2. Mose 5 - O Debleskro Lab 2024 (Sinte-Manouche)

O Mose oun o Aron djan pash o Farao

¹ Palle djas o Mose oun o Aron pash o Farao oun penan ap leste: “Yaake rakrella o baro Devel, kay o Israeleskro Devel hi: Mouk mire menshen te djal, te djan le an o moulo tato them, oun kote sharenn le man.”

² Oun o Farao penas ap o Moseste oun ap o Aroneste: “Havo devel hi kova, kay me shounap ap leste? Hoske moukap me i Israelitarya te djal? Me prindjrau ko debles gar, oun me moukau gar i Israelitaryen te djal.”

³ O Mose oun o Aron penan ap o Farao: “O baro Devel, ko Devel, koles i Hebrearya an-mangenn, yob moukas pes glan mende te dikell. Kanna, mouk men triin divessa dour te djal an o moulo tato them. Mer kamah maro Debleske kote firhen te marell. Oun kova te krah mer gar, nay vell lo rhoyedo ap mende, yaake te vell baro nasslepen oun kourepen ap mende.”

^4-5 Koy penas o Farao ap lende: “T'mer, Mose oun Aron, hoske kamenn t'mer kol menshen dran pengri boudi te lell? Yon hi boudeder har i Egiptarya. Oun t'mer kamenn len pale te rikrell, te krenn le bouder gar pengri boudi! Djan t'menge! Hakeno pash peskri boudi!”

I Israelitarya hounte boudrenn boudeder oun phareder

⁶ Ap kava dives penas o Farao ap kol pralstoune Egiptarya oun ap kol pralstoune Israelitarya, kay dan yak ap i boudepangre:

⁷ “Denn len bouder kek phouss, te čivenn le kova an koy čik, kolatar yon barra rhačenna! Moukenn len ko phouss penge kokres khetne te čivell!

⁸ Ninna te hounte čivenn le ko phouss penge kokres khetne, hounte krenn le yaake boud barra, har kran le glan kava tsiro. Penenn lenge, te moukenn le gar tele. Yon kamenn gar te boudrell. Doleske poučan le mandar, te moukap len te djal, te marenn le firhen lengro debleske.

⁹ Denn len yaake boud boudi, te shounenn le gar ap kava rhorheno rakepen!”

¹⁰ Koy djan kol pralstoune Egiptarya oun kol Israelitarya, kay dan yak ap i boudepangre, pash lende oun penan lenge: “O Farao penas, te das mer t'men bouder kek phouss.

¹¹ Djan t'menge koy, oun čivenn t'men kokres phouss khetne! Krenn yaake boud barra har kran hako dives!”

¹² Koy djan kol menshe trouyel an o tselo them Egiptia, te čivenn le penge phouss khetne.

¹³ Oun kol pralstoune Egiptarya tradan len oun penan: “Krenn yaake boud barra har an ko tsiro, kay dan le t'mende phouss!”

¹⁴ Oun kol Israelitarya, kolen i pralstoune Egiptarya pral i boudepangre čivan, te denn le yak lende, kolla rhan dava. Oun lenge vas penlo: “Hoske kran t'mer gar kava dives oun vitar gar taysar yaake boud barra har glan kova?”

¹⁵ Koy djan kol Israelitarya, kay ap i boudepangre yak dan, pash o Farao oun penan leske: “Maro ray, hoske kreh tou yaake mentsa?

¹⁶ Kek dell men phouss, oun menge vell penlo: Krenn barra! Oun mer, tire boudepangre, rhah dava. Tire menshe krenn mentsa, hoy gar mishto hi.”

¹⁷ O Farao penas: “T'mer kamenn gar te boudrell. Yaake hi kova! Doleske penan: Mer kamah te djal, te maras firhen o baro Debleske.

¹⁸ Kanna djan ap t'mari boudi! Kek phouss vell t'mende dino! Oun yaake boud barra har glan kova hounte krenna!”

¹⁹ Har shounan i morsha, kay hounte krenn le hako dives yaake boud barra har glan kova, koy dikan le, te dikell lenge gar mishto vin.

²⁰ An ko tsiro his o Mose oun o Aron vin tardo. Har van i morsha dran o Faraeskro kheer vin, djan le pash lende oun penan lenge:

²¹ “O baro Debleskri rholi vell ap t'mende! T'mer kran, te ham o Faraeske oun leskre pralstunenge har djoukle. Kanna hi an lengre vasta, te nay marenn le men.”

²² Oun o Mose vas pale glan o baro Debleste oun penas ap leste: “Miro ray, hoske kreh tou savo čilačepen ap kal menshende? Hoske bičral tou man pash lende?

²³ Hako kopo, har djom pash o Farao oun penom leske, hoy tou kamal, kras lo i menshenge o djipen gomme phareder. Tou kral či, te less tire menshen koy vin!”