2. Mose 4 - O Debleskro Lab 2024 (Sinte-Manouche)

O baro Devel dell peskri zoor o Moseste

¹ O Mose poučas o baro Deblestar: “Hoy hi, te patsenn i Israelitarya gar, hoy me lenge penau, oun yon shounenn gar ap mande? Nay vell, yon penenna ap mande: O baro Devel moukas pes gar glan toute te dikell.”

² Penell o baro Devel ap o Mose: “Hoy hi tout kote an o vast?” “Yek kotar kasht”, penell o Mose.

³ “Vitse o kasht ap i phoub”, penell leske o baro Devel. Oun o Mose vitsras o kasht ap i phoub. Koy vas o kasht yek djido sap. Oun i daryatar nashas o Mose peske.

⁴ Koy penas o baro Devel ap o Mose: “Čip tiro vast vin! Oun tape o sap ap i pori!” Oun o Mose tapras o sap. Oun har his o sap an leskro vast, vas o sap pale i kasht.

⁵ Oun o baro Devel penas: “Mose, kre kava glan i Israelitarya! Palle patsenn le ap toute, te moukom man me, o baro Devel, glan toute te dikell. Palle djinenn le, te hom me o Devel, koles lengre phoure, o Abraham, o Isaak oun o Yakob an-mangan.”

⁶ Oun pale rakras o baro Devel ap o Moseste: “Čip tiro vast tel tiri plaashka!” Oun o Mose čivas peskro vast tel peskri plaashka. Oun har las lo les pale vin, his leskro vast nasselo oun parno har gib.

⁷ Oun o baro Devel penas ap leste: “Čip tiro vast pale tel i plaashka!” Oun yob čivas peskro vast pale tel i plaashka! Oun har las lo les pale vin, his o vast pale sasto.

⁸ Oun o baro Devel penas: “Te dikenn le ko baro koova, hoy me tiro kashteha krom, oun yon patsenn tout gar, palle patsenn le, te sikreh tou len kava douyto baro koova.

⁹ Oun te patsenn le tout pale gar, ninna te dikan le ko baro koova, hoy krom o kashteha oun o vasteha, oun shounenn gar koy pre, hoy tou lenge peneh, palle le pani dran o Nil, oun čore o pani ap i phoub! Palle vell ko pani rat.”

¹⁰ Oun o Mose penas ap o baro Debleste: “Miro Ray, me hayvau gar mishto te rakrell, ninna kanna kay rakreh mantsa, hi mange phares te rakrap.”

¹¹ Pale penas o baro Devel ap o Moseste: “Koon krell, te nay rakrenn i menshe? Oun koon krell kova, te nay rakrell oun shounell yek gar? Koon krell kova, te nay dikenn le? Oun koon krell, te nay dikell yek gar? Hom kova gar me?

¹² Oun kanna dja pash lende! Me kamau tiro mouy te vell, oun kamau touke lauter sikrell, hoy tou lenge te peness!”

¹³ Koy penas o Mose: “Miro ray, mangau tout, biče yek vavares!”

¹⁴ Oun har penas o Mose kova, las o baro Devel rholi ap o Moseste, oun yob penas ap leste: “Tiro phraal, o Levitari Aron, me djinau, te hayvell lo mishto te rakrell. Shoun, yob vella pash toute. Oun te dikell yob tout, palle hi les baro shoukapen an peskro dji.

¹⁵ Oun pen tiro phraleske halauter, hoy yob hounte rakrell! Oun me, t'maro Devel, čivau mire laba an tiro mouy oun leskro mouy oun sikrau t'men halauter, hoy hounte krenn.

¹⁶ O Aron rakrell touke ap i Israelitarya, oun lauter, hoy tou leske peneh, kova penell lo! Yob hi har tiro mouy. Oun tou hal leske har i devel, kay leske i laba an o mouy čivell.

¹⁷ Oun kava kasht le an tiro vast! Koleha kress tou ko baro koova.”

O Mose vell pale an o them Egiptia

¹⁸ Oun palle djas o Mose pash peskro romyakro dadeste, o Yetro, pale, oun penas leske: “Me kamau pale an o them Egiptia pash mire menshende te djal, te dikap, te hi le djido!” Oun o Yetro penas ap o Moseste: “Dja o Debleha!”

¹⁹ Oun o baro Devel penas ap o Moseste an o them Midian: “Dja an o them Egiptia palpale! Kol tsele morsha, kay kaman tout te marell, djivenn bouder gar.”

²⁰ Kote las o Mose peskri romyat oun peskre čaven, oun čivas len ap i bourika. Oun yon djan an o them Egiptia. Oun o Debleskro kasht las yob peha.

²¹ Oun o baro Devel rakras ap o Moseste: “Te hal an o them Egiptia, palle kre ko tselo baro koova, hoy me tout an tiro vast dom, glan o Farao! Oun me kamau leskro dji har i bar te krell, te moukell yob gar tire menshen dran i Egiptia vin.

²² Oun rake ap leste: Yaake rakrella o baro Devel: O Israel hi miro phoureder čavo.

²³ Oun me penau touke: Mouk miro čaves te djal, te mangell lo man an! Oun te moukeh les gar te djal, palle marau me tiro phoureder čavo.”

²⁴ Oun har his o Mose ap o drom, djas lo an i kheer, kote ačas lo pral i rat. Ap yek kopo vas o baro Devel ap leste, oun kamas les te marell.

²⁵ Palle las i Sefora sik i čouri, oun činas peskro čaves ap o mass, oun čivas kova, hoy yoy tele činas, ap o Moseskre pire. Oun yoy penas: “Rat ratas, oun tou hounte meress gar. Tiro djipen vas touke neves dino. Yaake val i douyto kopo miro rom.”

²⁶ Kava lab penas li doleske, kay činas li peskro čaves ap o mass. Palle moukas o baro Devel o Moseske tele.

O Aron djal pash o Moseste

²⁷ An ko tsiro penas o baro Devel ap o Aron: “Dja pash o Moseste an o moulo tato them!” Oun o Aron djas koy. Oun yon hatsan pen pash i Debleskri berga, oun lan pen an i moussi oun čoumran pen.

²⁸ Oun o Mose penas o Aroneske halauter, hoy o baro Devel leske penas, ninna ko baro koova, hoy yob an o Debleskri zoor krell.

²⁹ Oun khetne djan le an o them Egiptia oun dan i phoureden i menshendar Israel khetne gole.

³⁰ Oun o Aron penas lenge i tsele laba, hoy o baro Devel ap o Moseste penas. Palle kras o Mose glan lengre yaka ko baro koova an o Debleskri zoor.

³¹ Oun yon patsan len. Oun har shounan i Israelitarya, te dikas o baro Devel lengro pharo djipen, oun kamell lenge lačepen te krell, koy vitsran pen le ap i phoub, oun mangan o Debles an.