2. Mose 40 - O Debleskro Lab 2024 (Sinte-Manouche)

O Debleskro plarhteno kheer vell pre tardo

¹ O baro Devel rakras o Moseha oun penas:

² Čip o Debleskro plarhteno kheer pre ap o ersto dives an o ersto čon.

³ Oun čip ko morhton dren, kay o Debleskre deesh laba dren hi. Glan o morhton pande ko kouč kotar than pre!

⁴ An ninna koy rhapaskri dren oun čip i Debleskre mare pre! Ninna koy momelengri čip an o kheer, oun čip i momlia pre.

⁵ Glan o morhton, kay o Debleskre deesh laba dren hi, čip o sonakaskro bob, kay soungepaskro koova rhačedo vella! Oun an o voudar pande koy bari plarhta pre!

⁶ Glan o Debleskro plarhteno kheer čip i sasterni rhačepaskri, kay i firhe o Debleske rhačedo venna.

⁷ Mank o kheer oun i sasterni rhačepaskri čip o thopaskro čaro oun čore pani dren!

⁸ Troul i platsa glan o kheer čip i pesse kashta pre, oun pande kol layntikre kotya mank lende! Oun an o voudar glan i platsa pande koy bari plarhta pre!

⁹ Le ko makepaskro djet oun mak leha o kheer oun lauter, hoy koy dren hi, te vell lo o Debleske!

¹⁰ Mak ninna i sasterni rhačepaskri oun lakre tsele koola, te vell li o Debleske oun leske kokres!

¹¹ Mak ninna o thopaskro čaro oun kol herya, ap kolende o čaro tardo hi, te vell lauter o Debleske.

¹² Pen o Aroneske oun leskre čavenge, te venn le glan o Debleskro plarhteno kheer, oun thob len!

¹³ Rib o Aroneske o rashayeskre ripya an, mak les o djeteha, te vell lo miro rashay.

¹⁴ An ninna leskre čave koy oun rib lenge i rashayengre gada an!

¹⁵ Oun mak len o djeteha yaake har makal lengro dad, te venn le mire rashaya. Yon oun lengre čave pal lende te venn le maklo o djeteha, te venn le mire rashaya hako tsireske.

¹⁶ O Mose kras lauter har o baro Devel leske penas.

¹⁷ Yaake vas o Debleskro kheer pre tardo an o douyto bersh ap o ersto dives an o ersto čon.

¹⁸ O Mose čivas i činle kashta ap herya oun pandas len i pandepangre kashtentsa khetne. Palle van i pesse kashta pre tardo.

¹⁹ Oun koy pral čivas lo kol douy ledertikre plarhte, hoy čakrenn o kheer. Lauter kras lo yaake har o baro Devel leske penas.

²⁰ Oun yob las i barra, kay o Debleskre deesh laba dren činlo hi, oun čivas len an o sonakaskro morhton, oun čivas i hidjepaskre kashta an i goustria ap o morhton. Oun pral ap o sonakaskro morhton čivas lo o pralstouno kotar, hoy sikrella, kay o baro Devel peskre menshenge lačo hi.

²¹ Oun yob anas o morhton an o kheer oun pandas ko kouč kotar than glan o morhton, te vell lo gar diklo. Yob kras kova yaake, har o baro Devel leske penas.

²² Oun yob anas i rhapaskri an o kheer oun čivas lat glan o kouč kotar than ap i servi rig,

²³ oun čivas o Debleskre mare pre glan o baro Debleste. Yob kras kova yaake har o baro Devel leske penas.

²⁴ Ap i čači rig an o kheer, vergel i rhapaskri, čivas lo i momelengri,

²⁵ oun čivas i momlia pre yaake har o baro Devel leske penas.

²⁶ Glan o kouč kotar than čivas lo o sonakaskro bob,

²⁷ oun rhačras ap leste kouč soungepaskro koova. Yob kras les yaake har o baro Devel leske penas.

²⁸ An o khereskro voudar pandas lo koy bari plarhta.

²⁹ Vin glan o khereskro voudar čivas lo i sasterni rhačepaskri, oun ap leste rhačras lo firhen oun rhapen o baro Debleske, yaake har yob leske penas.

³⁰ Mank o kheer oun i sasterni rhačepaskri čivas lo o thopaskro čaro oun čoras pani dren thopaske.

³¹ Oun o Mose, o Aron oun leskre čave thovan pengre vasta oun herya koy dren.

³² Yon hounte thovenn pen hako kopo, kay djan le an o Debleskro plarhteno kheer oun pash i sasterni rhačepaskri. Yaake penas kova o baro Devel o Moseske.

³³ Oun troul o kheer oun i sasterni rhačepaskri čivas lo i pesse kashta pre oun pandas kol layntikre kotya mank lende, te vas i platsa. Oun an o voudar glan i platsa čivas lo koy bari plarhta. Yaake kras o Mose koy tseli boudi.

O baro Devel vell an peskro kheer

³⁴ Koy vas i folka ap o Debleskro plarhteno kheer. Oun o kheer vas pherdo raylepen o baro Deblestar.

³⁵ Oun har i folka pral o kheer ačas oun o kheer pherdo raylepen o baro Deblestar his, nay djas o Mose gar dren.

³⁶ Hako kopo, kay hadas pes i folka, djan i Israelitarya doureder yaake rah, har his le ap pengro drom an o moulo tato them.

³⁷ Te ačas i folka pral o Debleskro kheer, ačan le kote oun djan gar doureder yaake rah bis te hadas li pes.

³⁸ Oun i tsele Israelitarya dikan koy folka. Ap o dives his li pral o Debleskro kheer, ap i rat his li pherdi yag yaake rah har i Israelitarya ap o drom his.