phoub.

¹⁶ Me moukom tout doleske djido, te dikess miri bari zoor, oun te rakrenn le mandar ap i tseli phoub.

¹⁷ Tou patseh, tou nay kreh mire menshentsa, hoy kameh, oun moukeh len gar te djal.

¹⁸ Dik, taysar an ko emligo tsiro moukau brishin te dell, hoy hi har barra. Kol brishineskre barra hi yaake baro, har an o them Egiptia gar das, yaake rah kava them della.

¹⁹ Kanna pen, te lenn le i firhen dren. Oun kova, hoy vin tardo hi, te anenn le les khere. Lauter, hoy vin hi, menshe har firhe hounte merenna.”

²⁰ Kol Faraeskre pralstoune, kay daran, hoy o baro Devel penas, kolla moukan pengre boudepangren oun firhen an i khera te anell.

²¹ Kolla, kay moukan penge kol laba, hoy o baro Devel penas, gar an o dji te djal, kolla moukan pengre boudepangren oun pengre firhen vin.

²² Oun o baro Devel penas ap o Mose: “Hade tiro vast pre ap o bolepen! Palle dell brishin, hoy hi har barra, ap i menshende, ap i firhende oun ap o tselo zenlepen ap i harhetikri phoub an o tselo them Egiptia.”

^23-24 Kote hadas o Mose peskro kasht pre ap o bolepen. Oun o baro Devel moukas barrengro brishin ap i phoub te perell. Oun o bolepen das bari gole, oun das yag karye pral oun tele ap i phoub. Ko brishin, kay yag pral oun tele karye das, oun brishineskre barra ap i phoub peran, kova his yaake pharo, har gomme gar das, yaake rah har i menshe an o them Egiptia djivenna.

²⁵ Oun kol brishineskre barra dan an o tselo them Egiptia lauter paash, hoy vin his: menshe har firhe, ninna o tselo zenlepen ap i harhetikri phoub. Oun i rouka van tele phagedo.

²⁶ Kokres an o them Gosen, kay i Israelitarya djivan, kote peras kek barrengro brishin tele.

²⁷ Kote bičras o Farao pash o Mose oun o Aron, te venn le, oun penas ap lende: “Kava kopo anom doosh ap mande. O baro Debles hi čačes. Man oun mire menshen hi gar čačo.

²⁸ Mang o baro Debles, te vell kanna o barrengro brishin doha, oun te dell o bolepen bouder gar gole! Palle moukau me t'men te djal, oun rikrau t'men bouder gar kay.”

²⁹ O Mose penas leske: “Yaake sik har djom dran o foro vin, kamau mire vasta pre te hadell ap o baro Debleste. Palle dell o bolepen bouder kek gole, oun kek barrengro brishin perell bouder, te dikess oun hayvess, te hi i phoub o baro Debleske.

³⁰ Tou oun tire pralstoune, kova hayvom, t'mer darenna gomme gar o baro Deblestar.”

³¹ Yaake vas o djob paash dino, ninna ko zenlepen, hoy kharella Flaks. O djob his baro oun pherdo, oun o Flaks djas pre.

³² O gib oun o vavar djob, hoy gomme gar pre djas, van gar paash dino.

³³ Palle djas o Mose vin dran o Faraeskro kheer oun dran o foro, oun hadas peskre vasta pre ap o baro Debleste. Oun o bolepen das bouder kek gole. Oun bouder kek barrengro brishin peras tele. Oun kek depen das bouder ap i phoub.

³⁴ Har o Farao dikas, te heras kova lauter pre, kras lo gar, hoy o baro Devel lestar kamella, oun pandas pale peskro dji. Oun yaake kran ninna i pralstoune an leskro them.

³⁵ Yaake vas čačo, hoy o baro Devel ap o Moseste penas oun o Mose i Israelenge doureder penas: O Faraeskro dji ačas pandlo, oun yob moukas i Israelitaryen gar te djal.